މަރާމާތުގެ މަސައްކަތަށް ރަސްފަންނުގެ މޫދަށް އެރޭ ސަރަޙައްދު ބަންދުކޮށްފި

މާލޭގެ މާފަންނު އަވަށުގައި އޮންނަ ރަސްފަންނުގެ މޫދަށް އެރޭ ސަރަޙައްދު މަރާމާތުކުރުމަށްޓަކައި، ހޯމަ ދުވަހުން ފެށިގެން އެ ތަން ބަންދުކުރުމަށް މާލޭ ސިޓީ ކައުންސިލްގެ އިދާރާއިން ނިންމައިފިއެވެ.

ސިޓީ ކައުންސިލުން ހާމަކޮށްފައިވާ ގޮތުގައި ރަސްފަންނުގެ މޫދަށް އެރޭ ސަރަޙައްދު މަރާމާތުކުރުމަށް ނިންމީ އެ ސަރަޙައްދުގެ 500 އަކަމީޓަރުގެ ބޮޑުމިނުގެ ސަރަޙައްދެއްގައި އެއް ފޫޓުގެ ފުންމިނަށް ކިސަޑު ޖަމާވެފައިވާކަން ފާހަގަކުރެވިގެންނެވެ.

އެހެންކަމުން، މަރާމާތުގެ ތެރެއިން ކުރިޔަށްދާނީ ރަސްފަންނުގެ މޫދަށް އެރޭ ސަރަޙައްދުން ކިސަޑު ނަގައި، ބީޗަށް ވެލި އެޅުމުގެ މަސައްކަތްކަމަށް އެ އިދާރާއިން ވަނީ ހާމަކޮށްފައެވެ.

މި މަސައްކަތް ފެށުމަށް ހަމަޖެހިފައިވަނީ 17 ފެބުރުއަރީ 2025ވާ ހޯމަ ދުވަހުގެ ހެނދުނު 9:00ގައެވެ. 

ސިޓީ ކައުންސިލުން ބުނީ، މި މަސައްކަތް ނިމެންދެން، މި ސަރަޙައްދަށް މޫދަށް އެރުމަކީ މަނާކަމެއް ކަމަށެވެ. އަދި ބަންދުކޮށްފައިވާ ސަރަޙައްދު އެނގޭނޭހެން އެ ސަރަޙައްދުގައި ޗާޓެއް ބަހައްޓާފައި ހުންނާނެކަމަށް ވެސް ހާމަކޮށްފައިވެއެވެ.

މި މަސައްކަތާ ގުޅިގެން މާލޭ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވީ، ރަސްފަންނުގެ ވެލިގަނޑު ރަނގަޅުކުރުމަށް ބޭނުންވާ ތިމާވެށީގެ ހުއްދަ އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އިން ދޫކޮށްފައިވާކަމަށެވެ. 

އަދި ރަސްފަންނު މަރާމާތްކޮށް ބެލެހެއްޓުމުގެ ޒިންމާ މަތިކޮށްފައިވާ ފަރާތުން، އެކަށީގެންވާ ގޮތެއްގައި މަސައްކަތް ކުރިއަށް ނުގެންދެވުމުގެ ސަބަބުން، އެ ފަރާތާއެކު ވެފައިވާ އެއްބަސްވުން ބާޠިލްކޮށްފައިވާކަމަށާއި، މީގެ ފަހުން ރަސްފަންނުގެ މަރާމާތުގެ މަސައްކަތް ކުރިއަށް ގެންދާނީ، ސީދާ މާލެ ސިޓީ ކައުންސިލުންކަމަށް ވެސް މޭޔަރ ވިދާޅުވިއެވެ.

ރަސްފަންނު މަރާމާތު ކުރުމުގެ މަސައްކަތް ފެށުމަށް ނިންމާފައިވާއިރު، މިދިޔަ ހުކުރު ދުވަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރަސްފަންނަށް ވަޑައިގެން އެ ތަނުގެ ހާލަތު ބައްލަވައި، އެ ތަން ވީރާނާ ވެގެން ދާތީ އެކަމަށް ވަރަށް ބޮޑަށް ކަންބޮޑުވުން ފާޅުކުރައްވާފައިވެއެވެ.