ޚަބަރު
ރާއްޖެއިން އެދޭ ކޮންމެ ފަހަރަކު ވަގުތުން އެހީދިނުމަށް އިންޑިއާ އޮތީ ތައްޔާރަށް: އިންޑިއާގެ ނައިބު ރައީސް

ރައްޔިތުންގެ މަޖިލީހުގެ ރައީސް އިންޑިއާގެ ނައިބު ރައީސްއާ ބައްދަލުކުރެއްވުން، ފޮޓޯ: ޕީއެސްއެމް
ރާއްޖެއިން އެހީއަށްއެދޭ ކޮންމެ ފަހަރަކު ވެސް ވަގުތުން އެހީދިނުމަށް އިންޑިއާ އަބަދުވެސް އޮންނާނީ ތައްޔާރަށްކަމަށް އެ ޤައުމުގެ ނައިބު ރައީސް، ޝްރީ ޖަގްދީޕް ދަންޚާރު ވިދާޅުވެއްޖެއެވެ.
އިންޑިއާގެ ނައިބު ރައީސް މިހެން ވިދާޅުވީ، ރަސްމީ ދަތުރުފުޅެއްގައި އިންޑިއާއަށް މިހާރު ވަޑައިގެން އުޅުއްވާ ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲއާއެކު ބޭއްވެވި ބައްދަލުކުރެއްވުމުގައެވެ.
ނައިބު ރައީސް ޝްރީ ޖަގްދީޕް ދަންޚާރުއަކީ، ދެ ގެ ހިމެނޭ އިންޑިއާގެ ޤާނޫނު ހަދާ މަޖިލީހުގެ މަތިގެ، ރާޖްޔާ ސަބާގެ ޗެއަރމަން ވެސް މެއެވެ.
މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކުރައްވާފައިވަނީ، ދިވެހިރާއްޖެއާއި އިންޑިއާގެ ޤާނޫނު ހަދާ މަޖިލިސްތަކުގެ މެދުގައި އެއްބާރުލުން އިތުރުކުރުމާއި، އިޤްތިޞާދީ އަދި ވިޔަފާރީގެ ގުޅުންތަކާއި، ފަތުރުވެރިކަމާއި، ސަރަޙައްދީ ހަމަޖެހުން އިތުރުކުރެވޭނެ ގޮތްތަކަާ ގުޅިގެންކަމަށް، މަޖިލީހުގެ އިދާރާއިން ހާމަކޮށްފައިވެއެވެ.
ރާޖްޔާ ސަބާގެ ޗެއަރމަން ވިދާޅުވީ، ދެ ޤައުމުގެ ދެމެދުގައިވާ އެކުވެރިކަން އަބަދުވެސް ދެމެހެއްޓުމަށް މަސައްކަތް ކުރައްވާނެކަމަށެވެ.
މި ބައްދަލުކުރެއްވުމުގައި އިންޑިއާގެ ނައިބު ރައީސް އަދި ރާޖްޔާ ސަބާގެ ޗެއަރމަން ދިވެހިރާއްޖެއަށް ޒިޔާރަތް ކުރެއްވުމުގެ ދަޢުވަތު ވެސް މަޖިލީހުގެ ރައީސް ދެއްވަވާފައި ވެއެވެ.
ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިން ވަނީ އިންޑިއާގެ ޤާނޫނު ހަދާ މަޖިލީހުގެ ތިރިގޭގެ ރައީސާއިވެސް ބައްދަލުކުރައްވާފައެވެ.