އެތުލެޓިކްސް އެސޯސިއޭޝަނުން 9 މިލިއަން ރުފިޔާގެ ބަޖެޓަކާއެކު އަހަރީ ކަލަންޑަރު ފާސްކޮށްފި

އެތުލެޓިކްސް އެސޯސިއޭޝަން އޮފް މޯލްޑިވްސްއިން މިއަދު ބޭއްވި އަހަރީ އާންމު ޖަލްސާގައި މި އަހަރަށް 9 މިލިޔަން ރުފިޔާގެ ބަޖެޓަކާއެކު އަހަރީ ކަލަންޑަރު ފާސްކޮށްފިއެވެ.

ހުޅުމާލޭ އެތުލެޓިކްސް ސްޓޭޑިއަމުގައި ބޭއްވުނު މި ޖަލްސާގައި ބައިވެރިވި 12 މެންބަރު ކުލަބުގެ އިއްތިފާގުން މި ބަޖެޓާއި އަހަރީ ކަލަންޑަރު ފާސްކުރިއެވެ.

އެތުލެޓިކްސް އެސޯސިއޭޝަންގެ ޖެނެރަލް ސެކްރެޓަރީ އަޙްމަދު މުންތަގިމް ވިދާޅުވި ގޮތުގައި، އަހަރީ ކަލަންޑަރުގައި ބައިނަލްއަގުވާމީ 11 މުބާރާތެއްގައި ބައިވެރިވުމަށް ހިމަނާފައިވެއެވެ. މީގެ ތެރޭގައި މެއި މަހު ބޭއްވުމަށް ހަމަޖެހިފައިވާ ސައުތު އޭޝިއަން ގޭމްސް ހިމެނެއެވެ. މީގެ އިތުރުން، ރާއްޖޭގައި މިއަހަރު 11 ހަރަކާތެއް ބޭއްވުމަށްވެސް ކަލަންޑަރުގައި ހިމަނާފައިވާކަމަށް އެމަނިކުފާނު ވިދާޅުވިއެވެ.

ޖަލްސާގައި އެތުލެޓިކްސް އެސޯސިއޭޝަނުގެ މިދިޔަ އަހަރުގެ އަހަރީ ރިޕޯޓާއި، ޔައުމިއްޔާވެސް ވަނީ ފާސްކޮށްފައެވެ. މުންތަގިމް ފާހަގަކުރެއްވި ގޮތުގައި، މިދިޔަ އަހަރު ނިންމާލިއިރު އެސޯސިއޭޝަންގެ ލިޔެކިއުންތައް ރައްކާކުރެވިފައިވާ ގޮތާއި، ބަޖެޓުން ހޭދަކޮށްފައިވާ ގޮތް އިންޓަރނޭޝަނަލް ބެސްޓް ޕްރެކްޓިސްއާ އެއްގޮތަށް ގޮސްފައިވާކަން އޮޑިޓް ރިޕޯޓުގައި ފާހަގަކޮށްފައިވެއެވެ.

އެތުލެޓިކްސް އެސޯސިއޭޝަނުގެ ނައިބު ރައީސް އަޙްމަދު އަޒީލް ވިދާޅުވި ގޮތުގައި، މިދިޔަ އަހަރު އެ އެސޯސިއޭޝަނަށް ކުޅިވަރާ ބެހޭ ވުޒާރާ، މޯލްޑިވްސް އޮލިމްޕިކް ކޮމިޓީ (އެމްއޯސީ)، ސްޕޯޓްސް ކޮމިޝަނަރުގެ އޮފީސް އަދި ސްޕޮންސަރުންގެ ފަރާތުން ގިނަ އެހީތެރިކަން ލިބިފައިވެއެވެ. އަދި ބޮޑު ދަރަންޏެއް ނެތި މިދިޔަ އަހަރު ނިމިގެންދިޔައިރު، އެ އެސޯސިއޭޝަނުން ބަލަނީ ލިބޭ އާމްދަނީއާ އެއްވަރަށް ޚަރަދުތައް ހަމަޖެއްސުމަށް ކަމަށްވެސް އެމަނިކުފާނު ވިދާޅުވިއެވެ.