މިދިޔަ ހަފްތާގައި މަސްވެރިންނަށް 34.7 މިލިއަން ރުފިޔާ

ފެބްރުވަރީ މަހުގެ ދެވަނަ ހަފްތާގައި މަސްވެރިން ކިރުވި މަހަށް ދޫކޮށްފައިވާ ފައިސާ އޭގެ ކުރީ ހަފްތާއާ އަޅާބަލާއިރު 10 އިންސައްތަ އިތުރުކަމަށް މިފްކޯގެ ތަފާސް ހިސާބުތަކުން ދައްކައިފިއެވެ.

މިދިޔަ ހަފްތާގައި 218 މަސް ދޯންޏަކަށް މިފްކޯއިން 34.7 މިލިޔަން ރުފިޔާ ދޫކޮށްފައިވާކަމަށް މިފްކޯގެ ތަފާސްހިސާބުތަކުން ދައްކައެވެ. މިއަދަދަކީ އޭގެ ކުރީ ހަފްތާގައި މަސްވެރިންނަށް ދޫކޮށްފައިވާ ފައިސާގެ އަދަދާއި އަޅާބަލާއިރު 10.8 އިންސައްތަ އިތުރު އަދަދެކެވެ. ސަރުކާރުގެ މަސް ކުންފުނީގެ ތަފާސްހިސާބުތައް ދައްކާގޮތުން ފެބްރުއަރީ މަހުގެ ފުރަތަމަ ހަފްތާގައި 31.3 މިލިޔަން ރުފިޔާ ވަނީ ދޫކޮށްފައެވެ. އަދި މިއަހަރުގެ ޖަނަވަރީ މަހު މަސްވެރިން ކިރުވާފައިވާ މަހަށް މިފްކޯއިން ވަނީ ޖުމްލަ 117 މިލިޔަން ރުފިޔާ ދޫކޮށްފައެވެ. މިއީ ހުސްވި ޑިސެންބަރުމަހާއި އަޅާބަލާއިރު 122 އިންސައްތައިގެ އިތުރުވުމެކެވެ. ޑިސެންބަރުމަހު މިފްކޯއިން މަސްވެރިންނަށް ދޫކޮށްފައިވަނީ 52 މިލިޔަން ރުފިޔާއެވެ.

މިފްކޯއިން މަސްވެރިންނަށް ދޭ ފައިސާގެ އަދަދު މިހާ ބޮޑުތަނުން އިތުރުވުމުގެ ސަބަބެއް ކަމުގައި އެ ކުންފުނިން ވިދާޅުވީ، މި ދުވަސްވަރަކީ އާދަޔާ ޚިލާފަށް ދެކުނުގެ މަސްވެރިކަން ރަނގަޅު ދުވަސްކޮޅެއްކަމަށްވުމެވެ. 

މިފްކޯއަށް ކިރުވާފައިވާ މަހުގެ އަދަދު އިތުރުވެފައިވާއިރު، މަސްވެރިން މަސް ކިރުވަން މިދިޔަ ހަފްތާގެ ތެރޭގައި މިފްކޯ ބަނދަރުތަކުގައި ކިއުވެސް ހެދިއެވެ. ނަމަވެސް، ވިދިގެން އައި ހަފްތާ ބަނދުތެރޭގައި އެ ކިއުއެއްކޮށް ވަނީ ހުސްކޮށްލާފައެވެ.

މަސްވެރިކަމާބެހޭ ވަޒީރު އަހުމަދު ޝިޔާމް ވަނީ ރާއްޖޭގެ މަސްވެރިކަން ރަނގަޅުވާ ދުވަސްވަރު މިފްކޯއަށް މަސް ކިރުވުމަށް ދޯނިތަކުން ކިއުގައި ޖެހެންޖެހޭ މައްސަލަ ހައްލުކޮށްދެއްވާ މިއަހަރަކީ މިގޮތަށް މަސްވެރިން ކިއުގައި ޖެހޭނެ އެންމެ ފަހު އަހަރުކަމުގައި ވެގެންދާނެ ކަމަށް ވިދާޅުވެފައެވެ. ހަމައެހެންމެ، ޖުމްލަގޮތެއްގައި ސިނާޢަތަށް މިހާރު ކުރިމަތިވެފައިވާ ގޮންޖެހުންތައް 3 އަހަރުގެ ތެރޭގައި ހައްލުކޮށްދެއްވާނެ ކަމަށް ވެސް ވަޒީރު ވިދާޅުވިއެވެ.