ފުރުސަތަކީ މާދަމާއެއް ނޫން، މިއަދު - ޑރ. އާދަމް ޝަމީމް

ފުރުސަތަކީ މާދަމާއެއް ނޫންކަމަށާއި، މިއަދުގެ ވަގުތުކޮޅުގެ ބޭނުން ރަނގަޅު ގޮތުގައި ހިފުމުގެ މުހިންމުކަމާ ބެހޭގޮތުން ޑރ. އާދަމް ޝަމީމް ވަނީ ރޭގަ ހުޅުމާލެ ފޭސް 2 ގެ ރުއްގަނޑު 3 ގައި މުހިންމު ދަރުސެއް ދެއްވާފައެވެ.

ޑރ. ޝަމީމް ވިދާޅުވި ގޮތުގައި، މާތްﷲ ސުބުޙާނަހޫ ވަތަޢާލާ އިންސާނުންނަށް ވަރަށް ގިނަ ފުރުސަތުތައް ދެއްވާފައިވާ ކަމަށާއި، ނަމަވެސް މި ފުރުސަތުތައް ވަނީ މިންކުރެވިފައެވެ. އަޅުގަނޑުމެން އަޅުގަނޑުމެންގެ ނަފްސާއި، ކާއިނާތާއި، ކައުނުގައި ހިނގަމުންދާ ކަންތައްތަކާމެދު ވިސްނައި ފިކުރުކުރާނަމަ، އަޅުގަނޑުމެންނަށް މިވަނީ ވަކި ފުރުސަތެއް ދެއްވާފައިކަން އެނގޭނެ ކަމަށް އެބޭފުޅާ ވިދާޅުވިއެވެ.

އަޅުގަނޑުމެންނަށް މާތްﷲ ކަނޑައަޅުއްވައި، މިންކުރައްވައި، އިންކުރައްވާފައިވާ އަޖަލު އެ ފުރުސަތު ވަނީ ވަރަށް ފުރިހަމައަށް ނިންމަވާފައެވެ. އެއަކަށް އިސްވުމެއް، ފަސްވުމެއް، އިތުރުވުމެއް، މަދުވުމެއް ނާންނާނެއެވެ

 ޑރ. ޝަމީމް 

ޑރ.ޝަމީމް އިތުރަށް ވިދާޅުވި ގޮތުގައި، އަޅުގަނޑުމެންނަށް އޮތީ އަޅުގަނޑުމެންނަށް އެކަލާނގެ ދެއްވާފައިވާ މިއޮތް ހަޔާތުގައި މި ފުރުސަތުގެ ބޭނުން ހެޔޮގޮތުގައި ހިފުމެވެ. ފުރުސަތުގެ ބޭނުން ހެޔޮގޮތުގައި ހިއްޕަވައި، މަތިވެރި ފުރުސަތުގެ ބޭނުން އެއްގޮތަކަށްވެސް ބޭކާރު ކޮށްނުލުމަށް އެބޭފުޅާ ގޮވާލެއްވިއެވެ.

ޑރ. ޝަމީމް ފާހަގަކުރެއްވި ގޮތުގައި، ގިނަ މީހުން ދުނިޔަވީ ކަންކަމުގައި ވާދަކުރުމަށް އިސްކަންދޭ ކަމަށާއި، ނަމަވެސް އަޅުކަމާއި ހެޔޮ ޢަމަލުތަކުގައި ވާދަކުރުމަށް އެހާ ސަމާލުކަމެއް ނުދޭކަމަށެވެ. އަދި އަޅުގަނޑުމެންނަށް މަރުވާނެ ދުވަހެއް ނޭނގޭ ކަމަށާއި، އެހެންކަމުން މިއަދުގެ ފުރުސަތުގެ ބޭނުން ރަނގަޅު ގޮތުގައި ހިފުމަކީ މުހިންމު ކަމެއް ކަމުގައި  ވިދާޅުވިއެވެ.

މިއަދުމީ އަޅުގަނޑުމެންގެ ހަޔާތް، މިރޭ މީ އަޅުގަނޑުމެންގެ ފުރުސަތު. މިއީ ﷲ އަޅުގަނޑުމެންނަށް ހަދިޔާ ކުރެއްވި ހަޔާތަކީ. މިވަގުތުކޮޅު، މިވަގުތުކޮޅުގެ ބޭނުން ރަނގަޅު ގޮތުގައި ހިފާށޭ

ޑރ. ޝަމީމް 

މި ދަރުސް ދެއްވުމުގެ ތެރެއިން ޑރ. ޝަމީމް ވަނީ މުސްލިމުންނަށް ލިބިފައިވާ ފުރުސަތުތަކުގެ އަގު ވަޒަންކޮށް، އެ ފުރުސަތުތަކުގެ ބޭނުން ހެޔޮގޮތުގައި ހިފުމަށް ގޮވާލައްވާފައެވެ.