ވޯލްޑް ގަވަމަންޓްސް ސަމިޓު ނިންމާލެއްވުމަށްފަހު ނައިބު ރައީސް މާލެ ވަޑައިގެންފި

ދުބާއީގައި ކުރިޔަށްދިޔަ "ވޯލްޑް ގަވަމަންޓްސް ސަމިޓް 2025"ގައި ބައިވެރިވެވަޑައިގެންނެވުމަށްފަހު ރައީސުލްޖުމްހޫރިއްޔާގެ ނައިބު، އަލްއުސްތާޛު ޙުސައިން މުޙައްމަދު ލަޠީފް މާލެ ވަޑައިގެންފިއެވެ.

މި މަހުގެ 11 އިން 13 އަށް ކުރިޔަށްދިޔަ މި ސަމިޓުގެ ޕްލެނަރީ ސެޝަނާއި ގްލޯބަލް ގަވަރމަންޓް އެކްސެލެންސް އެވޯޑްގައި ރައީސުލްޖުމްހޫރިއްޔާގެ ނައިބު ވަނީ ބައިވެރިވެވަޑައިގެންފައެވެ. އަދި ސަމިޓުގެ ހަވާސާގައި ބޭއްވި ދަ ގަވަމަންޓްސް އެކްސްޕީރިއަންސް އެކްސްޗޭންޖް ފޯރަމާއި ކްލައިމެޓް ޗޭންޖް ފޯރަމްގައި ވެސް ބައިވެރިވެވަޑައިގެންނެވިއެވެ.

މީގެ އިތުރުން ރައީސުލްޖުމްހޫރިއްޔާގެ ނައިބު ވަނީ "ވޯލްޑް ގަވަމަންޓްސް ސަމިޓް 2025"ގެ ހަވާސާގައި ކުރިއަށްދިޔަ، މޫސުމަށް އަންނަ ނޭދެވޭ ބަދަލުތަކާ ބެހޭ ފޯރަމްގައި ތަޤުރީރު ކުރައްވާފައެވެ. މި ތަޤުރީރުގައި އެ މަނިކުފާނު ވިދާޅުވީ، މޫސުމީ ކާރިސާތަކަކީ އެކަންކަމަށް އަވަހަށް ތައްޔާރުވާންޖެހޭ ކަންކަންކަމަށާއި، އެއީ ސިޔާސީ މަޝްވަރާތަކަށް މަޑުކުރާނެ ކަންކަން ނޫން ކަމަށެވެ. އެގޮތުން ތޫފާނީ ބާރު ގަދަވުމަކީ އިޤްތިޞާދީ އޮއިވަރާ ގުޅިފައި އޮތް ކަމަކަމަށް ނުވާ ފަދައިން، ފިނިހޫނުމިން މަތިވުމަކީ ސަރަޙައްދީ އިމަކަށް ބަލައިގެން މެދުވެރިވާ ކަމެއް ނޫން ކަމުގައި އެ މަނިކުފާނު ވިދާޅުވިއެވެ.

މި ފޯރަމްގައި ރައީސުލްޖުމްހޫރިއްޔާގެ ނައިބުގެ އަރިހުގައި ޔޫ.އޭ.އީގެ މިނިސްޓަރ އޮފް ކްލައިމެޓް ޗޭންޖް އެންޑް އެންވަޔަރަންމަންޓް ހަރ އެކްސެލެންސީ އަމްނާ އަލް ދަހަކް އާއި ރިޕަބްލިކް އޮފް މަޑަގަސްކަރަގެ މިނިސްޓަރ އޮފް އެންވަޔަރަންމަންޓް އެންޑް ސަސްޓެއިނަބަލް ޑިވެލޮޕްމަންޓް ހިޒް އެކްސެލެންސީ މެކްސް އެންޑޯނިރީނާ ފޮންޓެއިން ބައިވެރިވެވަޑައިގެންނެވިއެވެ.

މައިގަނޑު ގޮތެއްގައި މި ފޯރަމްގެ މަޝްވަރާތައް ބިނާކޮށްފައި އޮތީ 6 ދާއިރާއަކަށެވެ. އޭގެތެރޭގައި، ހެއު ވެރިކަމާއި ޖަވާބުދާރީކުރުވުމާއި، ކުރިމަގަށާއި ދުނިޔޭގެ އިގުތިޞާދަށް ފައިނޭންސް ކުރުމާއި، މޫސުމަށް އަންނަ ބަދަލުތަކުގެ ގެއްލުން ކުޑަކުރުމާއި ވިލުންތެތި ސިޓީތަކާއި، ކުރިމަގަށްޓަކާ ރަނގަޅު މުޖުތަމަޢެއް ބިނާކުރުމާއި ޤާބިލުކަން އިތުރުކުރުމާއި ދުނިޔޭގެ ތަރައްޤީވަމުން އަންނަ ޞިއްޙީ ބަދަލުތަކާއި ކުރިމަގުގެ އައު އީޖާދީ ޓެކްނޮލޮޖީ ފަދަ ދާއިރާތައް ހިމެނެއެވެ. ތިން ދުވަހަށް ކުރިޔަށްދިޔަ މި ސަމިޓުގައި ރައީސުލްޖުމްހޫރިއްޔާގެ ނައިބުގެ އަރިހުގައި ސަރުކާރުގެ އިސް ވަފުދެއްވެސް ބައިވެރިވެވަޑައިގެންނެވިއެވެ.