އިންސާނީ ޙައްޤުތައް ކުރިއެރުވުމަށް ހިއުމަން ރައިޓްސް ކޮމިޝަނުން ޖަމްޢިއްޔާތަކާއެކު ފޯރަމެއް ފަށައިފި

ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން "ސިވިލް ސޮސައިޓީ އެންގޭޖްމަންޓް ކެޕޭސިޓީ ބިލްޑިންގް" ސްޓްރެޓެޖީގެ ދަށުން ކުރިއަށްގެންދެވޭނެ ކަންތައްތަކާ ބެހޭގޮތުން މަޝްވަރާކުރުމަށް ފޯރަމެއް މިއަދު ފަށައިފިއެވެ.

މެންހަޓަން ފިޝްމާކެޓް ހޯލުގައި ބޭއްވޭ މި ފޯރަމްގައި އަތޮޅުތެރޭގެ 12 ޖަމްޢިއްޔާ ހިމެނޭގޮތަށް ޖުމްލަ 40 ޖަމްޢިއްޔާއަކުން 65 އަށްވުރެ ގިނަ މީހުން ބައިވެރިވެއެވެ. މިއީ އެޗްއާރްސީއެމް-ސީއެސްއޯ ޕާޓްނަރޝިޕްގެ ދަށުން ބާއްވާ ފޯރަމެކެވެ.

ފޯރަމް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން، އެޗްއާރްސީއެމްގެ ސެކްރެޓަރީ ޖެނެރަލް އާމިނަތު ނައުޝާން އަބްދުލް މުހައިމިން ވިދާޅުވީ، މި ސްޓްރެޓެޖީއަކީ ޔޫއެންޑީޕީގެ އެހީތެރިކަމާއެކު 2024 ވަނަ އަހަރު ތައްޔާރުކުރެވި، މިއަހަރު އަމަލުކުރަން ފަށާފައިވާ ސްޓްރެޓެޖީއެއް ކަމަށެވެ. އަދި މި ސްޓްރެޓެޖީ އެކުލަވާލުމުގައި ޖަމްޢިއްޔާތަކުގެ ޚިޔާލާއި ކަންބޮޑުވުންތައް ހިމަނާފައިވާ ކަމަށް އޭނާ ވިދާޅުވިއެވެ.

މި ސްޓްރެޓެޖީގެ މައިގަނޑު އަމާޒަކީ ދިވެހިރާއްޖޭގައި އިންސާނީ ޙައްޤުތަކުގެ ނެޓްވަރކް ހަރުދަނާކުރުމާއި، އިންސާނީ ޙައްޤުތައް ހިމާޔަތްކޮށް ކުރިއެރުވުމަށް މަގުފަހިކުރާ މާހައުލެއް ޤާއިމުކުރުން

ނައުޝާން 

އެއް ދުވަހުގެ މި ފޯރަމްގައި، ސްޓްރެޓެޖީގެ ދަށުން ތަންފީޒުކުރެވިދާނެ ހަރަކާތްތަކާމެދު މަޝްވަރާކުރެވޭނެއެވެ. މީގެ އިތުރުން، މަދަނީ ޖަމްޢިއްޔާތަކުގެ ބައިވެރިވުން ދެމެހެއްޓެނިވި ގޮތެއްގައި އިތުރުކުރުމާއި، މުއައްސަސާތަކުގެ ޤާބިލުކަން އިތުރުކުރުމަށް ކުރެވިދާނެ މަސައްކަތްތަކާ ގުޅޭގޮތުންވެސް މަޝްވަރާކުރެވޭނެއެވެ.

އެޗްއާރްސީއެމް-ސީއެސްއޯ ޕާޓްނަރޝިޕް ފޯރަމަކީ 2023 ވަނަ އަހަރުގެ ޑިސެމްބަރު މަހުން ފެށިގެން ކޮންމެ ތިން މަހަކުން އެއްފަހަރު ބާއްވާ ފޯރަމެކެވެ. މި ފޯރަމްގެ މައިގަނޑު މަޤްޞަދަކީ އިންސާނީ ޙައްޤުތަކާ ގުޅޭ މުހިންމު މައްސަލަތަކަށް ރިޢާޔަތްކުރުމާއި، އިންސާނީ ޙައްޤުތަކަށް ވަކާލާތުކުރާ ފަރާތްތަކަށް އެހީތެރިވުމާއެކު، މަދަނީ ބައިވެރިވުން އިތުރުކުރުމެވެ.