ނަފް ޓީޗަރ: އުނގަންނައިދިނުމުގެ ދާއިރާގައި ކާމިޔާބީގެ މަގު ކަނޑައެޅި ޒުވާން މުދައްރިސާ

އެކުވެރި، ލޯބިވެތި އާއިލާއަކަށް އުފަން އައިޝަތު ނަފްލާ މުޙައްމަދަކީ ހަގީގަތުގައިވެސް ކުޑައިރުއްސުރެ އުނގަންނައިދިނުމުގެ ދާއިރާއަށް ޝައުޤުވެރިކަން ހުރި ދަރިވަރެކެވެ. ކުޅިވަރަށް ލޯބިކުރާ، ހަރަކާތްތެރި ކުއްޖެއްގެ ގޮތުގައި ހެދިބޮޑުވި ނަފްލާ، އޭނާގެ ކުޑައިރުގެ ހަނދާންތައް އާކުރަމުން ބުނެފައިވަނީ، މި ދާއިރާއިން ކުރިއަށްދިއުމަށް އޭނާ ދެކެމުން އައި ހުވަފެންތަކަށް ފުރިހަމަކަމެއް ލިބިގެން ދިޔައީ މައިންބަފައިންނާއި އާއިލާގެ ފަރާތުން ލިބުނު ހިތްވަރާއި އެހީތެރިކަމުގެ ސަބަބުން ކަމަށެވެ.

ކުޑައިރު ކޮއްކޮމެނާއި ގޭދޮށު ކުދިންނާއި އެކު ކުޅެން އުޅޭއިރު އަބަދުވެސް އުޅެވެނީ ޓީޗަރަކަށް ވެގެން.މިދާއިރާ އަށް ނިކުމެ ކުރިއަށް ދިއުމަށް އަބަދުވެސް އެންމެ ހިތްވަރުދެއްވާ ފަރާތަކީ މަންމަ.

ނަފްލާ

ނަފްލާ އުނގައްނައިދިނުމުގެ ދާއިރާއަށް ނިކުތް ދުވަސް ކޮޅު

އުނގަންނައިދިނުމުގެ ދާއިރާއަށް ޝައުޤުވެރިވާން މެދުވެރިވި ސަބަބު ބަޔާންކުރަމުން ނަފްލާ ކިޔައިދިނީ، އުމުރުން 17 އަހަރުގައި އޭނާގެ ދެ ކޮއްކޮ ގޮވައިގެން މަންމައާއެކު ޕްރީސްކޫލަށް ގޮސް އުޅުމުގެ ތެރޭގައި، ބެލެނިވެރިޔާ ކްލާހުގައި މަޑުކުރަން ލިބުނު ފުރުސަތުގައި، އޭނާގެ ކޮއްކޮއާއެކު މަޑުކުރަމުން ކްލާސް ތެރޭގައި މުދައްރިސްއަށް އެހީތެރިވުމުގެ ފުރުސަތު ލިބެމުންދިޔަ ކަމަށެވެ. މި ތަޖުރިބާ ވެގެންދިޔައީ އޭނާ ކުޑައިރުއްސުރެ އެންމެ އުފަލާއެކު ވަގުތު ހޭދަކުރި އުނގަންނައިދިނުމުގެ ދާއިރާއިން ކުރިއަށްދިއުމަށް އިތުރު ހިތްވަރެއް ލިބިގެންދިޔަ ކަމެއްގެ ގޮތުގައެވެ.

ނަފްލާއަކީ މަސައްކަތުގެ އަޚްލާގް ދަމަހައްޓާ , އިތުބާރު ކުރެވޭ ތެދުވެރިކަން ދަމަހައްޓާ، ފްލެކްސިބަލް އަދި އޯގަނައިޒޭޝަނަށް ބުރަކޮށް މަސައްކަތް ކުރަން ތައްޔާރަށް ހުރި ކުއްޖެއް، އަޅުގަނޑަށް ތަޖުރިބާ ކުރެވިފައިވާ ގޮތުގައި. އައި ލައިކް ހަރ ޕާސަނަލް އެންޑް މިއުޗުއަލް އެކައުންޓެބިލިޓީ.

-ފާތިމަތު ޔޫސުފް، މާފަންނު މަދަރުސާގެ ލީޑިންގ ޓީޗަރ-

ދާއިރާގައި ނަފްލާގެ ބައެއް ކާމިޔާބީ

އުމުރުން 18 އަހަރުގައި ނަފްލާގެ ހުވަފެންތަކަށް ޙަޤީޤަތުގެ ކުލަ ޖެހިގެންދިޔައީ މާފަންނު މަދަރުސާގައި މުދައްރިސާއެއްގެ ގޮތުގައި މަސައްކަތްކުރުމުގެ ފުރުސަތު ލިބުމުންނެވެ. މި ފުރުސަތު ނަފްލާއަށް އިތުރަށް ޚާއްޞަވެގެންދިޔައީ އެއީ އޭނާ ޕްރީސްކޫލް ތަޢުލީމު ޙާޞިލުކުރި ސްކޫލްކަމުގައި ވުމުންނެވެ. މާފަންނު މަދަރުސާގެ މުދައްރިސާއެއްގެ ގޮތުގައި މަސައްކަތްކުރަމުން، ސްކޫލުގެ މުވައްޒަފުން ދެއްވި ހިތްވަރާއެކު ނަފްލާ އަރލީ ޗައިލްޑްހުޑް އެޑިޔުކޭޝަން ކޯހެއްގައި ބައިވެރިވިއެވެ. ނަފްލާ ވަނީ މުދައްރިސާއެއްގެ ގޮތުގައި 5 އަހަރު މާފަންނު މަދަރުސާއަށް ޚިދުމަތްކޮށްފައެވެ. އަދި މި ފަސް އަހަރުގެ ތެރޭގައި ބެޗެލަރ އޮފް އަރލީ ޗައިލްޑްހުޑް އެޑިޔުކޭޝަން ފުރިހަމަކުރިއެވެ.

ނަފްލާއަކީ އަމިއްލަ ނަފްސަށް އިތުބާރު ކުރުމާއި، ޒިންމާތައް އަދާކުރުމުގައި ޤާބިލުކަން ލިބިފައިވާ ފަރާތެއް. އޭނާގެ މެނޭޖްމަންޓް އަދި ލީޑަރޝިޕް ހުނަރުތަކުގެ ސަބަބުން، ނަތީޖާ ހާސިލުކުރުމަށް ސިސްޓަމެޓިކް ގޮތެއްގައި މަސައްކަތްކުރުމަކީ އޭނާއަށް ފަސޭހަ ކަމެއް. އިޖްތިމާޢީ ގުޅުންތައް ބަދަހިކޮށް، އެހެން މީހުންނާއެކު މަސައްކަތްކުރުމުގެ ޤާބިލުކަން ލިބިފައިވާ ނަފްލާއަކީ، ކަންކަން ދެނެގަތުމާއި މައްސަލަތަކަށް ހައްލު ހޯދުމުގައި ހަމަޖެހުމާއި ވިސްނުންތޫނުކަން ލިބިފައިވާ ފަރާތެއް،ހާޒިރީއަށާއި ގަޑިއަށް ސަމާލުކަން ދިނުމާއެކު، މަސައްކަތްތައް ޝައުޤުވެރިކަމާއި ފަރުވާތެރިކަމާއެކު ކުރުމަކީ އޭނާގެ ޚާއްޞަ ސިފައެއް. މީގެ އިތުރުން، ނަފްލާއަކީ މުޢާމަލާތްކުރުމުގައި ފަސޭހަ އަދި ކަންކަން އަވަހަށް ދޭހަކުރާ ފަރާތެއްކަން ފާހަގަކުރެވޭ

ފުއާދު ޤާސިމް، ޗެއަރމަން، ލިޓްލް ޖެމްސް ޕްރީ ސްކޫލް

ލިޓްލް ޖެމްސް ސްކޫލުގައި ނަފްލާ ހަރާކްތެރިވަނީ

                    

އުމުރުން 23 އަހަރުގައި ހުޅުމާލޭ ލިޓްލް ޖެމްސް ޕްރީސްކޫލްގައި މުދައްރިސާއެއްގެ ގޮތުގައި ނަފްލާ މަސައްކަތް ފެށީ މާލޭގައި ދިރިއުޅެމުންނެވެ. ކިތަންމެ ދިގު ދަތުރެއް ކޮށްފައި ސްކޫލަށް ދާންޖެހުނު ކަމުގައި ވީނަމަވެސް، އުނގަންނައިދިނުމުގެ ދާއިރާއަށް ނަފްލާގެ ހިތުގައި އޮތް ލޯބީގެ ބޮޑުކަމުން އޭނާގެ ހިތްވަރަކަށް ބަދަލެއް ނާދެއެވެ. 

މިދާއިރާއިން އަޅުގަނޑުމީ ޒިންމާދާރު މީހަކަށް ހަދައިދިން، ފަތިހު ހޭލައިގެން ކުރަންހުންނަ އެހެނިހެން ކަންކަން ނިންމާ ވަޒީފާއަށް ގަޑިނުޖެހި ދެވޭތޯ ބަލަން ، ގަޑިއަށް ސަމާލުކަންދީ ކަންކަން ވަގުތައް ނިންމަން ދަސްކޮށްދިން.

ނަފްލާ

2016 ވަނަ އަހަރުން ފެށިގެން 2018 ވަނަ އަހަރާ ހަމައަށް ލިޓްލް ޖެމްސް ސްކޫލްގެ އެސްކޭޖީ ލެވެލް ކޯޑިނޭޓަރެއްގެ މަޤާމު އަދާކުރުމަށްފަހު، 2019 ވަނަ އަހަރުން 2020 ވަނަ އަހަރާ ހަމައަށް ނަފްލާ މަސައްކަތްކުރީ ސްކޫލްގެ އެސިސްޓަންޓް ހެޑް ޓީޗަރެއްގެ ގޮތުގައެވެ. މީގެއިތުރުން 2021 ވަނަ އަހަރު ނަފްލާ ވަނީ ސްކޫލްގެ ޑެޕިއުޓީ ހެޑް ޓީޗަރުގެ މަޤާމަށް ކުރިއަރާފައެވެ. ނަފްލާ އުނގަންނައިދިނުމުގެ ދާއިރާގައި މަސައްކަތްކުރާތާ މިހާރު ވަނީ 15 އަހަރު ވެފައެވެ.

އުނގަންނައިދިނުމުގެ ދާއިރާއަކީ ގިނަ ވަގުތުތަކެއް ދަރިވަރުންގެ ޙައްޤުގައި އެއްވެސް އަމިއްލަ އެދުމަކާ ނުލައި މުދައްރިސުން ހޭދަކުރާ އަގުނުކުރެވޭ ވަރުގެ ވަގުތުތަކަކަށްވާއިރު، ނަފްލާގެ ގިނަ ވަގުތުވެސް މި މަސައްކަތަށް ވަނީ ހުސްކުރެވިފައެވެ. ވަޒީފާއިން ލިބޭ ހުސްވަގުތުގައި އާއިލާއާއެކު ފިލްމާއި ސީރީސް ބަލާލުމަށާއި އަދި އެކުވެރިންނާއެކު މަޖާކޮށްލުމަށް ނަފްލާ ލޯބިކުރެއެވެ.

ނަފް އަކީ ވަރަށް އިންސްޕައަރިންގ ކުއްޖެއް، އެންމެ އިންސްޕަޔަރ ވަނީ ޕްރޮފެޝަނަލް ލައިފް އަދި ޕަރސަނަލް ލައިފް ބެލެންސް ކުރާ ގޮތުން، ވަރަށް ޑެޑިކޭޓަޑް އެހާމެ ހީވާގި، އެހާ ބުރަކޮށް އުޅެމުންވެސް އަޅުގަނޑަށް އަދި ދެފެމިލީއަށް ވެސް ވަގުތުހޯދާ.

-އަޙްމަދު ނަވާޒް އިބްރާހީމް- (ނަފްލާގެ ފިރިމީހާ)

ނަފްލާގެ މި ވާހަކައިން އެނގިގެންދިޔައީ ދިރިއުޅުމަށް މަސައްކަތްކުރަމުން މުދައްރިސެއްގެ ޒިންމާ ރަނގަޅަށް އަދާކުރަމުންވެސް ތިމާ ކުރާހިތްވާ އެހެން ކަންކަމަށް ވަގުތު ހޯދޭނެކަމެވެ. ނަފްލާ ފާހަގަކުރި ގޮތުގައި މި ދާއިރާއިން އޭނާގެ ދިރިއުޅުމުގެ ކަންކަން ވަކި ތަރުތީބަކުން ގެންދިއުމަށް ވަނީ މަގުފަހިކޮށްދީފައެވެ. ނަތީޖާއެއްގެ ގޮތުން ނަފްލާގެ ދިރިއުޅުމަށް ހެޔޮ ބަދަލުތަކެއް ގެނުވައި، މީހުންނާ އޮންނަ ގުޅުން އިތުރަށް ވަރުގަދަވެ ރަނގަޅުވެގެންދިޔައެވެ. މީގެ އިތުރުން އަމިއްލަ ނަފްސަށް ކުރާ އިތުބާރު އިތުރަށް ވަރުގަދަވެގެންދިޔައެވެ.

މި ދާއިރާގައި ހުރި ކަންބޮޑުވުންތައް ފާހަގަކުރަމުން ނަފްލާ ބުނެފައިވަނީ މުދައްރިސުންގެ އަގުވަޒަން ނުކުރާ ފަރާތްތަކާ އަދިވެސް ބައްދަލުވާ ކަމަށާއި، މި ދާއިރާއަށް ހުސްކުރާ ވަގުތާ އަޅާބަލާއިރު މުދައްރިސުންނަށް ލިބޭ އާމްދަނީ އިތުރުކުރަން ޖެހޭ ކަމަށެވެ. އަދި ހިތްވަރާއެކު ބާރުލާ މަސައްކަތްކޮށްފިނަމަ މި ދާއިރާގައި ކުރިއަށްދިއުމަކީ އުނދަގޫ ކަމެއް ނޫން ކަމަށެވެ. ނަފްލާ ދެކެން ބޭނުންވަނީ މާލޭގެ ތަޢުލީމީ ދާއިރާއެކޭ އެއްފަދައިން އަތޮޅުތެރޭގެ ހުރިހާ ސްކޫލްތަކެއްވެސް މިހާރަށްވުރެ އިތުރަށް ކުރިއަރައި، ވަސީލަތްތައް އިތުރުވެގެންދާނެ ދުވަހެކެވެ.