ބުރުނީ ގޮނޑުދޮށް ހިމާޔަތްކުރުން ނިމުމަކާ ގާތްވެއްޖެ

ކޮޅުމަޑުލު ބުރުނީ ގޮނޑުދޮށް ހިމާޔަތް ކުރުމުގެ މަސައްކަތް ނިމުމަކާއި ގާތަށް ހިނގައްޖެއެވެ.

މި މަސައްކަތުގެ 92 އިންސައްތަ ނިމިފައިވާކަމަށް އެމްޓީސީސީއިން ވިދާޅުވެއެވެ. ހަމައެހެންމެ، މި މަޝްރޫޢުގެ ދަށުން ރަށުގެ ބޭރުތޮށި ލުމާއި ރިވެޓްމެންޓް ޖެހުމުގެ މަސައްކަތް މިހާރު ނިމިފައިވާކަމަށް ވެސް އެ ކުންފުނިން މަޢުލޫމާތުދެއްވައެވެ. 

މި މަޝްރޫއުގެ މަސައްކަތުގެ ދަށުން ކޮނުމާއި ގޮނޑުދޮށަށް ވެލި އެޅުމުގެ މަސައްކަތް ވެސް މިހާރު ނިމިފައިވާއިރު، މިއީ ހައުސިންގ މިނިސްޓްރީން 2022 ސެޕްޓެމްބަރު 23 ގައި އެމްޓީސީސީ އާ ހަވާލުކުރި މަސައްކަތެކެވެ.  މި މަޝްރޫޢުގެ ޢަމަލީ މަސައްކަތް 2022 ވަނަ އަހަރުގެ ނޮވެމްބަރ މަހު އެމްޓީސީސީއިން ފައްޓަވައިފައިވެއެވެ. 

ރަށް ގިރުމުގެ މައްސަލަ ހައްލުކުރުމަށްޓަކައި 21,181.80 ކިއުބިކް މީޓަރުގެ ވެލި، ގިރާ ސަރަހައްދަށް އެޅުމާއި 369 މީޓަރުގެ ބޭރުތޮށި ލުމަށް، މި މަޝްރޫޢުގެ ތެރެއިން 28.8 މިލިއަން ރުފިޔާ ވަނީ ޚަރަދުކުރެވިފައެވެ. މީގެއިތުރުން، 220 މީޓަރުގެ ރިވެޓްމަންޓް ގާއިމުކޮށް ބީޗް ރިޕްލެނިޝްކުރުން ވެސް މި މަޝްރޫޢުގައި ހިމެނޭކަމަށް އެމްޓީސީސީން ވިދާޅުވެއެވެ.