ޖޯއްޔެއްގައި ބަނދެގެން މީހަކަށް އަނިޔާކުރި ބަޔަކު ހައްޔަރުކޮށްފި

ޖޯއްޔެއްގައި ބަނދެގެން މީހަކަށް އަނިޔާކުރި ބަޔަކު ހައްޔަރުކޮށްފިއެވެ.

ފުލުހުން ހާމަކޮށްފައިވާ ގޮތުގައި މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެންދިޔައީ ހަތަރު މީހަކާއި 15 އަހަރުން ދަށުގެ ކުޑަކުއްޖެކެވެ. 

އައްޑޫ ހިތަދޫގައި ހިނގި މި ހާދިސާ ފުލުހުންގެ ސަމާލުކަމަށްއައީ، ރޭ ދަންވަރު 1:35 ހާއިރު ހިތަދޫގެ މައިލޯ ދަނޑު ސަރަޙައްދުން ޕެޓްރޯލް ކުރަމުން ދިޔަ ފުލުހުންގެ އޮފިސަރުންތަކަކަށެވެ. ފުލުހުންނަށް މި މީހުން ފެނުނީ، ފުލުހުން އެ ސަރަޙައްދަށް ދިއުމުން ފިލަން އުޅެނިކޮށެވެ. 

މި މީހުން ފިލަން މަސައްކަތް ކުރުމުން އެކަމުގެ ހަޤީޤަތެއް ހޯދުމަށް ފުލުހުން ބެލިބެލުމުން އެނގުނީ، އެ ސަރަޙައްދުގައި ހުރި ޖޯއްޔެއްގައި މީހަކު ބަނދެ، އޭނާގެ ބޮލުން ބައެއް ބާލައި އަނިޔާކޮށްފައި ހުއްޓާ ފެނިފައިވާ ކަމަށް ހާމަކޮށްފައިވެއެވެ. އަދި އަނިޔާކޮށްފައި ހުއްޓާ އެތަނުން ފެނުނީ 37 އަހަރުގެ ދިވެހި ފިރިހެނެއްކަމަށް ވެސް ފުލުހުން ޙިއްސާކުރިއެވެ.

މި މައްސަލައިގައި ހައްޔަރުކޮށްފައިވަނީ ސަމާޙް ތަޢުފީޤު، ވިޝަން ޑްރީމް / ސ. ހިތަދޫ (20 އަހަރު) އާއި މުޙައްމަދު ޔައީޝް އަޒާދު، ގްރޭސް / ސ. ހިތަދޫ (19 އަހަރު) އާއި އަޝްރަފް މުޙައްމަދު، ނޫތަރި / ސ. ހިތަދޫ (22 އަހަރު) އަދި މާޒިން ޙަސަން، މެރީ ގާޑަން / ސ. ހިތަދޫ (20 އަހަރު)އެވެ. 

މި މީހުންގެ ބަންދާއިމެދު ގޮތެއް ނިންމުމަށް ކޯޓަށް ހާޒިރުކުރުމުން ސަމާޙް އާއި އަޝްރަފް 15 ދުވަހަށް ބަންދުކުރުމަށް އަމުރުކޮށް، ޔައީޝް އާއި މާޒިން ބަންދުކުރުމަށް އަމުރުކުރީ 7 ދުވަހަށެވެ.

އަދި މި މައްސަލާގައި ހިމެނޭ 15 އަހަރުން ދަށުގެ ކުޑަކުއްޖާ ވަނީ ކޯޓަށް ހާޒިރުނުކޮށް، އޭނާގެ ޢާއިލާއާއި ހަވާލުކޮށްފައިކަމަށް ފުލުހުން ހާމަކޮށްފައި ވެއެވެ.

ފުލުހުން ޙިއްސާކޮށްފައިވާ ގޮތުގައި، މި މައްސަލަ އަންނަނީ އިތުރަށް ތަޙުޤީޤު ކުރަމުންނެވެ.