ޤައުމު ސަލާމަތްކުރާ އެއްވެސް މީހަކީ ޤާނޫނާ ޚިލާފުވެފައިވާ މީހެކޭ ބުނެގެން ނުވާނެ: ޓްރަމްޕު

ހަރުދަނާ ފިޔަވަޅުތަކެއް އަޅައި އަމިއްލަ ޤައުމު ސަލާމަތް ކުރާ އެއްވެސް މީހަކު ޤާނޫނުތަކާ ޚިލާފުވެފައިވާ ކަމަށް ކަނޑައެޅިގެން ނުވާނެ ކަމަށް ބުނެ، އެމެރިކާގެ ރައީސް ޑޮނަލްޑް ޓްރަމްޕް، ފަރަންސޭސިވިލާތުގެ ކުރީގެ އަސްކަރީ ވެރިޔާ އަދި ރަސްގެފާނު ނެޕޮލިއޮން ބޮނަޕާތު ވިދާޅުވެފައިވާ ބަސްފުޅުތަކެއް ތަކުރާރު ކޮށްފިއެވެ.

ބޮނަޕާތުގެ ބަސްތައް ޓްރަމްޕު ތަކުރާރުކޮށްފައި ވަނީ ޓްރަމްޕުގެ ސޯޝަލް މީޑިއާ ނެޓްވޯކު، ޓްރުތު ސޯޝަލްގައި ޝާއިޢުކުރެއްވި ޕޯސްޓެއްގައެވެ. "އެ މީހެއްގެ އަމިއްލަ ޤައުމު ސަލާމަތް ކުރާ މީހަކީ އެއްވެސް ޤާނޫނަކާ ޚިލާފުވެފައިވާ މީހުން ނޫން،" ޓްރަމްޕު ލިޔެފައިވެއެވެ. 

މި ބުނުމުގައި އޭނާ އިޝާރަތްކޮށްފައި އެ ވަނީ،  ރިޔާސީ ޤަރާރުތަކުގެ ބާރުގެ ދަށުން އޭނާ އަޅަމުން ގެންދާ ފިޔަވަޅުތަކަށް ކުރިމަތިވަމުންދާ ނުރުހުމާއި ފިއްތުންތަކަށް ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. ޓްރަމްޕް މި މޭރުމުން ޕޯސްޓުކުރުމާ ގުޅިގެން އޭނާއަށް ވަނީ އިތުރު ފާޑުކިޔުންތައް އަމާޒުވެފައެވެ.

އޭނާއަށް ކުރިމަތުވި ފާޑުކިޔުންތަކުގެ ތެރޭގައި، އޭނާ ވާހަކަ ވާހަކަ ދައްކާފައި އެ ވަނީ ޙަޤީޤީ ޚުދުމުހުތާރު ވެރިއެއްގެ ދުލުންކަމަށާއި، ތަކުރާރު ކޮށްފައި އެ ވަނީ، ފަރަންސޭސިވިލާތުގެ ވެރިކަން ފޭރިގަނެ، ތަޚުތައް އަމިއްލައަށް އިސްވި ބޮނަޕާތު 1804 ވަނަ އަހަރު ވިދާޅުވެފައިވާ ބަސްފުޅުތަކެއްކަން އިދިކޮޅު ޕާޓީތަކުން ވަނީ ހަނދާންކޮށްދެއްވާފައެވެ. 

ޓްރަމްޕް ގެންދަނީ، ރައީސްކަމުގެ މަޤާމުގެ ބާރު ބޭނުންކޮށް، ގިނަ ފިޔަވަޅުތަކެއް އަޅަމުންނެވެ. ނަމަވެސް، ރިޔާސީ ޤަރާރުތަކުގެ ބާރުގެ ދަށުން އޭނާ އަޅަމުން ގެންދާ ގިނަ ފިޔަވަޅުތަކަށް ވަނީ ހުރަސްތަކެއް ކުރިމަތިވެފައެވެ. ޓްރަމްޕްގެ ގިނަ ނިންމުންތައް ޤާނޫނާ ޚިލާފު ކަމުގައި ގިނަ ބަޔަކު ދަނީ ދަޢުވާ ކުރަމުންނެވެ.