އަމިއްލަ ކޮލެޖުތަކުގެ ފެންވަރު ވަރަށް ގާތުން ބަލާނެކަމަށް ވަޒީރު ވިދާޅުވެއްޖެ

އަމިއްލަ ތަންތަނުގައި ކިޔަވައިދެނީ ކަނޑައަޅާފައިހުރި މިންގަނޑުތަކަށްކަން ޔަޤީންކުރުމަށް ވަރަށް ގާތުން ބަލާނެ ކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހާއި ޕީއެސްއެމް ގުޅިގެން ގެނެސްދިން "އަހާ"ގެ 4 ވަނަ ފޯރަމުގައި ވާހަކަފުޅު ދައްކަވަމުން ވަޒީރު ވިދާޅުވީ، އެ ވުޒާރާގެ އެންމެ މުހިންމު މަސްއޫލިއްޔަތަކީ ރާއްޖޭގައި ދެވޭ މަތީ ތަޢުލީމަކީ ފެންވަރު ރަނގަޅު، ރައްޔިތުން ބަލައިގަންނަ ފެންވަރެއްގެ ތަޢުލީމަކަށް ހެދުން ކަމަށެވެ.

އަޅުގަނޑުމެން ރައްޔިތުންނަށް ޔަޤީންކަން އަރުވަން، ޚާއްސަކޮށް އަމިއްލަ ކޮލެޖުތަކުގައި ކިޔަވައިދޭއިރު ކަނޑައަޅާފައިހުރި މިންގަނޑުތަކަށް، ކޮލިފިކޭޝަންގެ ތެރެއިންތޯ ކިޔަވައިދެނީ ޔަޤީންކުރުމަށް. ގޮންޖެހުންހުރި ކަމެއް ނަމަވެސް ވަރަށް ގާތުން އެކަން ބަލާނަން

ވަޒީރު 

ވަޒީރު އިތުރަށް ވިދާޅުވީ، ރާއްޖޭގެ މަތީ ތަޢުލީމު ދޭ ހުރިހާ މުއައްސަސާތަކުގެ ކިޔަވައިދިނުމުގެ ފެންވަރާއި، ސަރުކާރުން ކަނޑައަޅާފައި އޮންނަ ކޮލިފިކޭޝަން ފްރޭމްވޯކް ތެރެއިން ތަޢުލީމު ހާސިލްކުރާ ތަންތަނުގައި އެ ފްރޭމްވޯކާ އެއްގޮތަށް ޢަމަލުކުރޭތޯ ކަށަވަރުކުރަމުންދާ ކަމަށެވެ. މި މަސްއޫލިއްޔަތު އަދާކުރުމުގައި މޯލްޑިވްސް ކޮލިފިކޭޝަން އޮތޯރިޓީގެ ދައުރު މުހިންމުކަންވެސް ވަޒީރު ފާހަގަކުރެއްވިއެވެ.

ފޯރަމްގައި ޑިގްރީ ޕްރޮގްރާމްތަކަށް ސަރުކާރުން ދޭންޖެހޭ ފައިސާ ނުދެވި ލަސްވާ ސަބަބާ ގުޅޭގޮތުން ކުރެވުނު ސުވާލަކަށް ޖަވާބު ދެއްވަމުން ވަޒީރު ވިދާޅުވީ، މި މައްސަލަ ދިމާވަނީ ގިނަފަހަރު ލިޔެކިއުންތައް ހަމަނުވުމުގެ ސަބަބުން ކަމަށެވެ. އަދި ދަރިވަރުންނަށް ލިޔެކިއުންތައް ހަމަކުރުމުގެ މުހިންމުކަން ވަޒީރު ފާހަގަކުރެއްވިއެވެ.

މީގެއިތުރުން، ރާއްޖޭގައި ހުނަރުވެރި އަދި ތަޢުލީމީ ޤާބިލު ބަޔަކު އުފެއްދުމަށް އެ ވުޒާރާއިން ގިނަ މަސައްކަތްތަކެއް ކުރަމުންދާ ކަމަށާއި، މަތީ ތަޢުލީމުގެ ފުރުޞަތުތައް ބޭރުގެ ފަރާތްތަކަށް ދިނުމަށް އެކްސްޕޯޓް އެޑިއުކޭޝަންގެ ކަންކަން ކުރިއަށްދާ ކަމަށްވެސް ވަޒީރު ވިދާޅުވިއެވެ.