އަޙްމަދު ސަރީރު އޯއައިސީގެ ދާއިމީ މަންދޫބަކަށް އައްޔަންކުރުން ދިރާސާކުރަން ކޮމިޓީއަށް

އޯގަނައިޒޭޝަން އޮފް އިސްލާމިކް ކޯޕަރޭޝަން، އޯއައިސީގެ ދާއިމީ މަންދޫބަކަށް އަޙްމަދު ސަރީރު އައްޔަންކުރުމުގެ މައްސަލަ ދިރާސާކުރުމަށް ކޮމިޓީއަށް ފޮނުވައިފިއެވެ. ސަރީރު އޯއިސީގެ މަންދޫބަކަށް ކަނޑައެޅުމަށް، މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ، ރައްޔިތުންގެ މަޖިލީހަށް ފޮނުވާފައިވާ ސިޓީ އެ މަޖިލީހުގައި ވަނީ އެއްވާފައެވެ. 

އޯއިސީ އަކީ ދުނިޔޭގެ އިސްލާމީ ޤައުމުތައް ތަމްސީލުކުރާ ޖަމާޢަތެވެ. އޯއިސީ 1969ގައި އުފެދުމާއެކު، އެ ޖަމާޢަތް ވަނީ މުޅި އިސްލާމި އުންމަތުގެ އަޑު އިއްވައިދޭ ފާރާތެއް ކަމުގައި ވެފައެވެ. އޯއިސީއިން ބިލިއަނަކަށްވުރެ ގިނަ މުސްލިމުން ތަމްސީލުކުރަމުން ދާއިރު، މިހާރު މި މުސްލިމުން ތަމްސިލުކުރުމަށްޓަކައި 57 މެންބަރު ޤައުމު އޯއައިސީގައި ހިމެނެއެވެ. 

އަޙްމަދު ސަރީރު މިހާރު ހުންނެވީ ސައުދި އަރަބިއްޔާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުގެ މަޤާމުގައެވެ. ބައިނަލްއަޤުވާމީ އެކި ޖަމާޢަތްކަށް މަންދޫބުން ހޮވަނީ ރައްޔިތުންގެ މަޖިލީހުގެ ރުހުން ލިބިވަޑައިގެންނެވުމުން ރައީސުލްޖުމްހޫރިއްޔާއެވެ.