ޚަބަރު
މަޖިލީހުގެ ރައީސް އިންޑިއާއަށް ކުރެއްވި ރަސްމީ ދަތުރުފުޅު ނިންމަވާލައްވައިފި
މަޖިލީހުގެ ރައީސް މާލެ ވަޑައިގަތުން، ފޮޓޯ: ރައްޔިތުންގެ މަޖިލިސް
ހުލާސާ
މި ދަތުރުފުޅަކީ އިންޑިއާގެ ޤާނޫނު ހަދާ މަޖިލީހުގެ ތިރިގެ އާއި މަތިގޭގެ ދަޢުވަތަކަށް ކުރެއްވެވި ދަތުރުފުޅެއް.
ރަސްމީ ދަތުރުފުޅެއްގައި ރައްޔިތުންގެ މަޖިލީހުގެ ރައީސް، ޢަބްދުއްރަޙީމް ޢަބްދުﷲ އިންޑިއާއަށް ކުރެއްވެވި ދަތުރުފުޅު ނިންމަވާލެއްވުމަށްފަހު މިއަދު މާލެ ވަޑައިގެންފިއެވެ.
އެ މަނިކުފާނުގެ މި ދަތުރުފުޅަކީ އިންޑިއާގެ ޤާނޫނު ހަދާ މަޖިލީހުގެ ތިރިގެ، ލޮކް ސަބާގެ ރައީސް އާއި މަތިގެ، ރާޖްޔަ ސަބާގެ ޗެއަރމަންގެ ދަޢުވަތަކަށް ކުރެއްވެވި ދަތުރުފުޅެކެވެ.
ރައްޔިތުންގެ މަޖިލީހުގެ ރައީސް، އޮނަރަބަލް ޢަބްދުއްރަޙީމް ޢަބްދުﷲ އާއި ވަފުދުގެ ބޭފުޅުން، އިންޑިއާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ރާއްޖެ ވަޑައިގެންފި pic.twitter.com/cq5uf2LTXS
— People's Majlis (@mvpeoplesmajlis) February 14, 2025
ހަތަރު ދުވަހުގެ މި ދަތުރުފުޅުގައި ޢަބްދުއްރަޙީމް ވަނީ އިންޑިއާގެ ޤާނޫނު ހަދާ މަޖިލީހުގެ ތިރިގޭގެ ރައީސް، އޯމް ބިރްލާއާ މިދިޔަ އަންގާރަދުވަހު ބައްދަލުކުރައްވާފައެވެ. އެ ބައްދަލުކުރެއްވުމުގައި ބިލްރާ ވިދާޅުވީ، ރާއްޖޭގެ ރައްޔިތުންގެ މަޖިލީހުގެ މަސައްކަތްތައް ޒަމާނާ އެއްގޮތަށް ތަރައްޤީކޮށް ޑިޖިޓައިޒްކުރުމަށް ބޭނުންވާ ފަންނީ އެހީތެރިކަމާއި އެއްބާރުލުން ދެއްވާނެކަމަށެވެ. އަދި މިކަމުގައި މަޖިލިސް މެމްބަރުންނާއި މަޖިލިސް އިދާރާގެ މުވައްޒަފުން ތަމްރީނުކުރުމުގައި ވެސް އެހީތެރިކަން ދެއްވާނެކަމަށް ބިލްރާ ވިދާޅުވިއެވެ.
މީގެ އިތުރުން، މި ބައްދަލުވުމުގައި ލޮކްސަބާގެ ރައީސް ވަނީ ރާއްޖެއާއި އިންޑިއާއާ ދެމެދު އޮތް ޒަމާންވީ ގުޅުމަށް އަލިއަޅުއްވާލައްވާފައެވެ. އަދި ރާއްޖެއަކީ އިންޑިއާއިން ގެންގުޅޭ "ނެއިބަރހޫޑް ފަސްޓް ޕޮލިސީ" އާއި އިންޑިއާ ކަނޑުގެ ސަރަޙައްދުގެ ރައްކާތެރިކަން ކަށަވަރުކުރުމަށް އިންޑިއާއިން ގެންގުޅޭ "ސާގަރް" ޕޮލިސީގައިވެސް މުހިއްމު ބައިވެރިއެއްކަން އޭނާ ފާހަގަކުރެއްވިއެވެ.
އިންޑިއާގެ ނައިބު ރައީސް އަދި ޤާނޫނު ހަދާ މަޖިލީހުގެ މަތިގޭގެ ރައީސް، ޝްރީ ޖަގްދީޕް ދަންޚާރުއާ ޢަބްދުއްރަޙީމް ބައްދަލުކުރެއްވީ ބުދަ ދުވަހެވެ.
މި ބައްދަލުކުރެއްވުމުގައި މައިގަނޑު ގޮތެއްގައި މަޝްވަރާކުރައްވާފައިވަނީ، ދިވެހިރާއްޖެ އާއި އިންޑިއާގެ ޤާނޫނު ހަދާ މަޖިލީހުގެ މެދުގައި އެއްބާރުލުން އިތުރުކުރުމާއި، އިޤްތިޞާދީ އަދި ވިޔަފާރީގެ ގުޅުންތަކާއި، ފަތުރުވެރިކަމާއި، ސަރަޙައްދީ ހަމަޖެހުން އިތުރުކުރެވޭނެ ގޮތްތަކަާ ގުޅިގެންކަމަށް، މަޖިލީހުގެ އިދާރާއިން ހާމަކޮށްފައިވެއެވެ.
މީގެ އިތުރުން، ރާއްޖެއިން އެހީއަށްއެދޭ ކޮންމެ ފަހަރަކު ވެސް ވަގުތުން އެހީދިނުމަށް އިންޑިއާ އަބަދުވެސް އޮންނާނީ ތައްޔާރަށްކަމަށް ދަންޚާރުވަނީ ވިދާޅުވެފައެވެ.
މި ބައްދަލުކުރެއްވުމުގައި އިންޑިއާގެ ނައިބު ރައީސް އަދި ރާޖްޔާ ސަބާގެ ޗެއަރމަން ދިވެހިރާއްޖެއަށް ޒިޔާރަތް ކުރެއްވުމުގެ ދަޢުވަތު ވެސް މަޖިލީހުގެ ރައީސް ޢަބްދުއްރަޙީމް ދެއްވަވާފައި ވެއެވެ.
މި ދަތުރުފުޅުގައި މަޖިލިސް ރައީސްގެ އިތުރުން، ރައްޔިތުންގެ މަޖިލީހުގެ 9 މެންބަރުން ބައިވެރިވެވަޑައިގެންނެވިއެވެ. އެއީ ބާރަށު ދާއިރާގެ މެންބަރު އިބްރާހީމް ޝުޖާޢު، ހުޅުދޫ ދާއިރާގެ މެންބަރު މުޙައްމަދު ޝާހިދު، ހުރާ ދާއިރާގެ މެންބަރު ޑރ. އަނާރާ ނަޢީމް، ކެނދިކުޅުދޫ ދާއިރާގެ މެންބަރު މުޙައްމަދު ޢަފޫ ޙާމިދު، ކެލާ ދާއިރާގެ މެންބަރު ޢަބްދުﷲ ޝަރީފް، ހެންވޭރު އުތުރު ދާއިރާގެ މެންބަރު އަޙްމަދު އައިފާން، ކުޑަހުވަދޫ ދާއިރާގެ މެންބަރު ޙުސައިން ޙަމީދު، ގެމަނަފުށި ދާއިރާގެ މެންބަރު އަސަދުﷲ ޝިހާބް އަދި ކުރެންދޫ ދާއިރާގެ މެންބަރު މުޙައްމަދު ޝާމިން ޙަބީބެވެ.
