އިމްޕޯޓު ޑިއުޓީ ދަށްވުމާއި ޗައިނާއާއެކު ވެފައިވާ އެއްބަސްވުމާ ގުޅުމެއް ނެތް: އިޤްތިޞާދީ ވަޒީރު

އިމްޕޯޓު ޑިއުޓީ ދަށްވުމާއި ޗައިނާއާއި ރާއްޖެއާ ދެމެދު ސޮއިކޮށްފައިވާ މިނިވަން ވިޔަފާރީގެ އެއްބަސްވުމާ ގުޅުމެއް ނެތް ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުހައްމަދު ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ، އަހާ ފޯރަމުގައި ވާހަކަފުޅު ދައްކަވަމުންނެވެ.

މިއަހަރުގެ ޖެނުއަރީން ފެށިގެން މިހާތަނަށް 1 ބިލިއަން ރުފިޔާގެ މުދާ ޗައިނާއިން އެތެރެކޮށްފައިވޭ. މީގެ ސީއައިއެފް ވެލިއު އަކީ 34 މިލިޔަން ރުފިޔާ. އޭގެތެރެއިން އެފްޓީއޭގެ ލުއި ލިބިފައިވަނީ 2.3 މިލިޔަން ރުފިޔާ. އެއީ ޖުމްލަ އިމްޕޯޓުގެ 1 އިންސަންތަ. އެހެންވީމަ ޑިއުޓީ ދަށްވުމާއި އެފްޓީއޭއަކާއި ގުޅުމެއް ނެތް

ވަޒީރު ސަޢީދު 

ރާއްޖެއާއި ޗައިނާއާ ދެމެދު ސޮއިކޮށްފައިވާ މިނިވަން ވިޔަފާރީގެ އެއްބަސްވުމަށް ޢަމަލުކުރަން ފަށާފައިވަނީ މިއަހަރުގެ ޖެނުއަރީ މަހުއެވެ. މި އެއްބަސްވުމުގެ ދަށުން ރާއްޖެއިން ބޭރުކުރާ ކަނޑުމަހުގެ ބާވަތްތަކަށް ޗައިނާއިން ޑިއުޓީ މަޢާފުވެގެންދާއިރު، ކަނޑައެޅިފައިވާ މުދާތަކުން ޗައިނާއިން ރާއްޖެ އެތެރެކުރާ މުދާތަކުންވެސް ޑިއުޓީ މަޢާފުވެއެވެ.

ވަޒީރު ސަޢީދު ވިދާޅުވީ މިއަހަރުގެ މިހާތަނަށް ޗައިނާއިން 1 ބިލިޔަން ރުފިޔާގެ މުދާ ރައްޖެއަށް އެތެރެކޮށްފައިވާ ކަމަށާއި، އޭގެ ތެރެއިން މިނިވަން ވިޔަފާރީގެ އެއްބަސްވުމުގެ ދަށުން ލުއި ލިބިފައިވަނީ އެންމެ 2.3 މިލިޔަން ރުފިޔާ ކަމަށެވެ. މިއީ ޖުމްލަ އިމްޕޯޓުގެ އެންމެ 1 އިންސައްތަ ކަމަށް ވަޒީރު ފާހަގަކުރެއްވިއެވެ.

މިއެއްބަސްވުމުގެ ފައިދާއާ ގުޅޭގޮތުން ވާހަކަފުޅު ދައްކަވަމުން ވަޒީރު ވިދާޅުވީ ރާއްޖެއަކީ އިމްޕޯޓަށް ބަރޯސާވާ ޤައުމަކަށްވާއިރު މިފަދަ އެއްބަސްވުންތަކުގެ ސަބަބުން މީގެ އެންމެ ބޮޑު ފައިދާއެއް ވާނީ ރައްޔިތުންނަށް ކަމަށެވެ. އަދި ވިޔަފާރިތަކަށް ލުއިކޮށްދީ ތަކެތީގެ އަގު ހިފެހެއްޓުމަކީ، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ އެންމެ އަސާސީ އެއް ވިސްނުންކަމަށްވެސް ވަޒީރު ސަޢީދު ވިދާޅުވިއެވެ.

މި މަސައްކަތް މިހާރު މޯލްޑިވްސް އިންޑަސްޓްރިއަލް ފްރީޒޯން ކުންފުނި މެދުވެރިކޮށް ކުރިއަށްގެންދާ ކަމަށްވެސް އިޤްތިޞާދީ ވަޒީރު ވަނީ ފާހަގަކުރައްވާފައެވެ.