ދުނިޔެ
ހުއްދަނެތި ހިންގަމުންދިޔަ "ގޯލްޑް މައިން"އެއް ފުނޑުފުނޑުވެ 48 މަރު

މާލީގެ "ގޯލްޑް މައިން" ފޮޓޯ:އިންޓަނެޓް
ހޮނިހިރު ދުވަހު މާލީގެ ހުޅަނގު ސަރަހައްދުގައި ހުއްދަނެތި ހިންގަމުންދިޔަ ގޮލްޑް މައިންއެއް ފުނޑުފުނޑުވެގެން މަދުވެގެން 48 މީހުން މަރުވެއްޖެކަމަށް އޮތޯރިޓީތަކާއި ސަރަހައްދުގެ މަސްދަރުތަކުން އޭއެފްޕީއަށް މައުލޫމާތު ދީފިއެވެ.
މާލީއަކީ އެފްރިކާގެ އެންމެ ބޮޑެތި ރަން އުފައްދާ ޤައުމުތަކުގެ ތެރެއިން ޤައުމެކެވެ. އަދި މިފަދަ މައުދަން ކޮނުމުގެ ސަރަހައްދުތަކުގައި ބިންގަނޑު ވެއްޓުމާއި އެހެނިހެން ހާދިސާތައް ގިނައިން ހިނގާ ކަމަށް ބުނެއެވެ. މާލީގެ ސަރުކާރުން މި އަގުހުރި މައުދަން ކޮނުމުގެ މަސައްކަތް ޤަވާއިދުން ބޭރުން ކުރާ ފަރާތްތައް ކޮންޓްރޯލް ކުރުމަށް ދަތިތަކާ ކުރިމަތިވަމުންދާ ކަމަށްވެސް ބުނެއެވެ.
ފުލުހުންގެ މަސްދަރަކުން ބުނި ގޮތުގައި މަރުވި މީހުންގެ އަދަދު 48 އަށް އަރާފައިވެއެވެ. އޭގެތެރެއިން ބައެއް މީހުން ފެންގަނޑަަށް ވެއްޓިފައިވާ ކަމަށާއި، އޭގެ ތެރޭގައި ކުޑަކުއްޖަކު ބުރަކަށީގައި އަޅައިގެން ހުރި އަންހެނަކުވެސް ހިމެނޭ ކަމަށް މައުލޫމާތު ލިބެއެވެ.
ސަރަހައްދުގެ އޮފިޝަލަކާއި ކެނިއެބާ ރަން މައުދަން ކޮނުމުގެ ޖަމްއިއްޔާއިންވެސް މަރުވި މީހުންގެ އަދަދު 48 ކަމަށް ކަށަވަރުކޮށްދީފައިވެއެވެ. އަދި ތިމާވެށީގެ ޖަމްއިއްޔާއެއްގެ އިސްވެރިއަކު ބުނި ގޮތުގައި މަރުވި މީހުން ހޯދުމުގެ މަސައްކަތް ދަނީ ކުރިއަށެވެ.
ހޮނިހިރު ދުވަހުގެ މި ހާދިސާ ހިނގާފައިވަނީ ކުރިން ޗައިނާގެ ކުންފުންޏަކުން ހިންގަމުންދިޔަ، ނަމަވެސް މިހާރު އެފަރާތުން ދޫކޮށްލާފައިވާ ސަރަހައްދެއްގައި ކަމަށް މަސްދަރުތަކުން ބުނެފައިވެއެވެ.
މިއަހަރުގެ ޖެނުއަރީ މަހު މާލީގެ ދެކުނުގައި ހުރި ރަން މައުދަނެއްގައި ބިންގަނޑު ވެއްޓިގެން މަދުވެގެން 10 މީހުން މަރުވެ، ގިނަ އަދަދެއްގެ މީހުން ގެއްލިފައިވެއެވެ. އޭގެ ގިނަ މީހުންނަކީ އަންހެނުންނެވެ. އަދި މީގެ އަހަރެއްހާ ދުވަސް ކުރިން ހޮނިހިރު ދުވަހުގެ ހާދިސާ ހިނގި ސަރަހައްދުގައި ހުރި ރަން މައުދަނެއްގެ ބިމުއަޑީގެ މަގެއް ވެއްޓިގެން 70 އަށްވުރެ ގިނަ މީހުން މަރުވެފައިވެއެވެ.