Ads by Exprox

ޚަބަރު

100 މެގަވޮޓްގެ ފްލޯޓިންގ ސޯލަރ ޕްރޮޖެކްޓެއް މި އަހަރުގެ މެދުތެރޭގައި ފަށަނީ

100 މެގަވޮޓްގެ ފްލޯޓިންގ ސޯލަރ ޕްރޮޖެކްޓެއް މި އަހަރުގެ މެދުތެރޭގައި ފަށަނީ

ފްލޯޓިން ސޯލަރ ޕެނަލްއެއް---

މިފްތާޙް މުޙައްމަދު

މިފްތާޙް މުޙައްމަދު

12 ފެބްރުއަރީ 2025، 12:09

12 ފެބްރުއަރީ 2025، 12:09

ސްޕެޝަލް އިކޮނޮމިކް ޒޯން (އެސްއީޒެޑް)ގައި އަވިން ހަކަރަ އުފައްދާ 100 މެގަވޮޓްގެ ފްލޯޓިންގ ސޯލަރ ޕްރޮޖެކްޓެއް ފެށުމަށްޓަކައި، މި އަހަރުގެ މެދުތެރޭގައި ކޮންޓްރެކްޓަރާ ހަވާލުކުރެވޭނެކަމަށް ފަތުރުވެރިކަމާއި ތިމާވެށްޓާ ބެހޭ ވުޒާރާއިން ހާމަކޮށްފިއެވެ.  

މި މަޢުޟޫއަށް ވާހަކަ ދައްކަވަމުން ފަތުރުވެރިކަމާއި ތިމާވެށްޓާ ބެހޭ ވުޒާރާގެ ސްޓޭޓް މިނިސްޓަރ ޑޮކްޓަރ މުޢާވިޔަތު މުޙައްމަދު ޕީއެސްއެމްއަށް ދެއްވި އިންޓަވިއުއެއްގައި ވިދާޅުވީ، މި މަސައްކަތަށް އެ ވުޒާރާއިން ތައްޔާރުވަމުން އަންނަތާ މިހާރު ދުވަސްތަކެއް ވެފައިވާކަމަށެވެ. އެގޮތުން މިދިޔަ ދުވަސްތަކުގައި ޓެކްނިކަލް ލެވެލްގެ ގިނަ މަސައްކަތަތްކެއް ކުރައްވާފައިވާކަމަށް ފާހަގަކުރެއްވެވިއެވެ. 

މިއީ ޗެލެންޖިން ކަމެއް. އޯޕަން ސީގައި އެކަން ކުރާއިރު ވަރަށް ޗެލެންޖިން ވާނެ. ނަަމަވެސް އެކަމަށް ދާންޖެހޭ ސަބަބުތައް އެބަހުރި. އިޤްތިޞާދީ ގޮތުން ލުޔެއް ހޯދުމަށް މި ޗެލެންޖިން ކަންތައްވެސް ކުރަންޖެހޭ.

ފަތުރުވެރިކަމާއި ތިމާވެށްޓާ ބެހޭ ވުޒާރާގެ ސްޓޭޓް މިނިސްޓަރ ޑރ. މުޢާވިޔަތު މުޙައްމަދު ވިދާޅުވިއެވެ.

މި އަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ވިދާޅުވީ، އިރުގެ އަލިން 100 މެގަވޮޓްގެ ހަކަތަ އުފެއްދައި ނެޝަނަލް ގްރިޑަށް ފޯރުކޮށްދިނުމަށް މާލެ އަތޮޅު ފަޅެއް ދޫކުރަން ވިސްނަވާކަމަށާއި، މި މަސައްކަތަށް، ސްޕެޝަލް އިކޮނޮމިކް ޒޯން ޑިވެލޮޕްމަންޓް ޕަރމިޓް ބޭރުގެ އިންވެސްޓަރަކަށް ދޫކުރުމުގެ މަސައްކަތް ކުރައްވަމުން ގެންދަވާކަމަށެވެ. އެގޮތުން މި މަސައްކަތް މި އަހަރުގެ މެދުތެރޭގައި ފެށުމަށްފަހު، 2027ވަނަ އަހަރުގެ ތެރޭގައި މަސައްކަތް ނިންމައި އޭގެ ފައިދާ ލިބެންފަށާނެކަމަށް ވިދާޅުވިއެވެ. 

ރާއްޖޭގައި ފޯރުކޮށްދޭ ކަރަންޓުގެ %33އަކީ އިއާދަކުރަނިވި ހަކަތައަށް ބަދަލުކުރުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވަޢުދެކެވެ.

ރައީސުލްޖުމްހޫރިއްޔާ ވިދާޅުވެފައިވަނީ މިހާރު ރާއްޖޭގައި ޤާއިމުކޮށްފައިވާ އިއާދަކުރަނިވި ހަކަތައިގެ މިންވަރަކީ %4ކަމަށާއި، އާމާޒަކީ 2028ވަނަ އަހަރު ނިމޭއިރު މި މިންވަރު %33އަށް އިތުރުކުރުންކަމަށެވެ. މި އަމާޒަށް ވަޞީލުވުމަށްޓަކައި ސޯލާ ހަރުކުރުމުގެ މަސައްކަތްތަކެއް ސަރުކާރުން ދަނީ ކުރިއަށް ގެންދަމުންނެވެ.

މި ލިޔުން ކިޔާލުމުން

Ads by MSS