ސަރުކާރުގެ ޓެކްސީގެ ޚިދުމަތް ދިނުމަށް އެމްޓީސީސީއަށް ހަވާލުކޮށްފި

ސަރުކާރުގެ ފަރާތުން މާލޭގައި ޓެކްސީގެ ޚިދުމަތް ދިނުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ ހަވާލުކޮށްފިއެވެ.

ތިމާވެއްޓާ ރައްޓެހި ޓެކްސީ ހިދުމަތްދޭ ސަރުކާރުގެ ނިޒާމެއް ޤާއިމުކުރުމަށް އެމްޓީސީސީ އަށް ހަވާލުކުރަމށް ބޭއްވި ރަސްމިއްޔާތުގައި ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ސޮއިކުރެއްވީ ޑިރެކްޓަރ ޖެނެރަލް އަޙްމަދު ޝަމީމްއެވެ. އެމްޓީސީސީން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ އަޙްމަދު ސަޢުދީއެވެ.

ޚިދުމަތް ދިނުމަށް އޫބަރ ނުވަތަ ގްރެބް ކޮންސެޕްޓްފަދަ ސޮފްޓްވެއަރގެ ތެރެއިން އެމްޓީސިީސީން ބަލަހައްޓާނީ. ޑްރައިވަރުންގެ ބަދަލުގައި އެމްޓީސީސީން އެކަން ބަލަހައްޓާނީ. ޓެކްސީގެ ޚިދުމަތަށް އެދޭތާ މަދުވެގެން 2 މިނެޓް ތެރޭގައި ލިބޭނެ. މި ޚިދުމަތާއެކު އެއަރޕޯޓުގެ ޓެކްސީ ކިއުގެ މައްސަލައަށްވެސް ހައްލުތަކެއް ލިބޭނެ." ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވިއެވެ.

ޓެކްސީގެ ޚިދުމަތާ ގުޅެން ބޭނުންވާ މީހުންނަށް އެކަމަށް ޚާއްސަ ޕޫލެއްގައި ރަޖިސްޓްރީވުމުގެ ފުރުޞަތު ހުޅުވާލާނެކަމަށް އެމްޓީސީސީގެ މެނޭޖިން ޑިރެކްޓަރ އަޙްމަދު ސަޢުދީ ވިދާޅުވިއެވެ. ހަމައެހެންމެ ސައުދީ ވިދާޅުވީ ޓެކްސީ ލައިނަށް ޚާއްސަ އެވެއަރނެސް ޕްރޮގްރާމެއް ހިންގާނެކަމަށާއި އެ ޕްރޮގްރާމުން ފާސްވާ މީހުންނަށް ޓެކްސީ ދުއްވުމުގެ ފުރުޞަތު ލިބޭނެކަމަށެވެ.

ޓެކްސީ ލައިންގައި އުޅޭ ޕާޓްޓައިމް ޑްރައިވަރުންނަށް ހަފްތާއަކު ނޫނީ ދެހަފްތާއިން މުސާރަ ދެވޭނެގޮތަށް ޕްލޭން މި ހަދަނީ. މިއީ މިހާރު ވަޒީފާ ނެތް މީހުންނަށްވެސް ރައީސްގެ ސިޔާސަތުގެ ތެރެއިން ބޭނުން ހިފޭނެ ކަމެއް. ޓެކްސީ ލައިންގެ އެހީގައި މާލޭގައި ދިމާވެފައިވާ ޓްރެފިކް މައްސަލައަށް ހައްލެއް ހޯދުމަށް ބޭނުންވޭ އެބަ." އެމްޓީސީސީގެ މެނޭޖިން ޑިރެކްޓަރ އަޙްމަދު ސަޢުދީ ވިދާޅުވިއެވެ.

ޓެކްސީ ލައިނަކީ ދެފަރާތުން އެއްބަސްވާގޮތަށް މީޓަރު އުސޫލަކުން ދުނިޔޭގެ ގިނަ ޤައުމުތަކުން ތަޢާރަފްކޮށްގެން ދޭ ޚިދުމަތެކެވެ.