ޚަބަރު
އިސްލާމިކް ލީޑަރޝިޕް ޕްރޮގުރާމުގެ ބައިވެރިން ސަޢުދީއަށް ފުރައިފި
ދަތުރުގެ ބައިވެރިން/ ފޮޓޯ: މިނިސްޓްރީ އޮފް އިސްލާމިކް އެފެއާސް އެކްސް
ވޯރލްޑް އެސެމްބްލީ އޮފް މުސްލިމް ޔޫތުގައި (ވަމީ)އާއި އިސްލާމީ ކަންތައްތަކާ ބެހޭ ވުޒަރާ ގުޅިގެން އިންތިޒާމުކުރާ ޢުމްރާ ދަތުރުގެ ބައިވެރިން ސަޢުދި ޢަރަބިއްޔާއަށް ފުރައިފިއެވެ.
މި ދަތުރުގައި ދިވެހިރާއްޖެގެ ޤައުމީ ޔުނިވަރސިޓީއާއި ދިވެހިރާއްޖޭގެ އިސްލާމީ ޔުނިވަރިސިޓީގެ ޔޫނިއަން، ވިލާ ކޮލެޖް، ޒިކުރާ ކޮލެޖް، ސީއެޗްއެސްއީ، އަހުމަދިއްޔާ ސްކޫލު، ހިރާ ސްކޫލު އަދި ބައެއް ޒުވާން ޚަޠީބުން ބައިވެރިވެއެވެ.
ވޯލްޑް އެސެމްބްލީ އޮފް މުސްލިމު ޔޫތު (ވަމީ) އާއި އިސްލާމިކް މިނިސްޓްރީ ގުޅިގެން އިންތިޒާމް ކުރާ ޢުމްރާ ދަތުރުގެ ބައިވެރިން ފުރައިފި pic.twitter.com/LiyugzUvTX
— Ministry of Islamic Affairs (@MVIaffairs) February 14, 2025
މިއީ ރައީސުލްޖުމްހޫރިއްޔަ ޑރ. މުހައްމަދު މުޢިއްޒު މިއަހަރުގެ ރިޔާސީ ބަޔާނުގައި އިއުލާން ކުރައްވާފައިވާ އިސްލާމިކް ލީޑާރޝިޕް ޕްރޮގްރާމްގެ ދަށުން ކުރިއަށްދާ ދަތުރެއްކަމަށް، އިސްލާމީ ކަންތައްތަކާ ބެހޭ ވުޒާރާއިން ވިދާޅުވިއެވެ.
މިމަހުގެ 14 އިން 12 އަށް ކުރިއަށްދާ މި ސްޓަޑީ ޓުއާގައި، ޢިލްމީ ޕްރޮގުރާމުތަކުގައި ބައިވެރިވުމުގެ އިތުރުން، މައްކާ އަދި މަދީނާގެ ޚާއްސަ ތަންތަނަށް ޒިޔާރާތްކުރެވިގެން ދާނެކަމަށް އިސްލާމީ ކަންތައްތަކާ ބެހެ ވުޒާރާއިން ހާމަކުރިއެވެ.
އިސްލާމީ ކަންތައްތަކާ ބެހޭ ވުޒާރާއިން ވަނީ މިދިޔަ އަހަރު އިމާމުންނާއި ޚަޠީބުން، ސައުދީގެ އިތުރުން މިޞްރު، މެލޭޝިޔާ، ބުރޫނާއި، އިންޑޮނޭޝިޔާއަށްވެސް ތަޖުރިބާއާއި ތަމްރީނުގެ ދަތުރުކޮށްފައެވެ.
