ޚަބަރު
ކުދި ޖަޒީރާ ޤައުމުތަކަށް ވިލުންތެރި މުސްތަޤުބަލެއް ހޯދޭނީ ބައިނަލްއަޤުވާމީ އެހީތެރިކަމާއެކު: ވަޒީރު ޠާރިޤު
ސަސްޓެއިނަބަލް ޑިވަލޮޕްމެންޓް ގޯލްސްއިން އެކްޝަން 2025 ޕެނަލް ޑިސްކަޝަން ފޮޓޯ :ޒާރާ
ރާއްޖެފަދަ ކުދި ޖަޒީރާ ޤައުމުތަކަށް ވިލުންތެރި މުސްތަޤުބަލެއް ހޯދޭނީ ބައިނަލްއަޤުވާމީ އެހީތެރިކަން ލިބިގެންކަމަށް ފަތުރުވެރިކަމާއި ތިމާވެއްޓާބެހޭ ވަޒީރު ޠާރިޤު އިބްރާހިމް ވިދާޅުވެއްޖެއެވެ. ވަޒީރު މިހެން ވިދާޅުވީ ޔުނައިޓެޑް އަރަބް އެމިރޭޓްސްގައި މިހާރު ކުރިއަށްދާ ވޯލްޑް ގަވަރމެންޓް ސަމިޓް 2025ގެ ޚަވާސާގައި ބޭއްވުނު ސަސްޓެއިނަބަލް ޑިވަލޮޕްމެންޓް ގޯލްސްއިން އެކްޝަން 2025 ޕެނަލް ޑިސްކަޝަންގައި ބައިވެރިވެވަޑައިގަތުމަށްފަހުއެވެ.
ޕެނަލް ޑިސްކަޝަންގައި ދެއްކެވި ވާހަކަފުޅުގައި ވަޒީރު ޠާރިޤު އިބްރާހިމް ވިދާޅުވީ މޫސުމީ ބަދަލުތަކާއި ދެކޮޅަށް ވީހާވެސް އަވަހަށް ފިޔަވަޅުތައް އަޅަންޖެހޭކަމަށެވެ. އަދި އެންމެ ބޮޑަށް މޫސުމީ ބަދަލުތަކުން ލިބޭ ގެއްލުންތަކަށް ނާޒުކު ޤައުމުތަކަކީ ތަރައްޤީވަމުން އަންނަ ކުދި ޖަޒީރާ ޤައުމުތައްކަން ފާހަގަކުރެއްވިއެވެ. އެހެންނަމަވެސް، ދިމާވާ ދަތިތަކާއެކުވެސް މޫސުމީ ބަދަލުތަކަށް ވިލުންތެރިވުމަށް ފުޅާ ދާއިރާއެއްގައި އެ ޤައުމުތަކުން މަސައްކަތްކުރަމުން އަންނަ ކަމަށް ވަޒީރު ވިދާޅުވިއެވެ.
At the SDGs in Action 2025 panel discussion held during the World Governments Summit, I noted the urgency of acting against climate change.
— Thoriq Ibrahim (@Thoriqibrahim) February 12, 2025
SIDS remain at the forefront of climate change, and despite the many challenges, continue to lead and take bold action against climate… pic.twitter.com/AcYVbT6HD1
ވަޒީރު އިތުރަށް ވިދާޅުވީ މޫސުމީ ބަދަލުތަކަށް ވިލުންތެރިވާނެ ގޮތަށް އިމާރާތްތައް ބިނާކުރުމާއި ދެމެހެއްޓެނިވި ގޮތެއްގައި ޤުދުރަތީ ވަޞީލަތްތައް ރައްކާތެރިކުރުމަށްވެސް ރާއްޖެއިން ޚާއްސަ އިސްކަމެއްދޭކަމަށެވެ. މިގޮތުން، ރާއްޖޭގައި ބިނާކުރެވޭ އިމާރާތްތަކަކީ މޫސުމީ ބަދަލުތަކަށް ވިލުންތެރިވާނެ ތަންތަންކަން ކަށަވަރުކުރުމަށް ސަރުކާރުން ވަނީ މަސައްކަތްތަކެއް ފަށްޓަވާފައެވެ. އެގޮތުން ރާއްޖޭގައި މޫސުމީ ބަދަލުތަކަށް ވިލުންތެރިވާނެ ގޮތަށް ގެދޮރު ބިނާކުރުމުގެ އިރުޝާދު ފޮތެއް އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން އެކުލަވާލާފައިވާކަން ވަޒީރު ފާހަގަކުރެއްވިއެވެ.
ނަމަވެސް، ވަޒީރު ޠާރިޤު އިބްރާހިމް ވަރަށް ސާފުކޮށް ވިދާޅުވީ މޫސުމީ ބަދަލުތަކަށް ވިލުންތެރި މުސްތަޤުބަލެއް، ރާއްޖެފަދަ ކުދި ޖަޒީރާ ޤައުމުތަކަށް ހޯދޭނީ ބައިނަލްއަޤުވާމީ އެހީތެރިކަން ލިބިގެންކަމަށެވެ. މިކަމުގެ މުހިންމުކަން ވަޒީރު ފާހަގަކުރެއްވުމުން، ކުދި ޖަޒީރާ ޤައުމުތަކަށް ދިމާވެފައިވާ ގޮންޖެހުންތަކާއި އެހީތެރިކަމުގެ ބޭނުންތެރިކަން ހާމަވެގެންދެއެވެ.
