މިސްކިތްތަކާއި، ސްކޫލުތަކާއި، ސިއްޙީ ޚިދުމަތްދޭ ތަންތަނުގެ ކުރިމަތީގައި ދުންފަތުގެ އިސްތިޢުމާލުކުރުން މަނާކޮށްފި

މިސްކިތްތަކާއި، ސްކޫލުތަކާއި، ސިއްޙީ ޚިދުމަތްދޭ ތަންތަނާއި، ބޭސްފިހާރަތަކުގެ ކުރިމަތީގައި، ދުންފަތުގެ އިސްތިޢުމާލު ކުރުމަކީ "ދުންފަތް ކޮންޓްރޯލުކުރުމުގެ އާންމު ޤަވާޢިދު"ގެ ދަށުން މަނާ ކަމެއް ކަމުގައި ނިންމަވައިފިއެވެ. 

ދުންފަތުގެ އިސްތިޢުމާލާ ދެކޮޅަށް ރާއްޖޭގެ ކަންކޮޅުތަކުގައި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. މި ފިޔަވަޅުތަކުގެ ތެރޭގައި މިމަހު 1 ވަނަ ދުވަހު ނެރުނު "ދުންފަތް ކޮންޓްރޯލްކުރުމުގެ އާންމު ޤަވާއިދު" ފާހަގަކޮށްލެވެއެވެ. މި ޤަވައިދުގައި ދުންފަތުގެ އިސްތިޢުމާލުކުރުން މަނާ ސަރަހައްދުތައް ވަނީ ވަރަށް ފުރިހަމައަށް ބަޔާންކޮށްދެއްވައިފައެވެ. 

އެގޮތުން މިސްކިތްތަކާއި ސްކޫލްތަކާއި މަދުރަސާތަކުގައާއި އެތަންތަނުގައި ހާމަކޮށް އަންނަ ބިންތަކާއި އެތަނުގެ ގޯތިތެރޭގައާއި، އެތަންތަނަށް ވަދެ ނުކުމެހަދާ ދޮރާއި، ދޮރާށީތަކުގެ އިމުން ފެށިގެން 25 ފޫޓުގެ ރޭޑިއަސްއެއްގެ ތެރޭގައި ހިމެނޭ އާންމު ތަންތަނުގައި ދުންފަތުގެ އިސްތިއުމާލުކުރުމަކީ މަނާކަމެކެވެ. ހަމައެއާއެކު ސިއްޙީ ޚިދުމަތްދޭ ތަންތަނާއި، ބޭސްފިހާރަތަކާއި، މަތީ ތަޢުލީމުދޭ ތަންތަނުގެ ދޮރުމައްޗާއި އެތަންތަނުގެ ގޯތިތެރޭގައި ދުންފަތުގެ އިސްތިއުމާލުކުރުމަކީވެސް މަނާކަމެކެވެ.

 މީގެއިތުރުން ދައުލަތުގެ އެންމެހާ އިދާރާތަކާއި ސަރުކާރު ކުންފުނިތަކާއި، ސަރުކާރު ހިއްސާވާ ކުންފުނިތަކާއި، ޤާނޫނީ ޝަޚުޞުތަކާއި، ސަރުކާރުގެ ރަސްމީ ޒިންމާ އަދާކުރާ ހުރިހާ ޢިމާރާތްތަކާއި އެތަންތަނުގެ ގޯތިތެރެއާއި، ބޭރަށް ހުންނަ ބެލްކަނިތަކާއި، އެތަންތަނުގެ ދޮރުމަތީގައިވެސް ދުންފަތުގެ އިސްތިއުމާލުކުރުން މިގަވާއިދުގެ ދަށުން މަނާކުރެއެވެ.

މުޖުތަމަޢުގައި އެކި ފަރާތްތަކަށް ޚާއްސަކޮށްފައިވާ ތަންތަނުގައިވެސް މިގަވާއިދުގެ ދަށުން ދުންފަތުގެ އިސްތިއުމާލުކުރުމަކީ މަނާކަމެކެވެ. އެގޮތުން ކުޑަކުދިންގެ ޕާކުތަކާއި، މައިޒާންތަކާއި، ޒުވާނުންގެ މަރުކަޒުތަކާއި، ކުޅިވަރުކުޅުމަށް ޚާއްސަ ތަންތަނާއި، ޚާއްސަ އެހީއަށް ބޭނުންވާ މީހުން ބަލަހައްޓާ ތަންތަނާއި އެތަންތަނުގެ ހާމައަށް އޮންނަ ބިންތަކާއި ދޮރުމަތީގައި ދުންފަތުގެ އިސްތިއުމާލުކުރުމަކީ މަނާކަމެކެވެ.

މި ޤަވާޢިދާ ޚިލާފުވެއްޖެ ނަމަ، ފުރަތަމަ ފަހަރު 1000 ރުފިޔާ، ދެވަނަ ފަހަރުނަމަ 2000 ރުފިޔާ އަދި 3 ވަނަ ފަހަރުން ފެށިގެން ކޮންމެ ފަހަރަކު 3000 ރުފިޔާގެ ޖޫރިމަނާއެއް ކުރާނެކަމަށް ސަރުކާރުން ހާމަކޮށްފައިވެއެވެ.