ޗެމްޕިއަންސް ލީގު: މެޗު ނިމެނިކޮށް ފަހަތުން އަރާ ސިޓީގެ މައްޗަށް ރެއާލް ކުރިހޯދައިފި

ޔޫއެފާ ޗެމްޕިއަންސް ލީގުގެ ޕްލޭ-އޮފް ބުރުގެ ފުރަތަމަ ލެގުގައި، ރެއާލް މެޑްރިޑުން ފަހު ވަގުތު ކާމިޔާބުކުރި ދެ ގޯލާއެކު، އިނގިރޭސި ޗެމްޕިއަން މެންޗެސްޓަރ ސިޓީ ބަލިކޮށްފިއެވެ. 

މެޗުގެ ފުރިހަމަ ވަގުތު ހަމަވުމަށް 5 މިނެޓަށް ވީއިރުވެސް 2-1 އިން ކުރީގައި އޮތީ ސިޓީއެވެ. ނަމަވެސް އޭގެ ފަހުން ކާމިޔާބުކުރި ގޯލަކާއި، އިތުރު ވަގުތު ކާމިޔާބުކުރި ގޯލަކާއެކު ރެއާލުން މެޗު ކާމިޔާބުކުރީ 3-2 އިންނެވެ.

މެންޗެސްޓަރ ސިޓީގެ އިއްތިޙާދު ސްޓޭޑިއަމްގައި ކުޅުނު މި މެޗުގެ ކުރީކޮޅު ސިޓީއަށް ވަނީ އެ ޓީމުގެ އަސްލު ފޯމުގައި ކުޅެވިފައެވެ. އެގޮތުން 19 ވަނަ މިނެޓުގައި އެ ޓީމުން ކާމިޔާބުކުރި ފުރަތަމަ ގޯލުގައި ގިނަ ކުޅުންތެރިންގެ ބައިވެރިވުން ފެނިގެން ދިޔައެވެ. ޖެކް ގްރިއަލިޝްގެ އިތުރުން ޖޮސްކޯ ވާޑިއޯލްގެ ފުރިހަމަ ބައިވެރިވުން ފެނުނު މި ގޯލު ކާމިޔާބުކުރީ އާރލިން ހާލަންޑެވެ. 

ރެއާލުން ގޯލެއް ޖެހުމަށް ކުރަމުން ދިޔަ މަސައްކަތުގައި، ސިޓީގެ ގޯލަށްފަހު ފަސް މިނެޓު ހިނގިފަހުން، ވިނީސިއަސް ޖޫނިއަރ ފޮނުވާލި ބޯޅައެއް ހުރަސްދަނޑީގައި ޖެހިފައިވެއެވެ.

އަދި އޭގެ ފަހުން ސިޓީގެ ކޯނަރެއްގައި އަކަންޖީ ބޮލުން ފޮނުވާލި ބޯޅައަކާއި، ފުރަތަމަ ހާފު ނިމެން އުޅެނިކޮށް ހާލަންޑު ފޮނުވާލި ބޯޅައެއް ވެސް ހުރަސް ދަނޑީގައި ޖެހި ބޭރަށް ގޮސްފައި ވެއެވެ.

ރެއާލުން ފުރަތަމަ ފަހަރަށް މެޗުގެ ނަތީޖާ ހަމަހަމަކުރީ ދެވަނަ ހާފުގެ 15ވަނަ މިނެޓުގައި ކީލިއަން އެމްބައްޕޭ ކާމިޔާބުކުރި ގޯލުންނެވެ. ސިޓީގެ އޭރިއާ ތެރެއަށް މަތިމަތިން ފޮނުވާލި ބޯޅަ ޖެހުމަށް ފުންމާލި އެމްބައްޕޭ ފަޔަށް މި ބޯޅަ ރަނގަޅަށް ހެޔޮވަރު ނުވިނަމަވެސް، ބޯޅަ ގޮސް އޮއްސުނީ ގޯލުގެ ތެރެއަށެވެ.

ސިޓީއިން މެޗުގައި ދެވަނަފަހަރަށް ލީޑު ނެގީ މެޗު ނިމެން 10 މިނެޓަށްވެފައި ވަނިކޮށް އެ ޓީމުގެ ފިލް ފޮޑެންއަށް ރެއާލްގެ މެދުތެރެއަށް ކުޅެމުން އަންނަ ޑެނީ ޗެބާޔޯސްކުރި ފައުލަކަށް ލިބުނު ޕެނަލްޓީއަކުން، ހާލަންޑެވެ.

މެޗު ނިމެން 5 މިނެޓަށްވެފައި ވަނިކޮށް ރެއާލަށް މެޗުގެ ނަތީޖާ ހަމަހަމަކޮށްދިނީ ރޮޑްރީގޯގެ ބަދަލުގައި ކުޅެން ނިކުތް ބްރާހިމާ ދިއާޒްއެވެ. އެއީ ވިނީސިއަޒް ފޮނުވާލި ހަމަލާއެއް، ސިޓީގެ ގޯލްކީޕަރ އެޑަސަންގެ ގައިގައި ޖެހިފައި ނިކުތުމުން، ދުރުކަނަށް ފޮނުވާލައި ކާމިޔާބުކުރި ގޯލެކެވެ.

ރެއާލުން މެޗު ކާމިޔާބުކުރީ އިތުރުވަގުތުގެ ދެވަނަ މިނެޓުގައި ސިޓީގެ ރިކޯ ލެވިސް ސާފުކޮށްލަން އުޅުނު ބޯޅަ ވިނީސިއަސް ހޯދުމަށްފަހު، ސިޓީގެ ހާފުގެ ތެރެއިން ލިބުނު ބޮޑު ޖާގައިގެ ބޭނުންހިފައި އެޑަސަންގެ ބޯމަތިން ބޯޅަ ގޯލަށް އެއްލުމުން، އެ ބޯޅަ ސިޓީގެ ޑިފެންޑަރުން ދިފާއުކޮށްފާނެތީ ޖޫޑް ބެލިންގްހަމް ގޮސް ގޯލުގެ ތެރެއަށް ފޮނުވާލައިގެން ކާމިޔާބުކުރި ގޯލެކެވެ.

ޗެމްޕިއަންސް ލީގުގެ ނޮކް-އައުޓް ބުރުން ޖާގަ ހޯދުމަށް ޕްލޭ-އޮފްގެ ދެވަނަ ލެގުގައި ސިޓީއަށް ޖެހޭނީ ރެއާލް ބަލިކުރާށެވެ. އެ މެޗު ކުޅޭނީ ރެއާލްގެ ދަނޑުގައި މިއަންނަ ހަފްތާއެވެ.