ފައިދިގުމަކުނު ޒޮމްބީއަށް ބަދަލުކުރާ ފަންގަސްގެ ބާވަތެއް ހޯދައިފި

ޔޫރަޕުގެ ސައިންސްވެރިން ވަނީ މިހާތަނަށް ނޭނގޭ ފަންގަސް ބާވަތެއް ދެނެގަނެފައެވެ. މި ފަންގަސްގެ ބާވަތުން ހޮހަޅަތަކުގައި އުޅޭ ފައިދިގުމަކުނުތައް "ޒޮމްބީއަށް" ބަދަލުކުރެއެވެ. މި ފަންގަސްގެ ބާވަތުން ފައިދިގުމަކުނުތައް އޭގެ ހާލިން ބޭރަށް ގެންގޮސް، އަވަހަށް މަރުވުމަށް މަޖުބޫރު ކުރުވައެވެ. އަދި މަރުވެފައިވާ މަކުނުތަކުގެ ހަށިގަނޑު ބޭނުންކޮށްގެން އޭގެ ސްޕޯރތައް ފެތުރުވައެވެ.

ޖަނަވަރީ 24 ވަނަ ދުވަހު "ފަންގަލް ސިސްޓަމެޓިކްސް އެންޑް އިވޮލިއުޝަން" ޖާނަލްގައި ޝާއިޢުކުރެވުނު ދިރާސާއެއްގައި ވާގޮތުން، "ގިބެލުލާ އެޓެންބޮރޯއީ" ގެ ނަމުން ނަން ދެވިފައިވާ މި އައު ބާވަތުގެ ފަންގަސް އަމަލުކުރަނީ" އޭންޓް ޒޮމްބީ ފަންގަސް"އާއި އެއްގޮތަށެވެ. އެއީ އޭގެ ޝިކާރައަށްވާ ޖަނަވާރު، ފަންގަހުގެ ސްޕޯރތައް ފެތުރުމަށް އެންމެ އެކަށީގެންވާ ތަނަކަށް ގެންދިއުމަށް މަޖުބޫރު ކުރުވުމެވެ.

ނަމަވެސް މި ފަންގަސް ބާވަތުން މަކުނުގެ ސިކުނޑިއަށް އަސަރުކުރާ ގޮތް އަދިވެސް ވަނީ ސިއްރެއްގެ ގޮތުގައެވެ. އަދި މި ފަންގަސް ބާވަތުގެ އުސޫލުތަކާއި  ތިމާވެށްޓަށް ކުރާ އަސަރާ ގުޅޭގޮތުން ގިނަ ސުވާލުތަކެއް އުފެދިފައިވެއެވެ. މި ހޯދުމުން ޖަނަވާރުތަކުގެ ކޮންޓްރޯލް ހޯދާ ފަންގަސް ބާވަތްތަކާ ބެހޭގޮތުން އިތުރަށް ދެނެގަތުމަށް އައު ދޮރުތަކެއް ހުޅުވި، އަދި ހޯދިފައިނުވާ ފަންގަސް ބާވަތްތަކުގެ ތަފާތު ކަން ހާމަވެގެންދާކަމަށް ދިރާސާކުރި ފަރާތްތަކުން ބުނެފައިވެއެވެ.

މި ދިރާސާގެ މައިގަނޑު ފަރާތްކަމުގައިވާ އަރައުޖޯ ވިދާޅުވި ގޮތުގައި އޭނާގެ ޓީމުން މަކުނުތަކަށް އަސަރުކުރާ ފަންގަސް ބާވަތްތަކާ ބެހޭގޮތުން އިތުރަށް ދިރާސާކުރުމަށް ރާވާފައިވެއެވެ. މިގޮތުން މި ބާވަތްތަކުގެ ގުޅުމާއި، އަސްލާއި، އުފެދިފައިވާ ގޮތް އަދި އިތުރު ކަންކަން ދެނެގަތުމަށް މަސައްކަތްކުރާނެއެވެ. މި ފަންގަސް ބާވަތްތަކާ ބެހޭގޮތުން އިތުރަށް ދެނެގަތުމުން ދަނޑުވެރިކަމުގައި ބޭނުންކުރެވިދާނެ ގޮތްތަކާއި އަދި އިންސާނުންގެ ބޭސްވެރިކަމުގައިވެސް ބޭނުންކުރެވިދާނެ ގޮތްތަކެއް ހޯދިދާނެކަމަށް އަރައުޖޯ ވިދާޅުވިއެވެ.

މަކުނެއްގެ އަމަލުތައް ކޮންޓްރޯލް ކުރެވޭ ފަންގަހަކުން މަކުނުގެ ސިކުނޑިއަށް ދޫކުރާ ކެމިކަލްތަކަކީ ކޮބައިކަން ވިސްނާލާ. މިއީ އަލްޒައިމާސް އަދި ސިކުނޑިއަށް އަސަރުކުރާ އެހެނިހެން ބަލިތަކަށް އިންގިލާބީ ހައްލެއް ގެނެސްދޭނެ ކަމެއް ކަމަށް ވެދާނެ. އެހެންވީމާ މިކަމުގައި އުއްމީދު އެބައޮތް

އަރައުޖޯ 

މި ހޯދުމަކީ ދުނިޔޭގެ ދިރޭތަކެތީގެ ނިޒާމުގައި އަދިވެސް ހޯދިފައިނުވާ އެތައް ސިއްރުތަކެއް ހުރިކަން ހާމަކޮށްދޭ ކަމެކެވެ. ޚާއްޞަކޮށް ފަންގަސް ބާވަތްތަކުގެ ތެރޭގައި އަދިވެސް ދެނެގަންނަން ޖެހިފައިވާ އެތައް ބާވަތެއް ހުރިކަން މި ދިރާސާއިން ދައްކުވައިދެއެވެ. މީގެ އިތުރުން، މި ފަދަ ހޯދުންތަކުން ޖަނަވާރުތަކުގެ އަމަލުތަކަށް އަސަރުކުރާ ގޮތްތަކާއި، ދިރޭތަކެތީގެ ނިޒާމުގެ ބައިތަކުގެ މެދުގައި އޮންނަ ގުޅުމާ ބެހޭގޮތުން އިތުރު މަޢުލޫމާތު ލިބިގެންދާނެއެވެ.

މި ދިރާސާގެ ނަތީޖާތަކުން ދައްކުވައިދެނީ ދިރޭތަކެތީގެ ނިޒާމުގެ ތެރޭގައި ހިނގާ ކަންކަމުގެ ސިއްރުތައް ހޯދުމަށް އަދިވެސް ގިނަ މަސައްކަތްތަކެއް ކުރަން ޖެހޭކަމެވެ. އަދި މިފަދަ ހޯދުންތަކުން އިންސާނުންނަށް ފައިދާކުރަނިވި ކަންކަން ހޯދުމަށް މަގުފަހިވެގެންދާނެކަމަށް ސައިންސްވެރިން އުއްމީދުކުރެއެވެ. ޚާއްޞަކޮށް ބޭސްވެރިކަމުގެ ދާއިރާގައި މިފަދަ ހޯދުންތަކުން އާ ހޯދުންތަކެއް ހޯދުމަށް މަގުފަހިވެގެންދާނެކަމަށް ބެލެވެއެވެ.