ވިޔަފާރީގެ މުޢާމަލާތްތައް ކުރަންވާނީ އިސްލާމީ އުޞޫލުތަކުގެ ތެރެއިން އިޙްސާންތެރިކަމާއެކު: އިސްލާމިކް މިނިސްޓަރު

ރަމަޟާން މަހާއި އެނޫން މަސްމަހުގައިވެސް ވިޔަފާރީގެ މުޢާމަލާތްތައް ކުރަންވާނީ އިސްލާމީ އުޞޫލުތަކުގެ ތެރެއިން، އިޙްސާންތެރިކަމާއެކުގައިކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

"އަހާ ފޯރަމް" ގައި ރަމަޟާންމަހާއި ދިމާކޮށް ތަކެތީގެ އަގު އުފުލުމުގެ ކަންބޮޑުވުމާއި ގުޅިގެން ކުރެވުނު ސުވާލަކަށް ޖަވާބު ދެއްވަމުން ވަޒީރު ވިދާޅުވީ، އިސްލާމްދީނުގެ ހުރިހާކަމެއްވެސް ބިނާވެފައިވާ އެންމެ މުހިންމު އެއް ސިފައަކީ އިޙްސާންތެރިކަމުގެ ސިފަކަމަށެވެ.

ހުރިހާކަމެއްވެސް ބިނާވާންޖެހޭ އެންމެ މުހިއްމު ސިފައަކީ، އިޙްސާންތެރިކަމުގެ ސިފަ. އިޙްސަންތެރިކަން، ކުލުނުވެރިކަން، އަޚްވަންތަކަން. އަޚްލާޤު، އަނެއް މީހާއަށް އެހީވުން. ދަތި އުނދަގޫ ކަމެއް މެދުވެރިވެފައިވާ މީހާއަށް ކަންކަން ފަސޭހަކުރުން، އެގޮތަށް ހަމަ ވިޔަފާރީގެ ކަންކަންވެސް މިއޮންނަނީ

ވަޒީރު 

ވަޒީރު އިތުރަށް ވިދާޅުވީ ވިޔަފާރިތަކުން އަބަދުވެސް މަސައްކަތް ކުރަންޖެހޭނީ ދެ ފަރާތަށްވެސް ގެއްލުން ނުވާނެހެންކަމަށެވެ. ވަކިން ޚާއްސަކޮށް ރަމަޟާންމަހާއި ދިމާކޮށް ތަކެތީގެ އަގު އުފުލުން ހުއްޓުވުމަށް ވިޔަފާރިވެރިން ވީހާވެސް ބޮޑަށް ދީނުގެ ރިވެތި އުޞޫލުތަކުގައި ހިފެހެއްޓުމުގެ މުހިއްމުކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ ކީރިތި ޤުރުއާނުގައި ދެކަމެއްގެ މައްޗަށް މާތްﷲގެ ލަޢުނަތް ލެއްވިކަމަށް ބާވާލައްވާފައިވާ އާޔަތްތަކުގައި ހިމެނޭ އެއްކަމަކީ ވިޔަފާރިކުރުމުގައި މަކަރު ހަދާ މީހުންކަމަށެވެ. އެހެންކަމުން މިއީ ބިރު ހުރިކަމެއްކަމަށާއި ރަމަޟާން މަހަކީ އެކަކު އަނެކަކަށް އެހީތެރިވެ އެއްބާރުލުން ފޯރުކޮށްދޭ މަހަކަށް ހެދުމަށް ވަޒީރުވަނީ އިލްތިމާސްކުރައްވާފައެވެ.