ދުނިޔެ
އުކާލާ އިޙްރާމް އަލުން ބޭނުންކުރަން ސަޢޫދީ އަރަބިއްޔާއިން "ދެމެހެއްޓެނިވި އިޙްރާމް" މަޝްރޫޢު ފަށައިފި

"ދެމެހެއްޓެނިވި އިޙްރާމް" މަޝްރޫޢު ފެށުން ފޮޓޯ:ސައުދީ ނިއުސް
ސަޢޫދީ ފެޝަން ކޮމިޝަނުން "ދެމެހެއްޓެނިވި އިޙްރާމް" ގެ ނަމުގައި އައު މަޝްރޫޢެއް ހުކުރު ދުވަހު އިސްލާމިކް އާޓްސް ބައިނަލްއިން ތަޢާރަފުކޮށްފިއެވެ. މި މަޝްރޫޢަކީ ދީނީ އަޅުކަންތައް ދެމެހެއްޓެނިވި ގޮތެއްގައި ކުރުމަށް އަމާޒުކޮށް، ޙައްޖު ޙާޖީންގެ އިޙްރާމު ފޮތިތައް ބޭނުންކުރާނެ އައު ގޮތްތަކެއް ހޯދުމަށް ކުރެވޭ މަސައްކަތެކެވެ.
މި މަޝްރޫޢުގެ މަޤްޞަދަކީ ޙައްޖު ޙާޖީންގެ އަތުން އެއްކުރެވޭ އިޙްރާމު ފޮތިތައް ވަކިކޮށް، އޭގެން އައު އަދި ދެމެހެއްޓެނިވި ތަކެތި އުފެއްދުމެވެ. މި މަޝްރޫޢު ކުރިއަށް ގެންދަނީ ސަޢޫދީ އިންވެސްޓްމަންޓް ރީސައިކްލިންގ ޓަދްވީމް ކުންފުންޏާ ގުޅިގެންނެވެ. ސަޢޫދީ އިންވެސްޓްމަންޓް ރީސައިކްލިންގ ކުންފުންޏަކީ ކުނި މެނޭޖްކުރުމާއި ސަރކިއުލަރ އިކޮނޮމީގެ ދާއިރާގައި ކުރިއަރާފައިވާ ކުންފުންޏެކެވެ. އަދި ޓަދްވީމަކީ ދެމެހެއްޓެނިވި ފެޝަންގެ ދާއިރާގައި އިސްދައުރެއް އަދާކުރާ ކުންފުންޏެކެވެ.
މި މަޝްރޫޢުގެ ޓެކްނިކަލް އެހީތެރިކަން ފޯރުކޮށްދެނީ ޓެކްސްޓައިލް ދާއިރާގެ ތަޖުރިބާކާރު ސަންކޯ ގްރޫޕުންނެވެ. އަދި ރީއެންޑްއަޕް ކުންފުނިން މި މަޝްރޫޢަށް އިނޮވޭޓިވް ރީސައިކްލިންގ ޓެކްނޮލޮޖީ ފޯރުކޮށްދޭނެއެވެ.
މި މަޝްރޫޢަކީ ދީނީ އަޅުކަންތައް ކުރުމުގައި ތިމާވެށްޓާ ރައްޓެހި އައު ގޮތްތަކެއް ތަޢާރަފުކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ. އަދި މި މަޝްރޫޢުގެ ސަބަބުން ޙައްޖު މޫސުމުގައި އުފެދޭ ކުނީގެ މިންވަރު މަދުކުރެވި، ތިމާވެށި ހިމާޔަތްކުރުމަށް އިތުރު ބާރެއް ލިބިގެންދާނެ ކަމަށް އުއްމީދުކުރެވެއެވެ.