ކައުންސިލްތަކާ ގުޅިގެން ޘަޤާފީ ފަތުރުވެރިކަން ކުރިއެރުވުމަށް މަސައްކަތްކުރާނެކަމަށް ވަޒީރު ޠާރިޤު ވިދާޅުވެއްޖެ

ރާއްޖޭގައި މިހާރު ކުރިއަރަމުން އަން ފަތުރުވެރިކަމުގެ ސެގްމެންޓްތަކުގެ ތެރޭގައި ޘަޤާފީ ފަތުރުވެރިކަން ހިމެނޭކަމަށާއި، މި ސެގްމެންޓު ކުރިއެރުވުމަށް އެއްބާރުލުން ދެއްވާނަން ކަމަށް ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު މުޙައްމަދު ވިދާޅުވެއްޖެއެވެ. 

ވަޒީރު މިހެން ވިދާޅުވީ ރޭގައި ބޭއްވުނު "އަހާ" ޕުރޮގުރާމުގެ 4 ވަނަ ފޯރަމުގައި ފަތުރުވެރިކަމުގެ ދާއިރާއާ ގުޅޭގޮތުން ރައްޔިތަކު ކުރެއްވި ސުވާލަކަށް ޖަވާބުދެއްވަމުންނެވެ.

ރާއްޖޭގެ ފަތުރުވެރިކަން ތަރައްޤީކޮށް ރަށްރަށުގައި ފަތުރުވެރިކަން ކުރިއެރުވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ބޮޑު އިސްކަމެއް ދެއްވާ ކަމެކެވެ. ސަރުކާރުން މި ސިނާޢަތް ތަރައްޤީކޮށް ކަނޑައެޅިފައިވާ އަމާޒުތައް ހާސިލްކުރުމަށް މަސައްކަތް ކުރަމުންދާއިރު ރަށްރަށުގައިއާއި ރާއްޖޭގެ ހުރިހާ ސަރަހައްދަކަށް ވެސް ފަތުރުވެރިކަން ފުޅާކުރުމުގެ މަސައްކަތް ދަނީ ކުރަމުންނެވެ. 

"އަހާ" ޕުރޮގުރާމުގައި، ދާދި ފަހުން ފަތުރުވެރިކަމާ ބެހޭ ވުޒާރާއާއި، ތިމާވެއްޓާ ބެހޭ ވުޒާރާ އެކޮށްލެވުނު އެއްކޮށްލެވުމާ ގުޅިގެން ވަޒީރު ޠާރިޤު ވިދާޅުވެފައި ވަނީ، އެ ދެ ދާއިރާއަކީ ވަރަށް ބޮޑަށް ގުޅިފައިވާ ދެ ދާއިރާ ކަމަށާއި، ރާއްޖެއަށް އަންނަ 65 އިންސައްތަ ފަތުރުވެރިންނަކީ ރާއްޖޭގެ ޤުދުރަތީ ހިއްގައިމުކަން ތަޖުރިބާކުރުމަށް އަންނަ ފަތުރުވެރިންނަށް ވީހިނދު، ދެމެހެއްޓެނިވި ތަރައްޤީއެއް ގެނައުމަށް ފަސޭހަވެގެން ދާނި މި ދެ ޒުޖާރާ ގުޅުވައިލައިގެން ކަމަށެވެ. 

ވަޒީރުގެ ވާހަކަކޮޅުގެ ތެރެއިން، ރާއްޖޭގެ ފަތުރުވެރިކަން ފުޅާވެގެން އަންނަ މިންވަރު ބަޔާންކުރަށްވާ، ރާއްޖެއަށް އަންނަ ޘަޤާފީ ފަތުރުވެރިންގެ އަދަދު އިތުރުވަމުންދާކަމަށް ވަޒީރު ވިދާޅުވެފައިވެއެވެ. މިގޮތުން، ދާދި ފަހުން ހުޅުމާލެ ސެންޓްރަލް ޕާކުގައި ބޭއްވުނު ރަށު އެކްސްޕޯގެ ތެރެއިން، ރަށްރަށުގެ ތާރީޚާއި، ޘަޤާފަތުގެ ވާހަކަތައް ބަޔާނޮކޮށްދިނުމަށް ރަށްރަށުން ކުރަމުން ގެންދާ މަސައްކަތް ހާމަވެގެން ދިޔަކަން ވެސް ފާހަގަކުރެވިގެންދެއެވެ.

"މިކަންކަން ކުރެވިއްޖެނަމަ އެ ރަށެއްގައި ނުވަތަ ޒޯނެއްގައި ޓުއަރިޒަމް އާލާ ކުރެވިގެންދާނެ. މިކަންތައް ކުރަން އަޅުގަނޑުމެން އެއްބާރުލުން ދޭނަން. އަޅުގަނޑު ދަންނަވާނީ ވަރަށް މުހިންމު ކަމެކޭ އެރަށެއްގެ ހުންނަ ކަންކަން ކިޔައިދީ ސަޤާފަތް ދަމަހައްޓާ އާލާ ކުރުމަކީ އެގޮތަށް ކުރެވިއްޖެއިއްޔާ އެ ރަށެއްގެ ލޯކަލް ޓުއަރިޒަމް ކުރިއަރައިގެންދާނެ. އެކަން ކުރުމަށް ސަރުކާރުން އިރާދަ ކުރެއްވިއްޔާ މަސައްކަތް ކުރާނެ"

ވަޒީރު ތޯރިޤު ވިދާޅުވިއެވެ.

ރާއްޖޭގެ ހުރިހާ ސަރަހައްދަކަށް ފަތުރުވެރިކަމުގެ މަންފާ ލިބޭގޮތަށް ކަންކަން އިންތިޒާމު ކުރުމުގެ މަސައްކަތް ސަރުކާރުން ކުރަމުންދާއިރު، އެމްއެމްޕީއާރްސީ މެދުވެރިވެ ވަކި ރަށްތައް ޕްރޮމޯޓް ކުރުމަށްވެސް ދަނީ މަސައްކަތް ކުރަމުންނެވެ. އެގޮތުން ފެއަރތަކުގައި ކައުންސިލްތައް ދަނީ ބައިވެރިކުރަމުންނެވެ.

"ހުރިހާ ރަށެއްގައި ގެސްޓު ހައުސް ހެދުމަށްކުރަންޖެހޭ ހުރިހާކަމެއް ފުރިހަމަކޮށްދޭނަން. އަތޮޅުތަކުގެ ރަށްރަށުގައި ލޯކަލް ޓޫރިޒަމް އަލާކުރުމަށް ރައީސް ޑރ. މުޙައްމަދު މުޢިއްޒު ސަރުކާރުން ވަރަށް ބޮޑު އަހައްމިއްޔަތުކަމެއްދެއްވާ."

ވަޒީރު ވިދާޅުވިއެވެ.