ޚަބަރު
ޕީސީބީގެ ރައީސް އެ މަޤާމުން ވަކިކުރައްވައިފި

ޕީސީބެ ރައީސްކަމުގެ މަޤާމުގައި ހުންނެވި ޙަމްދީ އަޤީލް---
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ރައީސްގެ މަޤާމުގައި ހުންނެވި ޙަމްދީ އަޤީލް، އެ މަޤާމުން ރޭ ވަކިކުރައްވައިފިއެވެ.
މި މަޤާމަށް ބޭފުޅަކު އައްޔަން ކުރެއްވުމާ ވަކިކުރެއްވުމުގެ ބާރު ރައީސުލްޖުމްހޫރިއްޔާއަށް އޮންނަވާއިރު، ޙަމްދީ މި މަޤާމަށް އައްޔަނުކުރައްވާފައިވަނީ ނޮވެމްބަރު 22، 2023 ގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒެވެ.
އަދި ޙަމްދީ މަޤާމުން ވަކިކުރެއވި ސަބަބު އަދި ހާމަކުރައްވާފައެއް ނުވެއެވެ.
ދައުލަތުގެ ވިޔަފާރި ތަންތަން ޕްރައިވެޓައިޒް ކުރުމާއި، ކޯޕަރަޓައިޒް ކުރުމާއި، މޮނިޓަކޮށް އިވެލުއޭޓް ކުރުމުގެ ޤާނޫނުގެ ދަށުން އުފައްދާފައިވާ ޕީސީބީގެ ބޯޑުގެ ރައީސްގެ މަގާމަށް ވަަޑައިގެންނެވުމުގެ ކުރިން ޙަމްދީ ވަނީ ފިއުލް ސަޕްލައި މޯލްޑިވްސް (އެފްއެސްއެމް)ގެ މެނޭޖިން ޑިރެކްޓަރުކަމާއި މޯލްޑިވްސް ރޯޑް ކޯޕަރޭޝަންގެ މެނޭޖިން ޑިރެކްޓަރުކަމުގެ މަގާމު ވެސް ފުރުއްވައިފައެވެ.
މަޤާމުން ވަކިކުރެއްވުމުގެ ކުރިން ޙަމްދީ ވަނީ ސަރުކާރުގެ ކުންފުނިތަކަށް އިއްޔެ ދެ ސާރކިއުލަރއެއް އާންމުކޮށްފައެވެ. އެއީ ކުރިއަށް އޮތް ރޯދަމަހު ކުންފުނިތަކުގެ މުވައްޒަފުންނަށް ދޭ ރޯދަ އިނާޔަތުގެ ފައިސާ ފިޔަވައި އިތުރު ހަދިޔާތައް ނުދިނުމަށް އަންގައި ނެރުނު ސާކިއުލާއަކާއި ކުންފުނިތަކުގެ ޚަރަދު ކުޑަކުރުމާ ގުޅޭ ސާކިއުލާއެކެވެ.