ޚަބަރު
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ހުށަހަޅާ މައްސަލަތަކުގެ އަދާހަަމަ މަޢުލޫމާތު މެސެޖަކުން ފޮނުވަން ފަށައިފި

ޕްރެސް ކޮންފަރެންސްގައި ވަޒީރު ޑރ. ޢާއިޝަތު ޝިހާމް---
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ހުށަހަޅާ މައްސަލަތަކުގެ އަދާހަަމަ މަޢުލޫމާތު، އެ މައްސަލަ ހުށަހެޅި ފަރާތަށް އެސްއެސްއެމްއިން ފޮނުވަން ފަށާފައިވާކަމަށް ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.
ވަޒީރު މިހެން ވިދާޅުވީ، ނޫސްވެރިންނަށް މަޢުލޫމާތު ދެއްވުމަށް އެ ވުޒާރާއިން ބޭއްވި ބައްދަލުވުމުގައެވެ.
ވަޒީރު ވިދާޅުވީ، އެ ވުޒާރާގެ މަސައްކަތްތަކާ ގުޅިގެން ރައްޔިތުންގެ އޮތް އެންމެ ބޮޑު ކަންބޮޑުވުމަކަށްވީ، ހުށަހެޅޭ މައްސަލަތަކުގެ އަދާހަމަ މަޢުލޫމާތު ހޯދުމަށް ދަތިވުންކަމަށެވެ.
ރައްޔިތުންގެ ކަންބޮޑުވުން އޮތް އެއް ކަމަކީ، ރައްޔިތުންގެ ފަރާތުން އަޅުގަނޑުމެނަށް މައްސަލައެއް ހުށަހެޅުމުން، މައްސަލަ ހުށަހެޅިކަން ވެސް އެނގެން ނޯންނަކަމާއި، އޭގެ އަޕްޑޭޓްސް ހޯދުމުގެ ދަތިކަމުގެ ވާހަކަ.
ވަޒީރު ވިދާޅުވިއެވެ.
އެގޮތުން އެ މައްސަލަ ޙައްލުކުރުމުގެ ގޮތުން ވުޒާރާއަށް މައްސަލައެއް ހުށަހެޅުމާއެކު، މައްސަލަ ބަލައިގަތްކަމުގެ އެސްއެމްއެސްއެއް މިހާރު މައްސަލަ ހުށަހެޅި ފަރާތައް ލިބިލައްވާނެކަމަށް ވަޒީރު ވިދާޅުވިއެވެ. އެ އެސްއެމްއެސްގައި ހުށަހެޅި މައްސަލައަށް ދީފައިވާ އައިޑެންޓިފިކޭޝަން ނަންބަރެއް ހިމަނައި، ފަސޭހަކަމާއެކު ވަކިވަކި ކޭސްތަކާ ގުޅޭ މަޢުލޫމާތު ހޯދޭނެ ނިޒާމެއް މިހާރު ޤާއިމްކުރެވިފައިވާކަމަށް ވަޒީރު ހާމަކުރެއްވިއެވެ.
އަދި މިކަން އިތުރަށް ފުރިހަމަކުރާނީ ރައްޔިތުންގެ ޚިޔާލާ މަޝްވަރާއާއެކުގައިކަމަށް ވެސް ވަޒީރު ވަނީ ވިދާޅުވެފައެވެ.
މީގެ އިތުރުން، މަސައްކަތުގެ ފެންވަރު ރަގަޅުކުރުމަށް، ވުޒާރާގައި ރައްކާކޮށްފައި ހުންނަ މަޢުލޫމާތު އެކަށޭނަ ގޮތަކަށް ބަދަލުކުރުމުގެ މަސައްކަތް މިހަރު ފައްޓަވާފައިވާކަމަށް ވެސް ވަޒީރު ވިދާޅުވިއެވެ. އެގޮތުން، އެ ވުޒާރާއިން މިހާރު ޤާއިމްކުރަމުންދާ އިންފޯރމޭޝަން މެނޭޖުމެންޓު ސިސްޓަމަކީ، ރާއްޖޭގައި ދައުލަތުގެ އެހީ ބޭނުންވާ ހުރިހާ ފަރާތެއްގެ މަޢުލޫމާތު ރައްކާތެރިގޮތުގައި ބެލެހެއްޓޭނެ ސިސްޓަމެއްކަމަށާއި، އަދި މި ސިސްޓަމްގެ އެންމެ ބޮޑު ފަސޭހައަކަށް ވާނީ، ރާއްޖޭގައި އެހީ ބޭނުންވާ ހުރިހާ ފަރާތްތަކެއްގެ މަޢުލޫމާތު ފަސޭހަކަމާއެކު ލިބެން ހުރުންކަމަށް ވެސް ވަޒީރު ވިދާޅުވިއެވެ.