ހަނގުރާމައިގައި ރަހީނުކުރެވުނު އިސްރާއީލުގެ 3 ރައްޔިތުން ހަމާސްއިން ދޫކޮށްލައިފި

ޣައްޒާގައި ހިނގަމުންދާ ހަނގުރާމައިގައި ހަމާސްއިން ބަންދުކޮށްފައިވާ އިސްރާއީލުގެ ތިން ރައްޔިތުން މިނިވަންކޮށްލައިފިއެވެ. މިއީ އިސްރާއީލާއި ހަމާސްއާ ދެމެދު ވެފައިވާ ހަނގުރާމަ މެދުކަނޑާލުމުގެ އެއްބަސްވުމުގެ ދަށުން ކުރެވުނު ހަވަނަ ބަދަލުކުރުމެވެ. މި ތިން މީހުން ދޫކޮށްލުމާ ގުޅިގެން، އިސްރާއީލުން ވަނީ 369 ފަލަސްތީނު ރައްޔިތުން ދޫކޮށްލާފައެވެ.

މިނިވަންކުރެވުނު ތިން  ރައްޔިތުންނަކީ އެމެރިކާ-އިސްރާއީލު ދެ ޤައުމުގެ ރައްޔިތެއްކަމަށްވާ ސަގުއީ ދެކެލް-ޗެން، ރަޝިޔާ-އިސްރާއީލު ދެ ޤައުމުގެ ރައްޔިތެއްކަމަށްވާ އަލެކްސާންދްރެ ޓްރޫފަނޮވް އަދި އާޖެންޓީނާ-އިސްރާއީލު ދެ ޤައުމުގެ ރައްޔިތެއްކަމަށްވާ އިއާރު ހޯންއެވެ. މި ތިން މީހުން ދޫކޮށްލީ ޣައްޒާގެ ދެކާގެ ދެކުނުގައިވާ ޚާން ޔޫނިސްގައެވެ.

މި ތިން މީހުން ދޫކޮށްލުމުގެ ކުރިން، ހަތިޔާރު ހިފައިގެން ތިބި ގިނަ އަދަދެއްގެ މީހުން ވަނީ އެ ސަރަހައްދުގައި އެއްވެފައެވެ. އަދި މަރުވެފައިވާ ކުރީގެ ހަމާސް ލީޑަރު ޔަހްޔާ ސިންވާރުގެ ގެއާ ކައިރިން މި ތިން މީހުން ދޫކޮށްލާފައިވާކަން ފާހަގަކުރެވެއެވެ.

މި ތިން މީހުން ދޫކޮށްލުމާ ގުޅިގެން، އިސްރާއީލުގެ ޖަލު ޚިދުމަތުގެ ފަރާތުން ބުނެފައިވަނީ 369 ފަލަސްތީނު ގައިދީންނާއި ހައްޔަރުކުރެވިފައިވާ މީހުން ދޫކޮށްލާފައިވާ ކަމަށެވެ. މިއީ މިހާތަނަށް ހަނގުރާމަ ހުއްޓުމުގެ އެއްބަސްވުމުގެ ދަށުން އެންމެ ގިނަ އަދަދަކަށް މީހުން ދޫކޮށްލެވުނު ފަލަސްތީނުންނެވެ.

ފަލަސްތީނު ގައިދީންގެ ޖަމްޢިއްޔާއިން ބުނެފައިވާ ގޮތުގައި، އޮކްޓޯބަރު 7 ގައި ހިނގި ހަމަލާއަށްފަހު ޣައްޒާގައި ހައްޔަރުކުރެވުނު 333 ފަލަސްތީނު ރައްޔިތުން ވަނީ އަނބުރާ ޣައްޒާއަށް ފޮނުވާލާފައެވެ. މީގެ އިތުރުން 36 ފަލަސްތީނު ރައްޔިތުން ވެސްޓް ބޭންކަށް ދޫކޮށްލާފައިވާއިރު، އޭގެ ތެރެއިން 24 މީހުން ވަނީ މިސްރަށް އަރުވާލާފައެވެ.