ފާނައާއި ހުއިފިލަނޑާ އާލާކުރުމުގެ ތަމްރީން ޕްރޮގްރާމެއް ޗައިނާގެ އެހީގައި ފަށައިފި

ޗައިނާގެ ފުޖިއާން ރިސާރޗް އިންސްޓިޓިއުޓާއި މަސްވެރިކަމާބެހޭ ވުޒާރާ ގުޅިގެން ފާނަ އަދި ހުއިފިލަނޑާ އާލާކުރުމުގެ ތަމްރީން ޕްރޮގްރާމެއް ފަށައިފިއެވެ. މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން މަޢުލޫމާތު ދެއްވިގޮތުގައި، މިއީ އެ ވުޒާރާގެ އެދިލެއްވުމަކަށް ފުޖިއާން ރިސާރޗް އިންސްޓިޓިއުޓުން ކުރިއަށްގެންދާ ތަމްރީން ޕްރޮގްރާމެކެވެ.

A high-level team from the Fujian Fisheries Research Institute has arrived to conduct a five-day training on Sea Cucumber Aquaculture, Algae Cultivation, Fish Aquaculture, and Fish Resources Conservation at K. Maniyafushi. pic.twitter.com/p9hFGF1Yrs

— Ministry of Fisheries and Ocean Resources (@MFORmv) February 15, 2025

މި ތަމްރީން ޕްރޮގްރާމްގައި ފާނަ އަދި ހުއިފިލަނޑާ އާލާކުރާނެގޮތުގެ އިތުރުން، އެ ދެ ބާވަތަށް ބޭނުންވާ ކާނާ ތައްޔާރުކުރާނެގޮތާއި، ކާނާ ބަލަހައްޓާނެގޮތް ދަސްކޮށްދޭނެކަމަށް ވުޒާރާއިން ވިދާޅުވިއެވެ. މިއީ ފާނަ އަދި ހުއިފިލަނޑާގެ ސްޓޮކް ދަށްވުމުގެ ސަބަބުން، އެ ދެ ބާވަތް އާލާކުރާނެގޮތް ދަސްކުރުމަށް ކުރިއަށްގެންދާ ތަމްރީން ޕްރޮގްރާމެއްކަމަށްވެސް އެ ވުޒާރާއިން ފާހަގަކުރެއްވިއެވެ.

މި ތަމްރީން ޕްރޮގްރާމް ކުރިއަށްގެންދަނީ ޗައިނާގެ ފުޖިއާން ރިސާރޗް އިންސްޓިޓިއުޓްގެ 6 ޕްރޮފެސަރުންނެވެ. އަދި މި ޕްރޮގްރާމްގައި މަސްވެރިކަމާބެހޭ ވުޒާރާގެ 20  ބައިވެރިން ބައިވެރިވެއެވެ.

ކ. މަނިޔަފުށީގައި ކުރިއަށްދާ މި ތަމްރީން ޕްރޮގްރާމް ދެމިގެންދާނީ 7 ދުވަހުގެ މުއްދަތަށެވެ. މިއީ މަސްވެރިކަމާބެހޭ ވުޒާރާއިން ޗައިނާއާ ގުޅިގެން މިފަދަ ތަމްރީން ޕްރޮގްރާމެއް ކުރިއަށްގެންދާ ފުރަތަމަ ފަހަރުކަން ފާހަގަކޮށްލެވެއެވެ.