ޖޯން އެފް ކެނެޑީ އަވަހާރަކޮށްލުމާ ގުޅޭ އާ ލިޔެކިޔުންތަކެއް އެފްބީއައިން ހޯދައިފި

އެމެރިކާގެ ކުރީގެ ރައީސް ޖޮން އެފް ކެނެޑީ (ޖޭއެފްކޭ) އަވަހާރަކޮށްލުމާ ގުޅޭ ހާހުން ގުނާލެވޭހާ ގިނަ ލިޔެކިޔުންތަކެއް ހޯދިފައިވާ ކަމަށް އެފްބީއައިން އިއުލާނުކޮށްފިއެވެ. މި ލިޔެކިޔުންތައް ހޯދިފައިވަނީ އެމެރިކާގެ ރައީސް ޑޮނަލްޑް ޓްރަމްޕްގެ އަމުރަކަށް ތަބާވުމުގެ ގޮތުން ހޯދުނު ހޯދުންތަކަކުންނެވެ.

އެފްބީއައިން އަންގާރަ ދުވަހު ބުނެފައިވާ ގޮތުގައި، މި ހޯދުންތަކުން ފެނިފައިވަނީ ގާތްގަނޑަކަށް 2،400  ލިޔެކިޔުމެވެ. މިއީ ކުރިން ޖޭއެފްކޭ އަވަހާރަކޮށްލުމުގެ މައްސަލައާ ގުޅޭކަން ނޭނގި ހުރި ލިޔެކިޔުންތަކެކެވެ. މި ލިޔެކިޔުންތައް މިހާރު ވަނީ ޑިޖިޓަލައިޒްކޮށް، އިންވެންޓްރީ ކުރެވިފައެވެ.

އެފްބީއައިން ބުނެފައިވާ ގޮތުގައި، މި އައު ލިޔެކިޔުންތައް ފެނުނު ކަން ކަމާބެހޭ ފަރާތްތަކަށް އަންގާފައިވެއެވެ. އަދި މި ލިޔެކިޔުންތައް ނެޝަނަލް އާކައިވްސް އެންޑް ރެކޯޑްސް އެޑްމިނިސްޓްރޭޝަނަށް ފޮނުވުމުގެ މަސައްކަތް ކުރަމުންދާ ކަމަށްވެސް އެފްބީއައިން ބުނެފައިވެއެވެ. މިއީ ސިއްރު އާންމުކުރުމުގެ މަރުހަލާގެ ތެރެއިން ކުރެވޭ މަސައްކަތެކެވެ.

ޖޭއެފްކޭގެ އަވަހާރަކޮށްލުމާ ގުޅޭ ހުރިހާ ލިޔެކިޔުމެއް އާންމުކުރުމަށް ރައީސް ޓްރަމްޕް ވަނީ ފާއިތުވި މަހު އަމުރުކުރައްވާފައެވެ. މީގެ އިތުރުން ޖޭއެފްކޭގެ  ބޭބެ ރޮބަޓް އެފް ކެނެޑީ އަދި މަދަނީ ޙައްޤުތަކުގެ އައިކަން މާޓިން ލޫތަރ ކިންގް ޖޫނިއަރ އަވަހާރަކޮށްލުމާ ގުޅޭ ލިޔެކިޔުންތައްވެސް  އާންމުކުރުމަށް ވަނީ އަމުރުކުރައްވާފައެވެ.

1963 ވަނަ އަހަރުގެ ނޮވެމްބަރު 22 ވަނަ ދުވަހު ޓެކްސާސްގެ ޑަލާސްގައި ޖޭއެފްކޭ އަވަހާރަކޮށްލި ގޮތާ މެދު ގިނަ ސުވާލުތަކެއް އުފެދިފައިވެއެވެ. މި މައްސަލައާ ގުޅޭ ގޮތުން ރަސްމީ ބަޔާންތަކާ މެދު ގިނަ ބަޔަކު ޝައްކުކުރާކަން ސާރވޭތަކުން ދައްކައެވެ. 2023 ވަނަ އަހަރު ގެލަޕް ހެދި ސާރވޭއަކުން ދައްކާ ގޮތުގައި، ޖޭއެފްކޭ އަވަހާރަކޮށްލުމުގައި ލީ ހާވީ އޮސްވަލްޑް އެކަނި ބައިވެރިވި ކަމަށް ވޯރެން ކޮމިޝަނުން ނިންމި ނިންމުމަށް އެމެރިކާގެ 65 އިންސައްތަ މީހުން ތާއީދު ނުކުރެއެވެ.