Ads by Exprox

ޚަބަރު

ކުޑަކުދިން ކުށަށް އަރައިގަންނަ ސަބަބުތައް ދެނެގަތުމަށް ދިރާސާއެއް ފަށައިފި

ކުޑަކުދިން ކުށަށް އަރައިގަންނަ ސަބަބުތައް ދެނެގަތުމަށް ދިރާސާއެއް ފަށައިފި

ރާއްޖޭގައި ކުއްކުރާ ފަރާތްތައް ހައްޔަރު ކުރުން ފޮޓޯ:ޕީއެސްއެމް

އާމިނަތު ޔުމްނާ

އާމިނަތު ޔުމްނާ

15 ފެބްރުއަރީ 2025، 12:34

15 ފެބްރުއަރީ 2025، 12:34

ކުޑަކުދިން ކުށަށް އަރައިގަންނަން މެދުވެރިވާ ސަބަބުތައް ދެނެގަތުމަށް ދިރާސާއެއް ކުރުމުގެ މަސައްކަތް ޑިޕާޓްމަންޓް އޮފް ޖުވެނައިލް ޖަސްޓިސްއިން ފައްޓަވައިފިއެވެ. މި ދިރާސާގެ މަސައްކަތް މިއަހަރުގެ ތެރޭގައި ނިންމައި ޝާއިޢުކުރުމަށް މަސައްކަތްކުރަމުންދާ ކަމަށް އެ ޑިޕާޓްމަންޓުން މަޢުލޫމާތު ދެއްވާފައިވެއެވެ.

ރާއްޖޭގައި ކުށަށް އަރައިގަންނަ ކުދިންގެ ޢަދަދު ކަންބޮޑުވާ މިންވަރަށް އިތުރުވަމުންދާއިރު، ކުދިން އެފަދަ ނޭދެވޭ ކަންކަން ކުރުމަށް މެދުވެރިވާ ސީދާ ސަބަބުތައް ބެލުމަށް މީގެކުރިން ރަސްމީ ސިފައެއްގައި ދިރާސާއެއް ކުރެވިފައި ނުވާކަން ފާހަގަކުރެވެއެވެ. ނަމަވެސް 2020 ވަނަ އަހަރު ޢަމަލުކުރަން ފެށި ކުޑަކުދިންގެ ޢަދުލުގެ ޤާނޫނުގެ ދަށުން ޑިޕާޓްމަންޓް އޮފް ޖުވެނައިލް ޖަސްޓިސްގެ މައްޗަށް މިފަދަ ދިރާސާއެއް ކުރުމަށް ލާޒިމްކުރެއެވެ.

ޕީއެސްއެމްނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ޑިޕާޓްމަންޓް އޮފް ޖުވެނައިލް ޖަސްޓިސްގެ ސޯޝަލް ސަރވިސް ކޯޑިނޭޓަރ ޙައްވާ ޒިމްނާ ވިދާޅުވީ، މި ދިރާސާގެ މަސައްކަތް ކުރުމަށް އިސްލާމިކް ޔުނިވަރސިޓީ އޮފް މޯލްޑިވްސްއާއެކު އެއްބަސްވުމަކަށް އާދެވިފައިވާ ކަމަށެވެ. އަދި ޕްރޮޕޯސަލްގެ މަސައްކަތް މިހާރު ނިމި، ފަންޑިންގ ހޯދުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.

އަޅުގަނޑުމެންނަށް އެނގިގެން މީގެކުރިން ނެތް މިފަދަ ދިރާސާއެއް ކުރެވިފައި. އެހެންނަމަވެސް މި ޤާނޫނުން މިކަން ކުރުމަށް ލާޒިމްކުރޭ. އެގޮތުން އައިޔޫއެމްއާއެކު ކުރެވޭ މަސައްކަތުން މިހާރު ޕްރޮޕޯސަލްގެ މަސައްކަތް ނިމިއްޖެ. އަދި މިއަހަރުގެ ތެރޭގައި މި ދިރާސާގެ މަސައްކަތް ނިންމާ ޕަބްލިޝްކުރެވޭނެކަމަށް މި އުއްމީދުކުރަނީ

 ޒިމްނާ 

ކުޑަކުދިން ކުށަށް އަރައިގަތުން އިތުރުވަމުންދާއިރު، ގަސްތުގައި ކުދިން ބޭނުންކޮށްގެން ކުށްކުރާ ފަރާތްތައް މުޖުތަމަޢުގައި ތިބިކަން ކަމާ ބެހޭ ފަރާތްތަކުން ފާހަގަކުރައްވައެވެ. ޚާއްޞަކޮށް މަސްތުވާތަކެތީގެ ވިޔަފާރީގައި 18 އަހަރުން ދަށުގެ ކުދިން ޝާމިލުކޮށްގެން ކުށަށް އަރައިގަންނަމުންދާކަން ކަމާ ބެހޭ އިދާރާތަކުން ފާހަގަކުރައްވައެވެ.

ކުޑަކުދިންގެ ޢަދުލުގެ ޤާނޫނުގެ ދަށުން، ކުށަށް އަރައިގަންނަ ކުދިންނާއި، ކުށަށް އަރައިގަތުމުގެ ފުރުޞަތު އޮތް ކުދިން އެފަދަ ކަންކަމުން ރައްކާތެރިކުރުމުގެ ޒިންމާ ކަމާއި ގުޅުންހުރި ހުރިހާ މުވައްސަސާއެއްގެ މައްޗަށް މަތިކުރެއެވެ. އެހެންކަމުން ކުދިން މިފަދަ ކުށަށް އަރައިގަންނަން ޖެހޭ ސަބަބުތައް ދެނެގަނެ އެކަންކަން ހުއްޓުވުމަށް މި ޤާނޫނު ބާރުއަޅުއްވައެވެ.
                    

މި ލިޔުން ކިޔާލުމުން

Ads by MSS