މިދިޔަ ޖެނުއަރީ މަހު މުދަލު ޒަކާތުގެ ގޮތުގައި ލިބުނު އަދަދު %48.5 އިތުރު

މިދިޔަ ޖެނުއަރީ މަހު މުދަލު ޒަކާތުގެ ގޮތުގައި ލިބުނު އާމްދަނީ، އޭގެ ކުރިން އަހަރުގެ ޖެނުއަރީ މަހު ލިބުނު އާމްދަނީއަށް ވުރެން %48.5 އިތުރުކަމަށް މޯލްޑިވްސް އިންލޭންޑު ރެވެނިއު އޮތޯރިޓީ، މީރާގެ ތަފާސްހިސާބުތަކުން ދައްކައިފިއެވެ.

އެގޮތުން މިދިޔަ މަހު މުދަލު ޒަކާތުގެ ގޮތުގައި ލިބިފައިވަނީ 5.3 މިލިއަން ރުފިޔާއެވެ. އެއީ އޭގެ ކުރީ އަހަރުގެ ޖެނުއަރީ މަހު ލިބުނު 3.5 މިލިއަން ރުފިޔާއާ އަޅާބަލާއިރު 1.8 މިލިއަން ރުފިޔާ އިތުރު އަދަދެކެވެ.

މީގެ އިތުރުން، ނިމުނު އަހަރަކީ މުދަލު ޒަކާތުގެ ގޮތުގައި މިހާތަނަށް ތާރީޙުގައި ވެސް އެންމެ ގިނަ ފައިސާ ދަޢުލަތަށް ލިބިފައިވާ އަހަރެވެ. އެގޮތުން މިދިޔަ އަހަރު ވަނީ މުދަލު ޒަކާތުގެ ގޮތުގައި 101.9 މިލިއަން ރުފިޔާ ލިބިފައެވެ. މި އަދަދަކީ، އޭގެ ކުރީ އަހަރާ ބަލާއިރު %12.9 އިތުރު އަދަދެކެވެ. 2023ވަނަ އަހަރު މުދަލު ޒަކާތުގެ ގޮތުގައި ލިބިފައިވަނީ 90.2 މިލިއަން ރުފިޔާއެވެ.

މުދަލު ޒަކާތް މިހާރު ވާޖިބުވާ ނިޞާބަކީ 8،800.05 ރުފިޔާކަމަށް އިސްލާމީ ކަންތައްތަކާބެހޭ ވުޒާރާއިން ވަނީ ކަނޑައަޅާފައެވެ. އެ ވުޒާރާއިން މި ގޮތަށް ކަނޑައެޅީ މިދިޔަ މަހުގެ 22 ވަނަ ދުވަހެވެ. މީގެ ކުރިން މިދިޔަ އަހަރުގެ އޮކްޓޫބަރު މަހު ކަނޑައަޅާފައިވާ ނިޞާބުގެ އަދަދަކީ 9،240.35 ރުފިޔާއެވެ.

މުދަލުޒަކާތުގެ ނިޞާބަކީ، މުދަލުގައި އެ މިންވަރެއް ހަމަވުމުން އެއިން މުދަލުގެ ޒަކާތް ނެރުން ވާޖިބުވާ އެންމެ މަދު މިންވަރެވެ. ފައިސާއިން ޒަކާތް ދައްކާނަމަ، ފައިސާ އަގުކުރެވޭނީ ރަން ނުވަތަ ރިއްސަށެވެ.

ދިވެހިރާއްޖޭގައި ނިޞާބު ކަނޑައަޅަނީ ރިހީގެ ނިޞާބުންނެވެ. ޢިލްމުވެރިން ވިދާޅުވާ ގޮތުގައި ރިހީގެ އަގުން ފައިސާ އަގުކުރުމަކީ ފަޤީރުންނަށް އެންމެ ފައިދާ ބޮޑު ގޮތެވެ.