ދުނިޔެ
ޓްރަމްޕްގެ އުފަންދުވަސް ރަސްމީ ބަންދު ދުވަހަކަށް ހެދުމަށް އެމެރިކާގެ ކޮންގްރެސް މެންބަރަކު ހުށަހަޅައިފި

އެމެރިކާގެ ރައީސް ޑޮނަލްޑް ޓްރަމްޕް ފޮޓޯ:އިންޓަނެޓް
އެމެރިކާގެ ރައީސް ޑޮނަލްޑް ޓްރަމްޕްގެ އުފަންދުވަސް ރަސްމީ ބަންދު ދުވަހަކަށް ހެދުމަށް އެ ގައުމުގެ ކޮންގްރެސް މެންބަރަކު ހުށަހަޅައިފިއެވެ. މި ހުށަހެޅުން ހުށަހެޅީ ނިއު ޔޯކް ސްޓޭޓުން ކޮންގްރެސްއަށް އިންތިޚާބުވެފައިވާ ރިޕަބްލިކަން ޕާޓީގެ މެންބަރު ކްލޯޑިއާ ޓެނީއެވެ.
ޓެނީ ހުކުރު ދުވަހު އިޢުލާނުކުރި "އެސްޓަބްލިޝްމަންޓް އެކްޓް" ގެ ނަމުގައި ހުށަހެޅި ބިލުގައި ވަނީ ޖޫން 14 ވަނަ ދުވަސް "ޓްރަމްޕްގެ އުފަންދުވަސް އަދި އެމެރިކާގެ ފްލޭގް ޑޭ " ގެ ގޮތުގައި ރަސްމީ ބަންދު ދުވަހަކަށް ހެދުމަށް ހުށަހަޅާފައެވެ. ޖޫން 14 އަކީ ޓްރަމްޕްގެ އުފަންދުވަހުގެ އިތުރުން އެމެރިކާގެ ދިދަ ދުވަސް ކަމަށްވާތީ، މި ދެ ދުވަސް އެއްކޮށްލައިގެން ރަސްމީ ބަންދު ދުވަހަކަށް ހެދުމަށް ވަނީ ހުށަހަޅާފައެވެ.
ޓެނީ ނެރުނު ނޫސް ބަޔާނުގައި ބުނެފައިވަނީ މި ބިލު ފާސްވެއްޖެނަމަ، ޓްރަމްޕްގެ އުފަންދުވަހާއި ދިދަ ދުވަސް ދާއިމީ ގޮތެއްގައި ރަސްމީ ބަންދު ދުވަހެއްގެ ގޮތުގައި ޤާނޫނުގައި ހިމެނިގެންދާނެ ކަމަށެވެ. އަދި މިއީ އެމެރިކާގެ ކުރިއެރުމަށް ޓްރަމްޕް ކޮށްދެއްވި ޚިދުމަތްތަކާއި އެމެރިކާގެ ދިދައިގެ މުހިންމުކަން ދާއިމީ ގޮތެއްގައި ޤާނޫނުގައި ހިމެނުމަށް އެޅޭ ފިޔަވަޅެއް ކަމަށް ޓެނީ ވަނީ ބުނެފައެވެ.
މި ބިލު ހުށަހެޅުމާއެކު، އެމެރިކާގެ ނޭޝަނަލް ޕާކް ސަރވިސްއިން ވަނީ ސްޓޯންވޯލް ނޭޝަނަލް މޮނިއުމަންޓްގެ ވެބްސައިޓުން ޓްރާންސްޖެންޑަރ މީހުންނާ ގުޅޭ މަޢުލޫމާތުތައް ނަގާފައެވެ. މިކަމާ ގުޅިގެން ގިނަ ފާޑުކިޔުންތަކެއް އަމާޒުވަމުންދާއިރު، ޓްރަމްޕްގެ އުފަންދުވަސް ރަސްމީ ބަންދު ދުވަހަކަށް ހެދުމުގެ މައްސަލައަކީވެސް ޚިޔާލު ތަފާތުވެފައިވާ މައްސަލައެއް ކަމަށް ވަނީ ފާހަގަކުރެވިފައެވެ.