މީރާއަށް ލިބުނު އާމްދަނީ ރެކޯޑު އަދަދަކަށް އަރައިފި

މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން ހާމަކުރި ތަފާސްހިސާބުތަކުން ދައްކާގޮތުގައި 2025 ވަނަ އަހަރުގެ ޖަނަވަރީ މަހު ޑޮލަރުން ލިބުނު އާމްދަނީ 125 މިލިއަން ޑޮލަރަށް އަރާފައިވެއެވެ. މިއީ މިދިޔަ އަހަރުގެ ޖަނަވަރީ މަހާ އަޅާބަލާއިރު 17 އިންސައްތައިގެ ކުރިއެރުމެކެވެ.

މީރާގެ ތަފާސްހިސާބުތަކުން ދައްކާގޮތުގައި 2024 ވަނަ އަހަރުގެ ޖަނަވަރީ މަހު ލިބިފައިވަނީ 104 މިލިއަން ޑޮލަރެވެ. އެންމެ ބޮޑު އާމްދަނީއެއް ލިބިފައިވަނީ ޓޫރިޒަމް ގުޑްސް އެންޑް ސަރވިސް ޓެކްސް (ޓީޖީއެސްޓީ) އިންނެވެ. 2025 ވަނަ އަހަރުގެ ޖަނަވަރީ މަހު ޓީޖީއެސްޓީގެ ގޮތުގައި 69 މިލިއަން ޑޮލަރު ލިބިފައިވާއިރު، މިދިޔަ އަހަރުގެ ޖަނަވަރީ މަހު ލިބިފައިވަނީ 61 މިލިއަން ޑޮލަރެވެ.

އެހެނިހެން ޓެކްސްތަކަށް ބަލާއިރު، ޑިޕާޗަރ ޓެކްސްގެ ގޮތުގައި 2025 ގެ ޖަނަވަރީ މަހު 7.3 މިލިއަން ޑޮލަރު ލިބިފައިވާއިރު، އިންކަމް ޓެކްސްގެ ގޮތުގައި 28.9 މިލިއަން ޑޮލަރު ލިބިފައިވެއެވެ. އަދި ގްރީން ޓެކްސްގެ ގޮތުގައި 7 މިލިއަން ޑޮލަރު ލިބިފައިވެއެވެ. މި އަދަދުތަކަކީ މިދިޔަ އަހަރުގެ ޖަނަވަރީ މަހާ އަޅާބަލާއިރު އިތުރުވެފައިވާ އަދަދުތަކެކެވެ.

މީރާއިން ބުނާގޮތުގައި 2025 ވަނަ އަހަރުގެ ޖަނަވަރީ މަހު ޖުމްލަ 3.3 ބިލިއަން ރުފިޔާގެ އާމްދަނީއެއް ލިބިފައިވެއެވެ. މީގެ ތެރޭގައި ހިމެނެނީ 1.4 ބިލިއަން ރުފިޔާ އާއި 125 މިލިއަން ޑޮލަރެވެ. މި އަދަދަކީ އެ މަހު ލިބޭނެކަމަށް އަންދާޒާކޮށްފައިވާ އަދަދަށްވުރެ 5 އިންސައްތަ އިތުރު އަދަދެކެވެ.