ޚަބަރު
ރަސްފަންނާއި ސަލްޓަން ޕާކު ކުރިއަށްވުރެ ފުރިހަމަކުރުމަށް ސަރުކާރުން މަސައްކަތް ކުރާނަން: ރައީސް

ސަލްޓާން ޕާކު އެތެރެ|ފޮޓޯ: އިންޓަނެޓް
ހުލާސާ
ރަސްފަންނަކީ 2016 ވަނަ އަހަރު ތަރައްޤީކޮށް ހުޅުވާފައިވާ ތަނެއް
ސަލްޓަން ޕާކު ހުޅުވާފައިވަނީ 2017 ވަނަ އަހަރު
ރަސްފަންނާއި ސަލްޓަން ޕާކު ކުރިއަށްވުރެ ފުރިހަމައަށް ތަރައްޤީކޮށްދެއްވުމަށް ސަރުކާރުން ޚާއްޞަ މަސައްކަތްތަކެއް ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ. ރައީސް މިފަދައިން ވިދާޅުވީ، ސޯޝަލް މީޑީއާގައި ކުރެއްވި ޕޯސްޓެއްގަ އެވެ.
ރައީސުލްޖުމްހޫރިއްޔާ ވިދާޅުވީ، ރަސްފަންނާއި ސަލްޓަން ޕާކު ދަނީ ވީރާނަވަމުން ކަމަށެވެ. ހަމަ އެހެންމެ، ރަސްފަންނާއި ސަލްޓަން ޕާކުގެ މިހާރުގެ ޙާލަތާއި މެދު އެމަނިކުފާނު ނުހަނު ހިތާމަކުރައްވާ ކަމަށް ރައީސް ވިދާޅުވިއެވެ. މީގެ އިތުރުން އެމަނިކުފާނު ވިދާޅުވީ، މި ދެ ސަރަޙައްދަކީ ވެސް މާލޭގައި ދިރިއުޅޭ ރައްޔިތުންނަށް ހިތްހަމަޖެހުމާއި އުފާވެރިކަން ގެނެސްދޭ ދެތަންކަމަށެވެ. އެހެންކަމުން، މި ދެތަނުގެ ރީތިކަމާއި އާރޯކަން އަނބުރާ ގެނެސްދެއްވުމަށް، ކުރިއަށް ވުރެވެސް ފުރިހަމަ އަށް ތަރައްޤީކޮށްދެއެވުމަށް ސަރުކާރުން ޚާއްޞަ މަސައްކަތްތަކެއް ކުރައްވާނެ ކަމަށް އެމަނިކުފާނު ވިދާޅުވިއެވެ.
ރަސްފަންނަކީ 2016 ވަނަ އަހަރު ތަރައްޤީކޮށް ހުޅުވާފައިވާ ތަނެކެވެ. މިތަން ތަރައްޤީކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައުސިންގ މިނިސްޓަރުކަމުގެ މަޤާމުގައި ހުންނެވި ދުވަސްވަރުގައެވެ. މި ސަރަޙައްދުގައި، ހިތްހަމަޖައްސާލަން އިށީނދެލައިގެން ތިބޭވޭނެ ޖޯލިފަތިތަކާއި ހޮޅުއަށިތައް ބަހައްޓާފައިވެއެވެ. މީގެ އިތުރުން، މަސް ބޭނުމަށް ޚާއްޞަ އިންތިޒާމްތަކަކާއި، އެ ސަރަޙައްދަށް ދާ މީހުންނަށް ޚާއްޞަކޮށް ހަދާފައިވާ ޕާކިންގ ޒޯނެއް ވެސް ހުރެއެވެ.
ރަސްފަންނުގެ އިތުރުން، ސަލްޓަން ޕާކަކީ 2017 ވަނަ އަހަރު ތަރައްޤީކޮށް ހުޅުވާފައިވާ ތަނެކެވެ. މިތަން ވެސް ހުޅުއްވާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެ ބެއްލެވުމުގެ ދަށުންނެވެ. މިތަން އެންމެ ފުރަތަމަ ޢާންމުނަނަށް ހުޅުވާފައިވަނީ، ރަސްރަނި ބަގީޗާގެ ނަމުންނެވެ. މި ސަރަހައްދުގައި، ކުޑަކުދިން ކުޅޭނެ ވަޞީލަތްތަކާއި އެކު 3 ޕާކެއް ވަނީ ތަރައްޤީކޮށްފަ އެވެ. ނަމަވެސް، މިހާރު މިތަނުން ގިނަ ތަންތަނުގެ ބޭނުން ނުކުރެވޭ ކަމަށް ޢާންމު ރައްޔިތުން ފާހަގަކުރެއެވެ.
ރާއްޖޭގައި މީހުން ދިރިއުޅޭ ކޮންމެ ރަށެއްގައިވެސް ޕާކެއް ތަރައްޤީ ކުރެއްވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ މުހިންމު ސިޔާސަތެކެވެ.