ކުޅިވަރު
ޝޫޓިން މުބާރާތުގެ ފައިނަލަށް އީޝަލް ދަތުރުކުރީ ޤައުމީ ރެކޯޑާއެކު

އޭޝިއަން ރައިފަލް އެންޑް ޕިސްޓަލް ކަޕް 2025ގައި އީޝަލް---
ހުލާސާ
އީޝަލް ރާއްޖޭގެ ރެކޯޑު އައުކުރީ 561 ޕޮއިންޓުން.
ތައިލެންޑުގައި މިހާރު ކުރިޔަށްދާ އޭޝިއަން ރައިފަލް އެންޑް ޕިސްޓަލް ކަޕް 2025 ގެ ޖޫނިއަރ އިންޑިވިޖުއަލް ކެޓެގަރީގައި ވާދަކޮށް ދިވެހިރާއްޖޭގެ ޤައުމީ ރެކޯޑު އައުކުރުމަށްފަހު، މަރިޔަމް އީޝަލް މިސްބާހު ފައިނަލުން ޖާގަހޯދައިފިއެވެ.
އީޝަލް ރާއްޖޭގެ ރެކޯޑު އައުކޮށްފައި މިވަނީ 561 ޕޮއިންޓާއެކުއެވެ. ކުރިން މި ރެކޯޑު އޮތީ 517 ޕޮއިންޓާއެކު ރާއްޖޭގެ އެންމެ ދުވަސްވީ އަންހެން ޝޫޓަރުންގެ ތެރޭގައި ހިމެނޭ ފާތުމަތު ނައުރާ އިސްމާއިލް އަތުގައެވެ.
ތިން މަހުގެ ކުރު ފަރިތަކުރުންތަކަކަށްފަހު މުބާރާތައް ދިޔަ އުމުރުން 15 އަހަރުގެ އީޝަލް އަކީ މި މުބާރާތުގައި ވާދަކުރާ 22 ގައުމުގެ ޝޫޓަރުންގެ ތެރެއިން ޖޫނިއަރ ކެޓެގެރީގައި މިހާ މަތީ ސްކޯރއެއް ހޯދި ދިވެހި ފުރަތަމަ ކުއްޖާއެވެ.
އީޝަލް ހިމެނޭހެން މި މުބާރާތުގެ މިކްސްޑް ޓީމު ޖޫނިއަރ ބައިގެ ފައިނަލުގައި ވެސް ރާއްޖެ ވާދަކުރިއެވެ. އެ ކެޓަގަރީގައި އީޝަލްގެ ޕެއާރއަކީ މޫސާ ނުޢައިމް ހުސައިންއެވެ. އަދި ރާއްޖޭގެ މި ޕެއާރ ފައިނަލުން ބަލިވެފައިވަނީ އެންމެ ވަޒަނެއްގެ ތަފާތުންނެވެ.
ރާއްޖޭގައި މިދިޔަ އަހަރު އޮތް "ނެޝަނަލް ޝޫޓިން ސްޕޯޓްސް ޗެމްޕިއަންޝިޕް" އަކީ އާންމުކޮށް ހުޅުވާލައިގެން ކުރިޔަށް ގެންދިޔަ ފުރަތަމަ ޝޫޓިން މުބާރާތެވެ. އަދި ޖޫނިއަރ ކެޓަގަރީ އަލަށް ތަޢާރަފްކޮށްފައިވަނީ ވެސް އެ މުބާރާތުގައެވެ.