މާލޭގެ މަގުތަކުން 235 އުޅަނދު ނަގައިފި

މާލޭގެ މަގުތަކުގައި ދިގު މުއްދަތަކަށް ބޭނުންނުކޮށް ދޫކޮށްލާފައި ހުރި އުޅަނދުތައް ނެގުމުގެ މަސައްކަތް  މޯލްޑިވްސް ޕޮލިސް ސަރވިސްއިން ވަނީ ކުރިއަށް ގެންގޮސްފައެވެ. މި މަސައްކަތުގެ ދަށުން ޖުމްލަ 235 އުޅަނދެއް ވަނީ ޓޯވ ކުރެވިފައެވެ.

މޯލްޑިވްސް ޕޮލިސް ސަރވިސްއިން މަޢުލޫމާތު ދެއްވިގޮތުގައި، ނެގުނު އުޅަނދުތަކުގެ ތެރޭގައި ހިމެނެނީ 201 ސައިކަލާއި، ހަތަރު ފުރޮޅުލީ 31 އުޅަނދާއި އަދި 3 ބައިސްކަލެވެ. މި މަސައްކަތަކީ މާލޭގެ މަގުތަކުގައި ޓްރެފިކް ޖެމްވުން ކުޑަކޮށް، މަގުތައް ސާފުކޮށް ބެލެހެއްޓުމަށްޓަކައި ކުރެވުނު މަސައްކަތެއްކަމަށް ފުލުހުން ވިދާޅުވިއެވެ.

މާލޭގެ މަގުތަކުގައި ދިގު މުއްދަތަކަށް ބޭނުންނުކޮށް ދޫކޮށްލާފައި ހުރި އުޅަނދުތައް ނެގުމުގެ މަސައްކަތް މިއަދު ވަނީ ކޮށްފަ. މި މަސައްކަތުގެ ދަށުން ޖުމްލަ 235 އުޅަނދެއް ވަނީ ޓޯވ ކޮށްފަ. މީގެ ތެރޭގައި ހިމެނެނީ 201 ސައިކަލު، ހަތަރު ފުރޮޅުލީ 31 އުޅަނދު އަދި 3 ބައިސްކަލު. pic.twitter.com/G0vqeiiGp0

— Maldives Police (@PoliceMv) February 15, 2025

އެއްގަމު ދަތުރުފަތުރަށާއި ހިނގާ މީހުންނަށް އުނދަގޫވާ ގޮތަށް ގިނަ ދުވަސްތަކެއްވަންދެން މާލޭގެ މަގުމަތީގައި ގަވާއިދާ ހިލާފަށް ބަހައްޓާފައި ހުރި އުޅަނދުތައް ނެގުމަށް މޯލްޑިވްސް ޕޮލިސް ސަރވިސް  ޚާއްސަ މަސައްކަތްތަކެއް ކުރެއެވެ.

މިކަމާ ގުޅޭ ގޮތުން ފުލުހުން ބުނީ މާލޭގެ އެކި ސަރައްހައްދުތަކުގައި، ހާއްސަކޮށް ކާރުބާރު ބޮޑުވާ ސަރަހައްދުތަކުގައި ގަވާއިދާ ހިލާފަށް ބަހައްޓާފައި ހުންނަ އުޅަނދުތަކާއި ގިނަ ދުވަސްވަންދެން ބަހައްޓާފައި ހުންނަ، ބާވެ ހަލާކުވެފައިވާ އުޅަނދުތައް ނެގުމަށް ހަމަޖެހިފައިވާ ކަމަށެވެ. އަދި ރަޖިސްޓްރީ ނުކޮށް ބަހައްޓާފައި ހުންނަ އުޅަނދުތައް ނެގުމުގެ މަސައްކަތް އެކި ދުވަސްމަތިން ފުލުހުން ކުރަމުން ގެންދާނެ ކަމަށް އެ އިދާރާ އިން ހާމަކުރެ އެވެ.

މި މަސައްކަތް ފެށުމަށް ހަމަޖެހިފައިވަނީ މަގުމަތީގެ ކާރުބާރު ބޮޑުވެ ތޮއްޖެހުން އިތުރުވުމުގެ ސަބަބުން ރައްޔިތުންނަށް ކުރިމަތިވާ ދަތިތަކަށް ކޮންމެވެސް ވަރެއްގެ ހައްލެއް ހޯދައި ދިނުމުގެ ގޮތުން ކަމަށް ފުލުހުން ބުނެއެވެ.