މަސްތުވާތަކެތީގެ އޮޕަރޭޝަނެއްގައި ހަނިމާދޫއިން ދެ މީހަކު ހައްޔަރުކޮށްފި

ހދ. ހަނިމާދޫގައި މަސްތުވާތަކެތި ބޭނުންކޮށް އޭގެ ވިޔަފާރިކުރާ ބެއްއެގެ މަޢުލޫމާތު ނާރކޮޓިކްސް އިންޓެލިޖެންސަށް ލިބި، އެ މަޢުލޫމާތާ ގުޅިގެން ހަނިމާދޫގައި ހިންގި އޮޕަރޭޝަނުގައި ދެމީހުން ހައްޔަރުކޮށްފިއެވެ. 

ހަނިމާދޫ ޕޮލިސް ސްޓޭޝަނާއި ކައުންޓަރ ނާކޮޓިކްސް އިންޓެލިޖެންސް ގުޅިގެން ފެބުރުއަރީ 12 ވަނަ ދުވަހު ހިންގި މި އޮޕަރޝަނުގައި ހައްޔަރުކޮށްފައި ވަނީ ހދ. ހަނިމާދޫ / މާޔާ ޕެލެސް، އާމިނަތު (56) އާއި، ފާޠިމަތު މާޔާ (25) އެވެ. 

އެ ދެ މީހުން ހައްޔަރުކޮށް، އެ މީހުން ދިރިއުޅޭ ގެ ބަލައިފާސްކުރިއިރު މަސްތުވާތަކެތިކަމަށް ބެލެވޭ ތަކެއްޗާއި ފައިސާ ފެނިފައިވެއެވެ. ފެނުނު މަސްތުވާތަކެތީގެ ވަގުތީ ބަރުދަނަކީ 189.69 ގުރާމެވެ.

މި މައްސަލައާ ގުޅިގެން އެ މީހުންގެ ބަންދާމެދު ގޮތެއް ނިންމުމަށް ހަނިމާދޫ މެޖިސްޓްރޭޓް ކޯޓަށް ހާޒިރުކުރުމުން އާމިނަތު ފަސް ދުވަހަށް އަދި ފާޠިމަތު މާޔާ 15 ދުވަހަށް ބަންދުކުރުމަށް އަމުރުކޮށްފައިވެއެވެ.

މި މައްސަލަ ފުލުހުން ދަނީ ތަހުގީގުކުރަމުންނެވެ.