އެއް ކިލޯއަށް ވުރެން ގިނަ މަސްތުވާތަކެއްޗާއެކު މީހަކު ހައްޔަރުކޮށްފި

މާލޭގައި ހިންގި މަސްތުވާތަކެތީގެ އޮޕަރޭޝަނެއްގައި އެއް ކިލޯއަށް ވުރެން ގިނަ މަސްތުވާތަކެއްޗާއެކު މީހަކު ހައްޔަރުކޮށްފިއެވެ.

މި އޮޕަރޭޝަންގައި ހައްޔަރުކުރީ އުމުރުން 19 އަހަރުގެ ޒުވާނެކެވެ.

މިދިޔަ ހުކުރު ދުވަހު ފުލުހުންގެ ކައުންޓަރ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި މި އޮޕަރޭޝަނުގައި ހައްޔަރުކޮށްފައިވަނީ މއ. ހިތްތަލަވިލާ / މާލެ، މުޙައްމަދު ކިޔާން އަޙްމަދު ނާޠިމެވެ.

ފުލުހުން މަޢުލޫމާތުދީފައިވާ ގޮތުގައި މީނާ ހައްޔަރުކޮށްފައިވަނީ މާލޭގެ ރެސްޓޯރެންޓެއްގެ ތެރެއިންނެވެ. އަދި އޭނާގެ އަތުން ފެނުނު މަސްތުވާތަކެތީގެ ވަގުތީ ބަރުދަން 1 ކިލޯއަށް ވުރެން ގިނަކަމަށް ވެސް ހާމަކޮށްފައިވެއެވެ.

މި އޮޕަރޭޝަންގައި ހައްޔަރުކުރި ކިޔާންގެ ބަންދާމެދު ގޮތެއް ނިންމުމަށް ކޯޓަށް ގެންދިއުމުން، 15 ދުބަހުގެ މުއްދަތަށް އޭނާ ބަންދުކުރުމަށް ކޯޓުން ވަނީ އަމުރުކޮށްފައެވެ. 

ފުލުހުން ހާމަކޮށްފައިވާ ގޮތުގައި މި އޮޕަރޭޝަން ހިންގާފައިވަނީ، އެ އިދާރާގެ ޑްރަގް އެންފޯސްމަންޓުގެ އެހީތެރިކަމާއެކު، ގޭންގު ކްރައިމް އެންފޯސްމަންޓުންނެވެ. 

އަދި މި މައްސަލަ އިތުރަށް ތަޙުޤީޤުކުރަމުން އަންނަކަމަށް ފުލުހުން ހާމަކޮށްފައިވެއެވެ.