ކުޅިވަރު
"އަހަރެންގެ ވަޒީފާ ވަރަށް ބުރަ" - މެންޗެސްޓަރ ޔުނައިޓެޑުގެ ކޯޗު އަމޮރިމް

އަމޮރިމް ބުނީ އެންމެ ބޮޑު މާޔޫސް ކަމަކީ އޭނާގެ ވަޒީފާ ނޫންކަމަށް، ފޮޓޯ: ގެޓީ އިމޭޖަސް
ހުލާސާ
ލީގުގައި ކުޅުނު 25 މެޗުން ލިބުނު 29 ޕޮއިންޓާއެކު ޔުނައިޓެޑު އޮތީ 15 ވަނައިގައި.
އިންގްލިޝް ޕްރިމިއަރ ލީގުގައި އާދިއްތަ ދުވަހުގެރޭ ޓޮޓެންހަމް ހޮޓްސްޕާރއާ ދެކޮޅަށް މެންޗެސްޓަރ ޔުނައިޓެޑު ކުޅުނު މެޗުން ބަލިވުމުން، މާޔޫސްވެފައި ހުރި ޔުނައިޓެޑުގެ ކޯޗު، ރޫބެން އަމޮރިމް ބުނީ އޭނާގެ ވަޒީފާއަކީ ވަރަށް އުނދަގޫ ވަޒީފާއެއް ކަމަށެވެ.
ޓޮޓެންހަމް ހޮޓްސްޕާރ ސްޓޭޑިއަމްގައި ކުޅުނު މި މެޗު އެ ޓީމުން ކާމިޔާބުކުރީ 1-0 އިންނެވެ.
މި މެޗާއެކު ޔުނައިޓެޑު ލީގުގައި އެންމެ ފަހުން ކުޅުނު 12 މެޗުގެ ތެރެއިން 8 މެޗުން މިވަނީ ބަލިވެފައެވެ.
މިވަގުތު ޔުނައިޓެޑުގެ ކޯޗަށް ކުރިމަތިވެފައި އޮތް އެންމެ ބޮޑު ގޮންޖެހުމަކީ ގިނަ ކުޅުންތެރިންތަކެއް އަނިޔާގައި ތިބުމެވެ. އެގޮތުން އެ ޓީމުގެ އަނިޔާވެފައިވާ ކުޅުންތެރިންގެ ލިސްޓުގައި 12 ކުޅުންތެރިއަކު އެބަތިއްބެވެ. އެހެންކަމުން އަމޮރިމްއަށް މިހާރު ޓީމުގެ ބެންޗު ވެސް ފުރަން ޖެހެނީ، ތަޖުރިބާ ދަށް، ވަރަށް ޒުވާން ކުޅުންތެރިން ހިމަނައިގެންނެވެ.
މިވަގުތު ވަރަށް ބައިވަރު މައްސަލަތައް އެބަހުރި. އަހަރެންގެ ވަޒީފާ ވަރަށް އުނދަގޫ، އެހެން ނަމަވެސް، މި ވަޒީފާގައި ދެމިހުރެ އާ އުއްމީދަކާއެކު ދެން އަންނަ މެޗަކަށް ނިކުމެ މޮޅުވުމަށް މަސައްކަތް ކުރާނަން.
މެޗަށްފަހު ސްކައި ސްޕޯޓްސްއަށް ދިން އިންޓަވިއުއެއްގައި އަމޮރިމް ބުންޏެވެ.
ރޭގެ މެޗުގައި ސްޕާސްއަށް ލީޑު ނަގައިދިނީ އެ ޓީމުގެ ސްޓްރައިކަރުގެ ފަހަތުން ކުޅުނު ޖޭމްސް މެޑިސަންއެވެ. އޭނާ މި ގޯލު ކާމިޔާބުކުރީ މެޗުގެ 13 ވަނަ މިނެޓުގައެވެ. ނަމަވެސް މެޗުގެ އިތުރުވަގުތާ ހަމައަށް، ޔުނައިޓެޑުން އެއްވެސް ބަދަލެއް ގެނަސްފައެއް ނުވެއެވެ. އިތުރު ވަގުތުގައި ކެސަމީރޯގެ ބަދަލުގައި އުމުރުން 17 އަހަރުގެ ޗިޑޯ އޮބީ ވަނީ ދަނޑަށް ނެރެފައެވެ.
ބީބީސީއަށް ދިން އިންޓަވިއުއެއްގައި އަމޮރިމް ބުނީ، އޭނާގެ ވަޒީފާއަކީ މި ދުނިޔޭގައި އޮތް އެންމެ އުނދަގޫ ވަޒީފާ ކަމަށެވެ. އަދި މެޗުގެ އިތުރު ވަގުތާ ހަމައަށް ބަދަލެއް ނުގެނަސް މަޑުކުރީ، ދަނޑު މަތީގައި އޮތް ޓީމަށް ގޯލެއް ކާމިޔާބުކުރެވޭނެ ކަމުގެ އުއްމީދު އޮތީމައި ކަމަށެވެ.
އަދި އޭނާ ބުނީ، އެންމެ ބޮޑު މާޔޫސް ކަމަކީ އޭނާގެ ވަޒީފާ ނޫން ކަމަށާއި، ނަމަވެސް ޔުނައިޓެޑު ލީގު ޓޭބަލްގައި އޮތް ހިސާބު ކަމަށެވެ.
މިހާތަނަށް ލީގުގައި ކުޅުނު 25 މެޗުން ލިބުނު 29 ޕޮއިންޓާއެކު ޔުނައިޓެޑު އޮތީ 15 ވަނައިގައެވެ.