މަރްމޯޝްގެ ހެޓްރިކާއެކު މެންޗެސްޓަރ ސިޓީ ގަދަ ހަތަރަކަށް

މެންޗެސްޓަރ ސިޓީ އާއި ނިއުކާސްލް ޔުނައިޓެޑު ބައްދަލުކުރި މެޗުގައި، 14 މިނެޓުގެ ތެރޭގައި އެ ޓީމުގެ އޮމަރު މަރްމޯޝް ހެދި ހެޓްރިކަކާއެކު، 4-0 ން މެޗު ކާމިޔާބުކޮށް، އިންލިޝް ޕްރިމިއަރ ލީގުގެ ގަދަ ހަރަތަށް އެ ޓީމު ޖެހިލައިފިއެވެ.

ސިޓީއިން މި މެޗަށް ނިކުތީ އެ ޓީމުން މި ފަހުން ބޮޑެތި ޓީމުތަކާއެކު ދެކޮޅަށް ކުޅުނު މެޗުތަކުން ކާމިޔާބެއް ނުހޯދިއެވެ. އެގޮތުން، ލީގުގައި އެންމެ ފަހުން ކުޅުނު މެޗުން އާސެނަލް އަތުން 5-1 އިން ބަލިވިއިރު، އޭގެ ފަހުން މިދިޔަ ހަފްތާގައި ޗެމްޕިއަންސް ލީގު ޕްލޭ-އޮފްގައި ރެއާލް މެޑްރިޑާ ބައްދަލުކުރި މެޗުން ވެސް ވަނީ 3-2 އިން ބަލިވެފައެވެ.

ނަމަވެސް، މިސްރުގެ މަރްމޯޝްގެ ތަފާތު ކުޅުމާއެކު، ރޭ ނިއުކާސްލް މެޗުގައި ސިޓީ ފެނުނީ ނުރައްކާތެރި ޓީމެއްގެ ގޮތުގައެވެ.

ޖެނުއަރީގައި ސިޓީއާ ގުޅުނު އުމުރުން 26 އަހަރުގެ މަރްމޯޝް ރޭގެ މެޗުގައި ޖެހި ފުރަތަމަ ގޯލަކީ، އެ ޓީމުގެ ގޯލްކީޕަރ އެޑަސަން ކުރިޔަށް ފޮނުވާލި ބޯޅައެއް، ނިއުކާސްލްގެ ގޯލްކީޕަރުގެ ބޯމަތިން އޮއްސާލުމަށްފަހު ކާމިޔާބުކުރި ގޯލެކެވެ. 

އަދި އޭގެ ފަސްމިނެޓު ފަހުން ސިޓީއަށް ލީޑު ފުޅާކޮށްދިނުމަށްފަހު، މަރްމޯޝް އޭނާގެ ހެޓްރިކް ފުރިހަމަކުރީ މެޗުގެ 33 ވަނަ މިނެޓުގައެވެ.

ސިޓީގެ ހަތަރުވަނަ ގޯލު ކާމިޔާބުކޮށްދިނީ ދެވަނަ ހާފުގައި ފިލް ފޮޑެންގެ ބަދަލުގައި ކުޅެން ނިކުތް މެކަޓީއެވެ. 

މި ނަތީޖާއާއެކު ތިންވަނައިގައި އޮތް ނޮޓިންހަމް ފޮރެސްޓާއި ސިޓީއާ ދެމެދު އޮތީ ތިން ޕޮއިންޓުގެ ފަރަގެކެވެ. 

މި މެޗުގައި މަރްމޯޝް ހެދި ހެޓްރިކަކީ ސިޓީގެ ތާރީހުގައި ހަތަރުވަނައަށް އެންމެ ކުޑަ ވަގުތުކޮޅެއްގެ ތެރޭގައި ހަދާފައިވާ ހެޓްރިކެވެ. އެގޮތުން އޭނާގެ ފުރަތަމަ ގޯލާއި ފަހު ގޯލާއި ދެމެދުގައި އިނީ 14 މިނެޓެވެ. 

ސިޓީއަށް ބަދަލުވުމުގެކުރިން ޖަރުމަނު ލީގުގައި ހެރީ ކޭންއަށްފަހު އެންމެ ގިނަ ގޯލު މި ސީޒަނުގައި ކާމިޔާބުކޮށްފައިވަނީ ވެސް މަރްމޯޝްއެވެ. ޖަރުމަނު ލީގުގައި އޭނާ ކުޅުނީ އެއިންޓްރެޗް ފްރެންކްފާޓަށެވެ.