ޚަބަރު
މަޝްހޫރު ލަވަކިޔުންތެރިޔާ މުހައްމަދު މާޖިދު (މެޒޯ) ނިޔާވެއްޖެ
މުހައްމަދު މާޖިދު (މެޒޯ) ފޮޓޯ:އިންޓަނެޓް
ރާއްޖޭގެ މަޝްހޫރު ލަވަކިޔުންތެރިޔާ މުހައްމަދު މާޖިދު (މެޒޯ) މިއަދުގެ ވަގުތެއްގައި ނިޔާވެއްޖެއެވެ. މައުލޫމާތު ލިބިފައިވާ ގޮތުގައި އޭނާ ނިޔާވީ، ސިއްހީ ހާލު ގޯސްވެ އައިޖީއެމްއެޗްގެ އެމަޖެންސީގައި ފަރުވާދެމުން ދަނިކޮށެވެ.
މެޒޯއަކީ ދިވެހި މިއުޒިކް ދާއިރާގައި ގިނަ އަހަރުތަކެއް ވަންދެން ހަރަކާތްތެރިވެފައިވާ ފަންނާނެކެވެ. އޭނާ ވަނީ ގިނަ އަހަރުތަކެއް ވަންދެން ރިސޯޓު މިއުޒިކް ކުޅެފައެވެ. މީގެ އިތުރުން، މެޒޯ ކިޔާފައިވާ މަޝްހޫރު ލަވަތަކުގެ ތެރޭގައި "އުޑުން ތަރިތައް" އަދި "އެޅި މި ކަނޑުމަތި" ފަދަ ލަވަތައް ފާހަގަ ކުރެވެއެވެ.
މީގެ ކުރިން ރާއްޖޭގެ ނޫހަކަށް ދެއްވި އިންޓަވިއުއެއްގައި މެޒޯ ބުނެފައިވަނީ، ލަވަކިޔުމަކީ އޭނާ އެންމެ ކުރިން ފެށިގެން ވެސް ކުރަންފެށި މަސައްކަތް ކަމަށެވެ. އެގޮތުން ކުޑައިރު އީދުތަކުގައި ލަވަ ކިޔައިގެން ކުޑަ އަދަދަކުން ފައިސާ ލިބޭ ހަނދާން ހުންނަކަން އޭނާ ހިއްސާކޮށްފައި ވެއެވެ.
މެޒޯގެ ހަޔާތުގައި ދިވެހި މިއުޒިކް ދާއިރާއަށް ކޮށްދެއްވާފައިވާ އަގުހުރި ޚިދުމަތްތަކަށް ޝުކުރު އަދާކުރަމުން، އެތައް ބަޔަކު ވަނީ އެ މަރްހޫމްގެ ޢާއިލާއަށް ތަޢުޒިޔާ ފޮނުވާފައެވެ.
