އޮސްޓްރިއާގައި ވަޅިން ހަމަލާދިނީ އައިއެސްއަށް ނިސްބަތްވާ ސީރިއާ މީހެއް

އޮސްޓްރިއާގެ ވިލާޗް ރަށުގައި ހިނގި މާރާމާރީގައި 14 އަހަރުގެ ކުއްޖަކު މަރުވެ، އިތުރު 5 މީހުންނަށް އަނިޔާވެފައިވާ ކަމަށް އެ ގައުމުގެ ފުލުހުން ބުނެފިއެވެ. މި ހަމަލާ ދިނުމަށް ޝައްކުކުރެވޭ ސީރިއާގެ ހިޖުރަވެރިއަކީ އިންޓަނެޓް މެދުވެރިކޮށް ހަރުކަށި ފިކުރަށް ތާއީދުކުރާ މީހަކަށް ވެފައިވާ ކަމަށް ބެލެވޭ ކަމަށް އޮތޯރިޓީތަކުން ބުނެފިއެވެ.

އެތެރޭގެ ވަޒީރު ގެރްހާޑް ކާނަރ ވިދާޅުވީ، ހަމަލާ ދިން ފަހުން ހައްޔަރުކުރެވުނު 23 އަހަރުގެ ސީރިއާގެ މީހާ އިންޓަނެޓް މެދުވެރިކޮށް  ހަރުކަށި ފިކުރަށް ތާއީދުކުރާ މީހަކަށް ވެފައިވާ ކަމަށާއި، އޭނާގެ އެޕާޓްމަންޓުން އިސްލާމިކް ސްޓޭޓް (އައިއެސް) ގެ ދިދަ ފެނިފައިވާ ކަމަށެވެ. އޭނާ އައިއެސްއަށް ވަފާތެރިވުމުގެ ހުވާ ކޮށްފައިވާ ކަމަށްވެސް އޮތޯރިޓީތަކުން ބުނެފިއެވެ.

މި ހާދިސާ ހިނގާފައިވަނީ އޮގަސްޓް މަހު ވިއެނާގައި ބޭއްވުމަށް ހަމަޖެހިފައިވާ ޓެއިލަރ ސްވިފްޓްގެ ކޮންސަރޓެއްގައި ޖާނުންފިދާވުމުގެ ހަމަލާއެއް ދިނުމަށް ރޭވި ޒުވާނަކު ހައްޔަރުކުރުމަށްފަހުގައެވެ. އަދި ބުރާސްފަތި ދުވަހު ޖަރުމަނުވިލާތުގެ މިއުނިކްގައި އަފްޣާނިސްތާނުގެ މީހަކު ކާރެއްގައިއގޮސް މީހުންގެ ތެރެއަށް ވަދެ ގިނަ އަދަދެއްގެ މީހުންނަށް އަނިޔާވެ، އޭގެ ތެރެއިން ދެ މީހަކު މަރުވި ހާދިސާގެ ދުވަސްކޮޅެއް ފަހުންނެވެ.

މި ހާދިސާ ހިނގާފައިވަނީ އޮސްޓްރިއާގެ ސިޔާސީ މަޝްރަހު ހަލަބޮލިވެފައިވާ ދަނޑިވަޅެއްގައެވެ. ސެޕްޓެމްބަރު މަހު ބޭއްވުނު ޕާލިމެންޓްރީ އިންތިޚާބުގައި ކާމިޔާބު ހޯދި ހަރުކަށި އަތްފަރާތުގެ ފްރީޑަމް ޕާޓީ (އެފްޕީއޯ) އިން ވަނީ ސަރުކާރެއް އެކުލަވާލުމަށް ނުކުޅެދުނު ކަމަށް ބުނެފައެވެ. މިހާރު ވާހަކަދެކެވެމުންދަނީ މެދުމިނުގެ ޕާޓީތަކުން ސަރުކާރެއް އެކުލަވާލުމާމެދުގައެވެ.