މުހައްމަދަކީ ޑިމޮކްރަސީއަށް ރާއްޖެ ކުރި ދަތުރުގެ ހިއްސާދާރެއް: ރައީސް ނަޝީދު

ރާއްޖޭގެ މަޝްހޫރު ލަވަކިޔުންތެރިޔާ މެޒޯ މުހައްމަދު މާޖިދު ނިޔާވުމާ ގުޅިގެން، ކުރީގެ ރައީސް މުހައްމަދު ނަޝީދު ވަނީ އެމަނިކުފާނުގެ ހަނދާން އާކުރައްވައި، ޑިމޮކްރަސީއަށް ރާއްޖެ ކުރި ދަތުރުގެ ހިއްސާދާރެއްގެ ގޮތުގައި މެޒޯ މުހައްމަދު ފާހަގަކުރައްވާފައެވެ.

މިއަދު  ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ރައީސް ނަޝީދު ވިދާޅުވެފައިވަނީ މެޒޯ މުހައްމަދަކީ އެމަނިކުފާނުގެ އެންމެ ގާތް ރަހުމަތްތެރިންގެ ތެރެއިން އެއް ބޭފުޅާ ކަމަށާއި، އެމަނިކުފާނުގެ އާންމު މަސައްކަތުގެ ބޮޑު ބައިވެރިއެއް ކަމަށެވެ.

"މުހައްމަދަކީ ޑިމޮކްރަސީއަށް ރާއްޖެ ކުރި ދަތުރުގެ ހިއްސާދާރެއް. މުހައްމަދަށް ސުވަރުގޭގެ މަތިވެރި ނިއުމަތް މިންވަރު ކުރައްވައި، އާއިލާއަށް ކެތްތެރިކަން ދެއްވާށި," ރައީސް ނަޝީދުގެ ޕޯސްޓުގައި ވިދާޅުވެފައިވެއެވެ.

މުނިފޫހިފިލުވުމުގެ ދާއިރާއަށް 45 އަހަރަށްވުރެ ދިގު މުއްދަތަކަށް ޚިދުމަތްކުރެއްވި މެޒޯ މުހައްމަދު ވަނީ ދިވެހިންގެ މެދުގައި މަޤްބޫލުކަން ހޯދާފައިވާ ގިނަ އުފެއްދުންތަކެއް އަމިއްލައަށް އުފައްދަވައި، ހުށަހަޅުއްވައި ދެއްވާފައެވެ.

އުމުރުން 59 އަހަރުގެ މެޒޯ މުހައްމަދު ނިޔާވެފައިވަނީ ހާޓް އެޓޭކެއް ޖެހިގެންނެވެ. ހޮސްޕިޓަލަށް ގެންދިޔައިރުވެސް އޭނާ ވަނީ ނިޔާވެފައި ކަމަށް މަޢުލޫމާތު ލިބިފައިވެއެވެ.

މެޒޯ މުހައްމަދުގެ ނިޔާވުމާ ގުޅިގެން ގިނަ ފަރާތްތަކުން ވަނީ ހިތާމަ ފާޅުކޮށް، އެ މަރްހޫމްގެ ޚިދުމަތްތައް ފާހަގަކޮށްފައެވެ. ރާއްޖޭގެ މުނިފޫހިފިލުވުމުގެ ދާއިރާއަށް އޭނާ ކޮށްދެއްވި އަގުހުރި ޚިދުމަތްތައް ގިނަ ބަޔަކު ވަނީ ހަނދާން އާކޮށްފައެވެ.