ސަރުކާރުގެ މަސައްކަތްތައް ތަރައްޤީކޮށް ޒަމާނީކުރުމަށް ޔޫއޭއީއާ ދެމެދު ވެފައިވާ އެއްބަސްވުން އާކުރައްވައިފި

ސަރުކާރުގެ މަސައްކަތްތައް ތަރައްޤީކޮށް ޒަމާނީކުރުމާ ގުޅޭގޮތުން ދިވެހިރާއްޖެ އާއި ޔުނައިޓެޑް ޢަރަބް އެމިރޭޓްސް (ޔޫއޭއީ) އާއި ދެމެދު ވެފައިވާ ގަވަރމަންޓް ޑިވެލޮޕްމަންޓް އެންޑް މޮޑަނައިޒޭޝަން އެއްބަސްވުން އާކުރައްވައިފިއެވެ.

މި އެއްބަސްވުން އާކުރައްވާފައިވަނީ، މިހާރު ޔޫއޭއީގައި ކުރިޔަށްދާ "ވޯލްޑް ގަވަމަންޓްސް ސަމިޓް 2025"ގެ ހަވާސާގައެވެ.

މިކަމަށް އޮތް ޙާއްސަ ރައްމިއްޔާތުގައި ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް ޢަބްދުالله ފަޔާޟްއެވެ. އަދި ޔޫ.އޭ.އީގެ ފަރާތުން ސޮއިކުރެއްވީ އެ ޤައުމުގެ ޑެޕިއުޓީ މިނިސްޓަރ އޮފް ކެބިނެޓް އެފެއާޒް ފޮރ ކޮމްޕެޓިޓިވްނަސް އެންޑް ނޮލެޖް އެކްސްޗޭންޖް، ޢަބްދުﷲ ނަޞީރު ލޫތާއެވެ.

މިއީ ޔޫ.އޭ.އީގެ ގަވަމެންޓް އެކްސްޕީރިއަންސް އެކްސްޗޭންޖް ޕްރޮގްރާމް، ޖީ.އީ.އީ.ޕީގެ ދަށުން ގަވަރމަންޓް ޑިވެލޮޕްމަންޓް އެންޑް މޮޑަނައިޒޭޝަންގެ ދާއިރާއިން ހިންގޭ ޕްރޮގްރާމްތަކުގައި ކުރިއެކޭ އެއްގޮތަށް ދިވެހި ސަރުކާރުގެ އޮފިޝަލުން ބައިވެރިކުރުމަށް ފުރުޞަތު ފަހިކޮށްދޭނެ އެއްބަސްވުމެކެވެ. 

މި އެއްބަސްވުމުގެ ދަށުން ފާއިތުވެދިޔަ ތިން އަހަރުވެސް ރާއްޖެއިން ވަނީ މި ޕްރޮގްރާމުގައި ބައިވެރިވެފައެވެ. އަދި ދިވެހި ސަރުކާރުގެ މުވައްޒަފުންގެ ކުރިއެރުމަށްޓަކައި އުނގެނުމާއި އީޖާދީ މުހިންމު އެކިއެކި ކަންކަމުގެ މައްޗަށް ފަރުމާކޮށްފައިވާ މި ޕްރޮގްރާމުގައި މިހާތަނަށް ސަރުކާރުގެ 128 މުވައްޒަފުން ތަމްރީނުކޮށްފައިވެއެވެ. މީގެ ތެރޭގައި ސިވިލް ސަރވިސް މުވައްޒަފުންނާއި ސަރުކާރުގެ އިސް އޮފިޝަލުން ހިމެނެއެވެ.

މި ޕްރޮގްރާމުގައި ބައިވެރިވުމަށް ދިވެހިރާއްޖެއިން އެންމެ ފުރަތަމަ ސޮއިކޮށްފައިވަނީ 2022 ވަނަ އަހަރު އެޤައުމުގައި ބޭއްވި ވަރލްޑް ގަވަރމަންޓް ސަމިޓުގެ ހަވާސާގައެވެ.