ފެނަކައިގެ ދަށުގައިހުރި ހުރިހާ އައިސްޕްލާންޓުތައް މިފްކޯއާ ހަވާލުކުރަނީ

ފެނަކައިގެ ބެލުމުގެ ދަށުގައި ހުރި އައިސް ޕްލާންޓުތައް މި މަހު 15ވަނަ ދުވަހުގެ ކުރިން، މޯލްޑިވްސް އިންޑަސްޓްރިއަލް ފިޝަރީޒް ލިމިޓެޑް، މިފްކޯއާ ހަވާލުކުރާނެކަމަށް މަސްވެރިކަމާއި ދަނޑުވެރިކަމާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. ވަޒީރު މިހެން ވިދާޅުވެފައި ވަނީ ރައްޔިތުންގެ މަޖިލީހުގައި މެންބަރުން ކުރިމަތިކުރުވި ސުވާލުތަކަށް ޖަވާބުދެއްވަމުންނެވެ. 

މިފްކޯގެ ބެލުމުގެ ދަށުން ހިނގަމުން ދިޔަ 14 އައިސްޕްލާންޓެއް، ފެނަކަޔާ ހަވާލުކޮށްފައި ވަނީ މިދިޔަ ސަރުކާރުގައެވެ. މި ބަދަލަށްފަހު، އައިސްޕަލާންޓުތައް އެންމެ ރަނގަޅަށް ފެނަކަޔަށް ނުބެލެހެއްޓި، ބައެއް އައިސްޕްލާންޓުތަކުގެ އޮފަރޭޝަންތައް ހުއްޓިފައި ވާކަމުގެ ޝަކުވާ މަސްވެރީން ދިޔައީ ކުރަމުންނެވެ. 

ވައިކަރަދޫ ދާއިރާގެ މެންބަރު ހުސައިން ޒިޔާދު، ރައްޔިތުންގެ މަޖިލީހުގެ ޖަލްސާގައި ވަނީ މަސްވެރިންނަށް އައިސް ލިބުމުގައި ހުރި ދަތިތައް ހައްލުކުރުމަށް ކުރާ މަސައްކަތްތަކާއި ގުޅޭގޮތުން ސުވާލުކުރައްވާފައެވެ.

ފެނަކަ ކިޔާ ކަރަންޓް ކުންފުންޏަކަށް އައިސްޕްލާންޓްތައް ދީފައި ހުރީ. އައިސްޕްލާންޓަކާއި ކުޅެން އިނގޭ މީހަކުވެސް އެތަނަކު ނެތް. ދެން އިއްޒަތްތެރި މެންބަރު ވިސްނަވާ އެ އައިސްޕްލާންޓްތަކަށް ވާނެގޮތް. މިފްކޯއަށް އިރާދަކުރެއްވިއްޔާ ފެނަކައާއި ހަވާލުކުރެވިފައި ހުރި ހުރިހައި އައިސްޕްލާންޓްތަކެއް މިމަހުގެ 15 އެއީ އެންމެ ފަހު ތާރީހު. 15 ގައި ހުންނާނީ މިފްކޯގެ ބެލުމުގެ ދަށުގައި. އިރާދަކުރެއްވިއްޔާ އައިސްޕްލާންޓްތަކަށް މިހާރު މިޖެހޭ މައްސަލަ އަޅުގަނޑުމެން ހައްލުކުރާނަން.

މެންބަރަށް ޖަވާބުދެއްވަމުން ވަޒީރު ވިދާޅުވިއެވެ.

އައިސްޕްލާންޓުތަކަށް ބަރޯސާ ވާންނުޖެހި، މަސް ފިނިކުރެވޭނެ ލުއި ނިޒާމެއް މިހާރު ތަޢާރަފްކޮށްފައިވާކަން ވެސް ވަޒީރު ޝިޔާމް ފާހަގަކުރެއްވިއެވެ. މި ލޯނު ސްކީމުގެ ދަށުން، 50 ފޫޓުން ބޮޑު ކޮންމެ ދޯންޏެއްގައި ލޮނުފެނުން މަސް ފިނިކުރެވޭ ނިޒާމް ގާއިމްކުރުމަށް ހަމަޖެހިފައިވާކަމަށް ވަޒީރު ވިދާޅުވިއެވެ. މަސްވެރިން އައިސް ހޯދުމަށް ތެޔޮ އަންދައިގެން އެ ކުރާ ދިގު ދަތުރުތަކަށް، މި މަޝްރޫޢު ނިމުމާއެކު ހެޔޮ ބަދަލެއް އަންނާނެކަމަށް ވަޒީރު ވިދާޅުވިއެވެ.

އިރާދަކުރެއްވިއްޔާ ދިވެހިރާއްޖޭގެ ދެކުނުގައި މިހާރު %60 އަށްވުރެ ގިނަ ދޯނިފަހަރުގައި އާރުއެސްޑަބްލިއު އަޅައިފި. އިރާދަކުރެއްވިއްޔާ މުޅި ފްލީޓްގައި ގާތްގަނޑަކަށް 470 ވަރަކަށް ދޯނި މިއުޅެނީ. މުޅި ފްލީޓްގައި އެޅުނީމައި އެއްގަމުގައި މިހިރަ އައިސްޕްލާންޓްތަކަށް ބަރޯސާވާ ބަރޯސާވުން އަޅުގަނޑުމެންނަށް އެއްކޮށް ނިންމާލެވޭނެ.

މަސްވެރިކަމާބެހޭ ވަޒީރުވިދާޅުވިއެވެ.

ވަޒީރު ވިދާޅުވީ މިއީ ދިވެހިރާއްޖޭގެ މަސްވެރިންނަށް ސަރުކާރަކުން ހިންގާ އެންމެ މުހިންމު އެއް މަޝްރޫޢުކަމަށެވެ. މަސްވެރިކަމަށް ބަންނަ ދޯނިތަކަށްވެސް އާރުއެސްޑަބްލިއު ސިސްޓަމް ނުވަތަ ލޮނުފެނުން މަސް ފިނިކުރެވޭ ނިޒާމު ހަރުކުރުމަށް ލޯނަށް އެދި ހުށައެޅޭނެ އިންތިޒާމް މިހާރު ހަމަޖެހިފައިވާކަމަށްވެސް، މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވިއެވެ.