ޚަބަރު
މާފުށީ ޖަލުގައި ބަންދުކޮށްފައި ހުރި ބިދޭސީއެއް ކުއްލި ގޮތަކަށް ނިޔާވެއްޖެ

މާފުށީ ޖަލު ފޮޓޯ:އަވަސް
މާފުށީ ޖަލުގައި ޝަރީޢަތް ނިމެންދެން ބަންދުކޮށްފައި ހުރި ނައިޖީރިއާގެ ރައްޔިތެއް މިއަދު ހަވީރު ކުއްލި ގޮތަކަށް ނިޔާވެއްޖެއެވެ. މި މަޢުލޫމާތު ހާމަކުރައްވާފައިވަނީ މޯލްޑިވްސް ކަރެކްޝަނަލް ސަރވިސްއިންނެވެ.
ކަރެކްޝަނަލް ސަރވިސްއިން ވިދާޅުވިގޮތުގައި ނިޔާވެފައިވަނީ 35 އަހަރުގެ އިމޭނުއަލް ޖޯންޕޯލް އޮކޮނާޗީއެވެ. އޭނާ ނިޔާވެފައިވަނީ މިއަދު ހަވީރު 5:20 ހާއިރުގައެވެ.
ކަރެކްޝަނަލް ސަރވިސްއިން މަޢުލޫމާތު ދެއްވިގޮތުގައި، މިއަދު ހަވީރު އިމޭނުއަލް ޖަލުގެ ޔާޑުގައި އެހެން މީހުންނާއެކު ކުޅެން ހުއްޓާ ކުއްލިއަކަށް ވެއްޓުނެވެ. އޭނާ ވަގުތުން މާފުށީ ޖަލުގެ މެޑިކަލް ސެންޓަރަށް ގެންގޮސް އަވަސް ފަރުވާ ދިނުމަށްފަހު، އިތުރު ފަރުވާއަށް މާފުށީ ހޮސްޕިޓަލަށް ގެންދެވުނެވެ.
އިމޭނުއަލްއަކީ ރާއްޖޭގައި މަސްތުވާތަކެތި ގެންގުޅުމާއި، ބޭނުންކުރުމާއި ވިޔަފާރިކުރުމުގެ މައްސަލައެއްގައި ޝަރީޢަތް ނިމެންދެން ބަންދުކޮށްފައި ހުރި މީހެކެވެ. އޭނާއަކީ އެއްވެސް ދާއިމީ ބައްޔަކަށް ފަރުވާހޯދަމުން އަންނަ މީހެއް ނޫންކަމަށްވެސް ކަރެކްޝަނަލް ސަރވިސްއިން ވިދާޅުވިއެވެ.
މި ހާދިސާއާ ގުޅިގެން އިންސްޕެކްޓަރ އޮފް ކަރެކްޝަނަލް ސަރވިސް، މޯލްޑިވްސް ޕޮލިސް ސަރވިސް، ހިއުމަން ރައިޓްސް ކޮމިޝަން އޮފް ދަ މޯލްޑިވްސް، ނެޝަނަލް އިންޓެގްރިޓީ ކޮމިޝަން އަދި ޕްރޮސެކިއުޓަރ ޖެނެރަލްގެ އޮފީހަށް މަޢުލޫމާތު ދީފައިވާކަމަށް ކަރެކްޝަނަލް ސަރވިސްއިން ހާމަކުރެއްވިއެވެ.