ރާއްޖޭގެ ދަނޑުވެރިކަމުގެ ސިނާޢަތާ ގުޅިގެން، ނެދެލޭންޑްސް އާއި ރޯމުގެ ކައުންސިލަރުންނާ ވަޒީރު މާރިޔާ މަޝްވަރާކުރައްވައިފި

ރާއްޖޭގެ ދަނޑުވެރިކަމުގެ ސިނާޢަތް އައު ހަރުފަތަކަށް ގެންދިޔުމަށް، ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. މަރިޔަމް މާރިޔާ، ނެދެލޭންޑްސް ގެ އެމްބެސެޑަރ، ހިޒް އެކްސެލެންސީ މާރސެލް ބުކްބޫމް އާއި ރޯމުގެ ކައުންސިލަރ ޖޭން ބޭޑްއާ މަޝްވަރާކުރައްވައިފިއެވެ.

މި މަޝްވަރާގައި، ރާއްޖޭގެ ދަނޑުވެރިކަމުގެ ސިނާޢަތަށް އެހެން ޤައުމުތަކާ ގުޅިގެން މަސައްކަތްކުރުމަށް ހުރި ފުރުސަތުތަކާއި، ރާއްޖޭގެ ކާބޯތަކެތި ރައްކާތެރިކުރުމާއި، މި ސިނާޢަތް ދިރާސާކުރުމަށް ހުރި ޕާރޓްނާރޝިޕް ފުރުސަތުތަކުގެ މައްޗަށް އަލިއަޅުވާލާފައިވެއެވެ. ހަމައެހެންމެ، ތަފާތު ޙާލަތްތަކާ ގުޅިގެން ކޮންސަލްޓިންގ ހޯދާނެ މަގުތަކާއި، އެހެނިހެން ފުރުސަތުތައް ހޯދާނެ ގޮތްތައް ވެސް މި ބައްދަލުވުމުގައި މަޝްވަރާކުރުވިފައިވެއެވެ. 

އިންޓަރނޭޝަނަލް ފަންޑު ފޮރ އެގްރިކަލްޗަރަލް ޑިވެލޮޕްމަންޓް، އިފާޑްގެ 48 ވަނަ ގަވަރނިންގް ކައުންސިލް މީޓިންގައި ބައިވެރިވެވަޑައިގެންނެވުމަށް ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. މަރިޔަމް މާރިޔާ ވަނީ އިޓަލީގެ ރޯމަށް ވަޑައިގަންފައެވެ. 

މި ބައްދަލުވުންތައް ކުރިއަށް ގެންގޮސްފައި ވަނީ ޖަޒީރާ ޤައުމުތަކުގެ ދަނޑުވެރިކަމަށް ޚާއްސަ ސަމާލުކަމެއް ދީގެންނެވެ. މިގޮތުން، އެކި ޤައުމުތަކުގެ ވަޒީރުންނާއި، ސްޓޭޓުންގެ އިތުރުން ދަނޑުވެރިންނާއި ދަނޑުވެރިކަމުގެ ސިނާޢަތުގައި ތަޖުރިބާކާރު މީހުން މި ބައްދަލުވުމުގައި ބައިވެރިވެވަޑައިގެން، ތަޖުރިބާތައް ހިއްސާކުރައްވާ، މަޝްވަރާގައި ބައިވެރިވެވަޑައިގަނެފައިވެއެވެ.