ފަތުރުވެރިންގެ އަދަދު ތިންލައްކައިން މައްޗަށް: %9.7 ކުރިއެރުމެއް

2025 ވަނަ އަހަރުގެ މިހާތަނަށް 3 ލައްކައަށްވުރެ ގިނަ ފަތުރުވެރިން ރާއްޖެ އައިސްފައިވާކަމަށް ފަތުރުވެރިކަމާ ބެހޭ ވުޒާރާގެ ތަފާސް ހިސާބުތަކުން ދައްކައިފިއެވެ. މިހާރު ރާއްޖެއަށް އެވެރެޖްކޮށް ދުވާލެއްގެ މައްޗަށް 7،000 އަށްވުރެ ގިނަ ފަތުރުވެރިން ޒިޔާރާތްކުރެއެވެ. 

އެ ވުޒާރާގެ ތަފާސް ހިސާބުތަކުން ދައްކާގޮތުގައި، 1 ޖަނަވަރީން 11 ފެބުރުއަރީގެ ނިޔަލަށް 303،447  ފަތުރުވެރިން ރާއްޖެއަށް ޒިޔާރާތްކޮށްފައިވެއެވެ. މިދިޔަ އަހަރުގެ މި މުއްދަތުގައި 269،588 ފަތުރުވެރިން ރާއްޖެއަށް ޒިޔާރާތްކޮށްފައިވާއިރު މި އަހަރުގެ މި އަދަދަކީ މިދިޔަ އަހަރާ އަޅާބަލާއިރު %9.7 އިތުރު އަދަދެކެވެ. 

މި މުއްދަތުގެ ތެރޭގައި ރާއްޖެ އައި ފަތުރުވެރިންގެ ތެރެއިން %69.4 ފަތުރުވެރިންނަކީ ރިސޯރޓުތަކުގައި ޗުއްޓީ ހޭދަކުރި މީހުންނެވެ. މީގެ ތެރެއިން %25.6 ފަތުރުވެރިން ގެސްޓްހައުސްތަކުގައި ތިބިއިރު، %2.6 ފަތުރުވެރިން ތިބެފައިވަނީ ހޮޓެލްތަކުގައިކަމަށް ފަތުރުވެރިކަމާއި ބެހޭ ވުޒާރާގެ ތަފާސްހިސާބުތަކުން ދައްކައެވެ.

އަހަރުގެ މިހާތަނަށް އެންމެ ގިނައިން ފަތުރުވެރިން އައި ޤައުމުތައް:

• ޗައިނާ: 50,979 ފަތުރުވެރިން
• ރަޝިއާ: 28,997 ފަތުރުވެރިން
• އިނގިރޭސިވިލާތް: 27،917 ފަތުރުވެރިން
• އިޓަލީވިލާތް: 27،901 ފަތުރުވެރިން
• ޖަރުމަނުވިލާތް: 17,914 ފަތުރުވެރިން

ފަތުރުވެރިކަމާއި ބެހޭ ވުޒާރާގެ ތަފާސްހިސާބުތައް ދައްކާގޮތުން ރާއްޖޭގައި މިވަގުތު ފަތުރުވެރިންނަށް ޚިދުމަތް ދިނުމަށް 1،134 ތަނެއް ވަނީ ހުޅުވާފައެވެ. އެއީ މުޅި ޖުމްލަ 60،995 އެނދެވެ.